წინანდლის საერთაშორისო მუსიკალური ფესტივალი ჯუზეპე ვერდის „რეკვიემით“ გაიხსნება: პანკავკასიურ ახალგაზრდულ ორკესტრსა და თბილისის საოპერო თეატრის გუნდს ჯანანდრეა ნოზედა უდირიჟორებს.
კლასიკური მუსიკის ერთ–ერთი ყველაზე გამორჩეული ფესტივალი აღმოსავლეთ ევროპის მასშტაბით, 31 აგვისტოს, უკვე მეექვსედ უმასპინძლებს ვირტოუზებს, ახალგაზრდა თუ უკვე გამორჩეულ მუსიკოსებს. შესაძლოა, ვერდის „რეკვიემი“ არც ისე ოპტიმისტურ „დრაივსა“ თუ განწყობას ქმნის საფესტივალო საღამოს გახსნისათვის, მაგრამ თავად ვერდის ამაღლებული და დიადი მუსიკა, მისი მასშტაბი და რაც მთავარია, მონაწილენი – ორკესტრი, გუნდი და სოლისტები, საზეიმო–საფესტივალო დასაწყისისათვის კარგი პრელუდია იქნება.
„რეკვიემში“ საერთაშორისო ფესტივალებსა და საერთაშორისო სცენებზე წარმატებული ვოკალისტები მიიღებენ მონაწილეობას: ერიკა გრიმალდი (იტალიელი დრამატული სოპრანო; ნეაპოლის ოპერის, ბაიერნის „შტატსოპერის“ და ბერლინის „დოიჩე ოპერის მიწვეული სოლისტი); აგნეშკა რელისი (პოლონელი მეცო–საოპრანო, რომელიც ბრეგენცისა და ექს–ან–პროვანსის საოპერო ფესტივალების ხშირი და სასურველი სტუმარია), ჩარლზ კასტრონოვო (ამერიკელი ტენორი; მღერის ძირითადად, ამერიკის კონტინეტზე – ვაშინგტონის ნაციონალური ოპერა, ლოს–ანჯელესის ოპერა, ჩიკაგოს „ლირიკ ოპერა“) და მარკო მიმიკა (ხორვატიელი ბანი, რომელიც ევროპულ საოპერო თეატრებში აქტიურად არის დაკავებული: პალერმოს, ნეაპოლის, ციურიხის ოპერები და ბერლინის „დოიჩე ოპერა“).
საერთაშორისო მუსიკალურ ფესტივალს წინანდლის მამულში, კომპანია „სილქნეტი“ უკვე მეექვსედ წარმოგვიდგენს, ხოლო ფესტივალის გახსნის პატივი წილად ხვდათ პანკავკასიურ ახალგაზრდულ ორკესტრს, თბილისის ოპერისა და ბალეტის თეატრის გუნდსა და გამორჩეულ იტალიელ დირიჟორს, ჯანანდრეა ნოზედას.
მაესტრო ნოზედა 2018 წლიდან, წინანდლის ფესტივალის უცვლელი მუსიკალური დირექტორია. ის 21-ე საუკუნის ერთ–ერთი გამორჩეული და ცნობილი დირიჟორია. 2016 წლიდან არის ლონდონის სიმფონიური ორკესტრის, ხოლო 2017 წლიდან ისრაელის ფილარმონიის მთავარი მიწვეული დირიჟორი. 2017-2018 წლებში ტურინის სამეფო მუსიკალური თეატრის დირექტორია, ხოლო 2021 წლიდან დღემდე იკავებს ციურიხის საოპერო თეატრის მუსიკალური დირექტორის პოსტს.
