Quiz | რამდენად კარგად იცნობთ საქართველოს საფეხბურთო ნაკრების ისტორიას?

საქართველოსა და რუსეთის ნაკრებები ერთმანეთს ბოლოს 2004 წლის ევროპის ჩემპიონატის საკვალიფიკაციო ეტაპის ჯგუფში შეხვდნენ. თბილისში, მიხეილ მესხის სახელობის სტადიონზე გამართული შეხვედრა საქართველოს ნაკრების გამარჯვებით, 1:0 დასრულდა. მატჩის ერთადერთი გოლი რუსეთის ნაკრების კარში მალხაზ ასათიანმა მე-11 წუთზე გაიტანა.

საქართველოს ეროვნული ნაკრების მაისურით ყველაზე მეტი, 111 შეხვედრა გურამ კაშიას აქვს გამართული. მან ჯაბა კანკავას რეკორდი (100 მატჩი) გააუმჯობესა.

2007 წლის 8 სექტემბერს, ევროპის ჩემპიონატის შესარჩევი ეტაპის მატჩში, საქართველოსა და უკრაინას შორის, ლევან ყენიას დებიუტი შედგა, ის მოედანზე ალექსანდრე იაშვილის ნაცვლად შევიდა. იმ დროისთვის ყენია 16 წლის, 10 თვის და 21 დღის იყო, ამ მონაცემებით ის დღემდე რჩება ყველაზე ახალგაზრდა ფეხბურთელად, ვისაც საქართველოს ნაკრებში უთამაშია.

საქართველოს ეროვნული ნაკრების კარში ყველაზე მეტი, 5-5 გოლი ორ ფეხბურთელს, დიმიტარ ბერბატოვს და რობი კინს აქვთ გატანილი. ბულგარელმა თავდამსხმელმა ამის გაკეთება 3 შეხვედრაში მოახერხა, კინს კი 5 გოლის გასატანად 6 მატჩი დასჭირდა.

საქართველოს ნაკრები დამოუკიდებლობის მოპოვების შემდეგ, ყველაზე მეტჯერ ალბანეთის ნაკრებს შეხვდა და სწორედ მათთან აქვს მოპოვებული ყველაზე მეტი გამარჯვებაც. საქართველო და ალბანეთი ერთმანეთს სულ 15-ჯერ დაუპირისპირდნენ. აქედან, 8-ჯერ საქართველოს ნაკრებმა გაიმარჯვა, 3-ჯერ ალბანეთმა, 4 მატჩი კი ფრედ დასრულდა.

საქართველოს ნაკრებში ყველაზე მეტი, 77 მატჩი გიორგი ლორიას აქვს ჩატარებული, გიორგი ლომაიას - 47, ნუკრი რევიშვილმა 32 შეხვედრა გამართა, დავით გვარამაძის ანგარიშზე კი 28 მატჩია.

შოთა არველაძე საქართველოს ნაკრების ყველა დროის საუკეთესო ბომბარდირია 26 გოლით, მეორე ადგილზე კი თემურ ქეცბაიაა 17-ით.

საქართველოს ეროვნულ ნაკრებს არასდროს უთამაშია 3 ევროპულ ნაკრებთან, ესენია: ბელგია, ჩეხეთი და სან მარინო.

საქართველოს ეროვნულ ნაკრებს 1990 წლიდან დღემდე სულ 21 მთავარი მწვრთნელი ჰყოლია, აქედან 8 მათგანი უცხოელი იყო: იოჰან ბოსკამპი, ივო შუშაკი, ალენ ჟირესი, კლაუს ტოპმიოლერი, პეტარ სეგრტი, ექტორ რაულ კუპერი, ვლადიმირ ვაისი და ვილი სანიოლი.

2006 წლის 16 აგვისტოს, საქართველოს ეროვნულმა ნაკრებმა ფარერის კუნძულების ნაკრები სტუმრად 6:0 დაამარცხა. ეს შეხვედრა ევროპის 2008 წლის ჩემპიონატის საკვალიფიკაციო ეტაპზე გაიმართა. ამაზე დიდი ანგარიშით საქართველომ ისტორიაში ორჯერ გაიმარჯვა, სომხეთთან 7:0 და ტაილანდთან 8:0, თუმცა ეს ორივე მატჩი ამხანაგური იყო.