თეა წულუკიანმა კვოტების გაუქმების საკითხზე თქვა, რომ „დასანანია, მაგრამ გასაგებია კვოტების გაუქმების პოლიტიკური მიზეზები”.
მისი მტკიცებით, პოლიტიკაში ქალთა მონაწილეობის მაღალი ხარისხი „ქართული ოცნების” ბოლო 10 წლის საქმიანობის შედეგად არის მიღწეული.
„დასანანია, მაგრამ აბსოლუტურად გასაგებია ის პრეისტორია და პოლიტიკური მიზეზები, რის გამოც ეს ინიციატივა წარმოიშვა. დარწმუნებული ვარ, არც ჩვენს პარტიაში და არც სხვა პარტიებში ამით არაფერი დააკლდება ქალთა მონაწილეობის იმ მაღალ ხარისხს, რასაც სწორედ „ქართული ოცნების” ბოლო 10-ზე მეტი წლის განმავლობაში საქმიანობის შედეგად ყველამ ერთად მივაღწიეთ”. – თქვა წულუკიანმა.
გენდერული კვოტირების გაუქმების შესახებ კანონპროექტი პარლამენტში ორი მოსმენით უკვე მიიღეს. კანონპროექტს პარლამენტში დაჩქარებული წესით განიხილავენ. ის „გირჩის“ ინიციირებულია, მას აქვს საპარლამენტო უმრავლესობის მხარდაჭერა.
სანაცვლოდ კი, მმართველმა პარტიამ მიიღო დაპირება, რომ ცესკოს თავმჯდომარის არჩევის პროცესში, „გირჩი” ორიენტირებული იქნება კანდიდატის „პროფესიონალიზმსა და კეთილსინდისიერებაზე”. „ქართული ოცნება”გეგმავს, ცესკოს თავმჯდომარეობის კანდიდატად გიორგი კალანდარიშვილი წარადგინოს და „გირჩი” ამ კანდიდატურას მხარას დაუჭერს.
გენდერული კვოტების გაუქმებაზე „გირჩის” კანონპროექტით, ცვლილება შედის საარჩევნო კოდექსში. პროექტი სიების შედგენისას გენდერული კვოტირების გათვალისწინებას ვალდებულებას აუქმებს.
ჯერ კიდევ მოქმედი საარჩევნო კოდექსით, საქართველოს პარლამენტის 2024 წლის 26 ოქტომბრის არჩევნებისათვის პარტიული სიის ყოველ ოთხეულში ერთი პირი მაინც უნდა იყოს ქალი. ხოლო, 2028 წლის 28 ოქტომბრის არჩევნებისა და 2032 წლის ჩათვლით ჩასატარებელი საპარლამენტო არჩევნებისათვის წარდგენილი პარტიული სიის ყოველ სამეულში ერთი პირი მაინც უნდა იყოს ქალი.
კანონპროექტს მხარს არ უჭერენ ოპოზიციის ნაწილი და ქალთა უფლებებზე მომუშავე ორგანიზაციები და აქტივისტები.