წინანდლის მუსიკალურმა ფესტივალმა სახელოვნებო სამყაროში რამდენიმე მნიშვნელოვანი გზავნილით დაიმკვიდრა თავი. პირველ რიგში, ეს არის ცნობილი დირიჟორების, პიანისტების, მევიოლინეების კონცერტები თუ მასტერკლასები, რომელიც საფესტივალო ცხოვრების განუყოფელი ნაწილია. ასევე ძალიან მნიშვნელოვანია პანკავკასიური ახალგაზრდული ორკესტრის დაარსება (2018), რომელმაც კავკასიის რეგიონის სხვადასხვა ქვეყნის მუსიკოსები გააერთიანა. ორკესტრის შექმნის იდეაც სწორედ ახალგაზრდა მუსიკოსების თანამშრომლობას გულისხმობს, რაც ქვეყნებს შორის მეგობრობისა და მშვიდობის განმტკიცებას ემსახურება.
შეიძლება ითქვას, რომ პანკავკასიური ორკესტრი ახალგაზრდა ხელოვანების ერთიანობის და თანამშრომლობას ნამდვილი მაგალითია, რაც ქვეყნებს შორის მეგობრობისა და მშვიდობის განმტკიცებას ემსახურება… და ეს წინანდლის მუსიკალური ფესტივალის ერთ–ერთი ყველაზე მნიშვნელოვან აქტივად შეიძლება ჩაითვალოს.
წლევანელი ფესტივალის ერთ–ერთი მნიშვნელოვანი ამბავი სწორედ პანკავკასიური ორკესტრის რეპერტუარის გაფართოებას უკავშირდება. ახალგაზრდული ორკესტრი, რომელშიც კავკასიის რეგიონისა და სხვადასხვა ქვეყნის მუსიკოსებიც არიან გაერთიანებული, 2024 წელს ვერდის „რეკვიემის“ გარდა, ბეთჰოვენის მესამე საფორტეპიანო კონცერტს, ბეთჰოვენის მეშვიდე სიმფონიას, შუბერტის უვერტურას „ჯადონური არფა“, რახმანინოვის „სიმფონიურ ცეკვებს“, გუსტავ მალერის მეოთხე სიმფონიას და მენდელსონის „იტალიურ სიმფონიას“ (N4, ლა მაჟორი, თხზ. 90) შეასრულებს.
წინანდლის ფესტივალის კიდევ ერთი მნიშვნელოვანი დეტალია Silknet-ის პროექტის ფარგლებში საქველმოქმედო ფონდის დააარსება. სწორედ ეს ფონდი უზრუნველყოფს, რომ წინანდალში ბინა დაიდო საერთაშორისო სტანდარტების საგანმანათლებლო ცენტრმა, რომელსაც ყოველწლიურად მსოფლიო მნიშვნელობის ვარსკვლავები უერთდებიან. წინანდალში ჩამოდიან და მასტერკლასებს ატარებენ ცნობილი მუსიკოსები და კონცერტმაისტერები ისეთი სახელოვნებო სივრცეებიდან, როგორებიც არის – მეტროპოლიტენის ოპერა, ინგლისის სამეფო ოპერა, ამსტერდამის „კონცერტგებაუ“ და ა.შ.
31 აგვისტოდან 8 სექტემბრამდე ჭავჭავაძეების მამულში სულ 17 კონცერტი შესრულდება, რომელშიც საერთაშორისო ფესტივალებში მონაწილე, მსოფლიოში აღიარებული მუსიკოსები მიიღებენ მონაწილეობას. მათ შორის, დირიჟორი სერ ანდრაშ შიფი, პიანისტი ალექსანდრ კანტოროვი, მევიოლინე ჯოშუა ბელი, ჩელისტი სტივენ ისერლისი, სოპრანო ბარბარა ფრიტოლი…
და ცხადია, გამორჩეული იქნება ფესტივალის დასკვით საღამოს, 8 სექტემბერს, ჩვენი ნამდვილი ვარსკვლავის, ლიზა ბათიაშვილის კონცერტი, რომელიც მოცარტის მეხუთე სავიოლინო კონცერტს (ლა მაჟორი, k. 219) დიდ სცენაზე შეასრულებს.
