საქართველოს კინოინსტიტუტის წარმომადგენლებმა ბერლინის 75-ე კინოფესტივალზე ცენზურის, აკრძალვისა და დიქტატურის შესახებ ისაუბრეს – კინოთეატრ „არსენალის“ დიდ დარბაზში შეკრებილმა კინემატოგრაფისტებმა 17 იანვარს პრესკონფერენცია გამართეს, რომელსაც ცნობილი გამოცემები და ჟურნალისტები ესწრებოდნენ.
ბერლინის 75-ე საერთაშორისო კინოფესტივალი, რომელიც 13-იდან 23 თებერვლამდე მიმდინარეობს, 2025 წლის პირველი და გამორჩეული კინემატოგრაფიული მოვლენაა მსოფლიოში. ცხადია, „ბერლინალე პალასტის“ წითელ ხალიჩაზეც ყოველდღე ვარსკვლავთცვენაა – ტილდა სვინტონით დაწყებული (რომელსაც მთელი შემოქმედებისათვის სპეციალური „ოქროს დათვი“ წინასწარ გადაეცა), ჯესიკა ჩესტეინით, მარიონ კოტიარით, ჰანა შიგულათი, ეთან ჰოუკით დამთავრებული…
თუმცა ქართული კინოსათვის მნიშვნელოვანი ამბავი ბერლინალეზე მაინც საერთაშორისო გამოცემა SCREEN-ში გამოქვეყნებულ სტატიას უკავშირდება, საქართველოს კინოინსტიტუტის შესახებ (ჟურნალისტი ჯეფრი მაკ‘ნაბი). ასევე, მნიშვნელოვანია დაპატიმრებული მსახიობის, ანდრო ჭიჭინაძის შესახებ გამოქვეყნებული დეტალური ინფორმაცია და მისი ფოტოები.
ქართული კინოინსტიტუტის წარმომადგენლებმა (დავით ვაშაძემ, ნუცა ალექსი–მესხიშვილმა, ნანა ექვთიმიშვილმა, თამარ ტატიშვილმა, თეკლა მაჭავარიანმა, დავით დავითიანმა) ბერლინალეზე, ეროვნული კინოცენტრის სტენდთან ერთგვარი აქციაც გამართეს. აქვე წარადგინეს ჟურნალ Screen Intrnational-ის მეორე ნომერი, რომლის პირველ და მეორე გვერდებზე აღწერილია ანდრო ჭიჭინაძის პროექტები, რომლებიც ევროპული მედიის ყურადღების ცენტრში მოხვდა. ისიც აღნიშნეს, რომ ანდრო ჭიჭინაძე სინამდვილეში თბილისში გამართულ პროევროპულ დემონსტრაციებში მონაწილეობის გამო ისჯება.
„როცა სიმართლე შენს მხარეზეა, მაშინ გეძლევა ძალა“, – განაცხადა ერთ–ერთ სასამართლო პროცესზე თავად ანდრო ჭიჭინაძემ და ეს სიტყვები როგორც ქართულ სტენდთან გამართული აქციის, ისე „არსენალში“ ჩატარებული პრესკონფერენციის მთავარ ლაიტმოტივად იქცა.
ქართული კინოინსტიტუტის ხელმძღვანელობამ, რეჟისორებმა და პროდიუსერებმა მნიშვნელოვანი შეხვედრები გამართეს ევროპული კინოინტიტუტისა და ინდუსტრიის წარმომადგენლებთან, რომლებთანაც მომავალი თანამშრომლობის, ერთობლივი პროექტებისა და დამოუკიდებელი კინოს წინაშე არსებული პრობლემების შესახებ ისაუბრეს. ერთ–ერთი და უმთავრესი ცხადია, დაფინანსების მოძიება იყო… და რადგან დაფინანსებაზე ჩამოვარდა სიტყვა, აღვნიშნავთ, რომ 2025 წელს ქართული კინოინსტიტუტის ევროპულ კინომარკეტზე დასწრება, სტენდ „მარტინ გრუპიუს ბაუს“ ცნობილ სივრცეში და პრესკონფერენცია „არსენალში“, „სამოქალაქო საზოგადოების ფონდისა“ და „კოკა–კოლა ბოთლერს ჯორჯიას“ მხარდაჭერით მოხერხდა.
