არასამთავრობო ორგანიზაციები განცხადებას ავრცელებენ, რომლითაც ემიჯნებიან და გმობენ პრემიერის განცხადებას, „რადგან იგი არ გამოხატავს ქართველი ერის სულისკვეთებას, არ ემსახურება მის ინტერესებს და არ მართლდება ე.წ. არგაღიზიანების პოლიტიკით.“
პრემიერ-მინისტრის განცხადებით, არ აპირებს შეუერთდეს რუსეთის წინააღმდეგ დაწესებულ ფინანსურ და ეკონომიკურ სანქციებს. ასევე, მმართველმა პარტიამ ჩაშალა პარლამენტის რიგგარეშე სხდომა უკრაინის საკითხზე.
„საქართველოს მეგობრისა და სტრატეგიული მოკავშირის, უკრაინისთვის ამ რთულ დროს დასავლური ერთობისგან გამიჯვნა არის ქვეყნის უსაფრთხოებისთვის პირდაპირი დარტყმა და ისტორიულად შეფასდება როგორც უღირსი საქციელი. ამასთან, აღქმული იქნება ქვეყნის სტრატეგიული პარტნიორისა და მეგობრის ღალატად, რომელიც ახლა უთანასწორო ბრძოლაშია მტრის წინააღმდეგ. პრემიერის განცხადება არ გამოხატავს საქართველოს საზოგადოების აზრს, რომელმაც 24 თებერვალს გამართული უკრაინელი ხალხის მხარდამჭერი მრავალრიცხოვანი აქციისას ნათლად გამოხატა ისტორიის რომელ მხარეს სურს ყოფნა. შესაბამისად, მოვუწოდებთ საქართველოს ხელსუფლებას: დადგეს ანტირუსული დასავლური ალიანსის გვერდით; საქართველოს უსაფრთხოების გეგმა დასახოს ქვეყნის დასავლელ სტრატეგიულ პარტნიორებთან ერთად“, – ნათქვამია განცხადებაში.
განცხადებას ხელს აწერენ:
- სამართლიანი არჩევნებისა და დემოკრატიის საერთაშორისო საზოგადოება (ISFED)
- საერთაშორისო გამჭვირვალობა საქართველო (TI)
- მედიის განვითარების ფონდი (MDF)
- საქართველოს სტრატეგიისა და საერთაშორისო ურთიერთობების კვლევის ფონდი
- ღია საზოგადოების ფონდი (OSGF)
- საქართველოს ატლანტიკური საბჭო
- საქართველოს სასამართლოს გუშაგი (Georgian Court Watch)
- პრევენცია პროგრესისთვის
- პარტნიორობა ადამიანის უფლებებისთვის (PHR)
- საქართველოს დემოკრატიული ინიციატივა (GDI)
- ადამიანის უფლებათა ცენტრი
- ეკონომიკური პოლიტიკის კვლევითი ცენტრი (EPRC)
- დემოკრატიის კვლევის ინსტიტუტი
- დემოკრატიისა და უსაფრთხო განვითარების ინსტიტუტი (IDSD)
- სოციალური სამართლიანობის ცენტრი
