საქართველოს საგარეო საქმეთა სამინისტრო ტვიტერზე განცხადებას აქვეყნებს, სადაც აღნიშნავს, რომ საქართველო მკაცრად გმობს კიბერშეტევებს უკრაინისა და მისი მთავრობის წინააღმდეგ.
„მსგავსი ქმედებები ყოვლად მიუღებელია და საფუძველს ქმნის სიტუაციის შემდგომი ესკალაციისთვის. ჩვენ სოლიდარობას ვუცხადებთ უკრაინას“, – ვკითხულობთ ოფიციალურ ტვიტში.
?? strongly condemns cyber attacks against #Ukraine ?? and its government. Actions of this kind are totally unacceptable and create ground for the further escalation of situation. We stand in solidarity with ?? @MFA_Ukraine.
— MFA of Georgia (@MFAgovge) January 15, 2022
უკრაინის სამთავრობო უწყებების ვებგვერდებზე მასშტაბური კიბერშეტევა განხორციელდა და გამოჩნდა მუქარა უკრაინელების მიმართ, რომ „ეშინოდეთ და ყველაზე ცუდს ელოდნენ“.
მედიის ინფორმაციით, ჰაკერული თავდასხმის ობიექტებს შორისაა: უკრაინის საგარეო საქმეთა სამინისტროს, განათლების და მეცნიერების სამინისტროს და მინისტრთა კაბინეტის ვებგვერდები. მუქარის შემცველი შეტყობინებები უკრაინულ, რუსულ და პოლონურ ენებზე გამოჩნდა. ვებგვერდების შავ ფონებზე გამოქვეყნდა უკრაინის დროშის, გერბის, რუკისა და ღორის თავის გადახაზული სურათები.
მომხდარს გამოეხმაურა NATO-ს გენერალური მდივანი, იენს სტოლტენბერგი და აღნიშნა, რომ ის მკადრად გმობს უკრაინის მთავრობის წინააღმდეგ განხორციელებულ კიბერშეტევას. მისივე განცხადებით, უახლოეს დღეებში ნატო და უკრაინა ხელს მოაწერენ შეთანხმებას კიბერთანამშრომლობის გაძლიერების შესახებ.
