ევროპის საბჭოს ვენეციის კომისიის დელეგაცია საქართველოში შეხვედრებს მართავს. დელეგაციას ვენეციის კომისიის გენერალური მდივანი – სიმონა მენგინი-გრანატა ხელმძღვანელობს.
დელეგაცია ორბელიანების სასახლეში მიიღო საქართველოს პრეზიდენტმა, სალომე ზურაბიშვილმა.
მანამდე ვენეციის კომისიის წარმომადგენლებმა რამდენიმე შეხვედრა გამართეს პარლამენტში, შეხვდნენ პარლამენტის თავმჯდომარეს, შალვა პაპუაშვილს.
პარლამენტის პრესსამსახურის ინფორმაციით, შეხვედრაზე ხაზი გაესვა საქართველოსა და ვენეციის კომისიას შორის მრავალწლიან ნაყოფიერ თანამშრომლობას. „შეხვედრაზე მხარეებმა ისაუბრეს საქართველოში განხორციელებულ რეფორმებზე და შემდგომი თანამშრომლობის მზადყოფნა გამოხატეს“, – ნათქვამია მათ მიერ გავრცელებულ განცხადებაში.
ვენეციის კომისიის გენერალური მდივანი და კომისიის ექსპერტები საკანონმდებლო ორგანოში უმრავლესობისა და ოპოზიციის წარმომადგენლებსაც შეხვდნენ.
ირაკლი კობახიძემ დელეგაციასთან შეხვედრის შემდეგ თქვა, რომ ისაუბრეს თანამშრომლობის სხვადასხვა მიმართულებაზე, მათ შორის, სასამართლოს საკითხებსა და საარჩევნო თემატიკაზე.