ქართული კინოს ინსტიტუტი (GFI) მეორედ ესწრება ევროპული კინოს მარკეტზე გამართულ მნიშვნელოვან შეხვედრებს (EFM) და ბერლინალეს საორგანიზაციო კომიტეტისთვის გაგზავნილი წერილის ერთ–ერთი ხელმომწერია, რომელშიც ხაზგასმულია, რომ „საქართველოს ხელისუფლებამ კინოინდუსტრიის არაერთ პროფესიონალს სცემა, აწამა და უკანონოდ დააკავა“. დაზარალებულთა შორის არიან მსახიობები: გიორგი ნაკაშიძე (რომელმაც მთავარი როლი შეასრულა „ოსკარზე“ ნომინირებულ ფილმში „მანდარინები“ და ანდრო ჭიჭინაძე, რომელიც მონაწილეობს ფილმებში: „ცივი ღრუბლები“, „სასტუმრო თეირანი“ და „განსვენებული სამურაი“.
საქართველოს კინოინსტიტუტის წარმომადგენლებმა „არსენალში“ გამართულ პრესკონფერენციაზე იმის შესახებაც ისაუბრეს, რომ შემოქმედებითი თავისუფლება კინოში თითქმის აღკვეთილია და საპროტესტო აქციებსა და წინააღმდეგობის მოძრაობის წევრებს ფუნდამენტური უფლებები ჩამორთმეული აქვთ; რომ ქართული კინო ამჟამად უპრეცედენტო მასშტაბის პოლიტიკურ რეპრესიებს განიცდის დამოუკიდებელი საქართველოს ისტორიაში…
აღსანიშნავია, რომ ამ შეხვედრას და პრესკონფერენციას უძღვებოდა ბარბარა ვურმი – პროგრამა „ფორუმის“ სამხატვრო ხელმძღვანელი 2023 წლიდან. გასულ 2024 წელს სწორედ მისი აქტიური მხარდაჭერით მოხვდა ლანა ღოღობერიძის დოკუმენტური ფილმი „დედა–შვილი, ანუ ღამე არ არის არასოდეს ბოლომდე ბნელი“, ბერლინალეს „ფორუმის“ პროგრამაში.
კინორეჟისორებს აღელვებთ, რომ დაფინანსების ან ადმინისტრაციული მხარდაჭერის გარეშე მათ აღარაფრის გაკეთება არ შეუძლიათ და ევროპულ თუ სხვა საერთაშორისო ფონდებთან, ძირითადად, ერთობლივი პროდუქციის შესაქმნელად იბრძვიან: „საქართველოს კინოცენტრს არ გამოუცხადებია გრანტების ან ერთობლივი პროდუქციის დაფინანსების მოთხოვნა, ეს კი ნიშნავს, რომ ახალი პროექტები არ ფინანსდება“, – ეს რეჟისორებისა და პროდიუსერების საერთო მოსაზრებაა.
ერთადერთი ქართული ფილმი, რომელიც წელს ბერლინალეზე ოფიციალურ პროგრამაში მოხვდა („ფორუმი“), არის თიკო კობიაშვილის დოკუმენტური ფილმი „შინაგანი გაზაფხულის ყვავილობა“, რომელიც გადაღებულია თბილისში, გაზაფხულის საპროტესტო აქციების დროს. 40-წუთიან ფილმს, რომელიც ხელისუფლების მიერ „უცხოური გავლენის აგენტების“ კანონის მიღების ფონზე გამართულ აქციებს ასახავს, ორჯერ უჩვებენ კინოთეატრ „არსენალში“.
