თბილისში მიმდინარე საპროტესტო აქციების პერიოდში სისხლის სამართლის წესით დაკავებულია რუსეთის კიდევ ორი მოქალაქე – ანასტასიია ზინოვკინა და არტემ გრიბული.
მათ პროკურატურა გასაღების მიზნით 16 გრამი ნარკოტიკული საშუალება ალფა-პვპ-ის ფლობას ედავება. ბრალდებულები ბრალს არ აღიარებენ და ამბობენ, რომ პოლიციამ მათ ნარკოტიკი ჩაუდო – მიაჩნიათ, რომ ისინი თბილისში საპროტესტო აქციებში მონაწილეობის გამო ისჯებიან.
„მეუბნებოდნენ, რომ ის, რაც თავს დამატყდა არის აქციებში მონაწილეობის შედეგი და რომ ამის გამო ვისჯებოდი“, – ამის შესახებ არტემ გრიბულმა სასამართლოზე ისაუბრა. მისი თქმით, ამის შესახებ მას პოლიციელები ჯერ მანქანაში, შემდეგ კი განყოფილებაშიც ეუბნებოდნენ.
ზინოვკინამ სასამართლოზე ასევე ისაუბრა პოლიციელების მხრიდან მის მიმართ სექსუალურ შევიწროებასა და სექსუალური ხასიათის მუქარაზე.
ანასტასიია ზინოვკინა რუსი სამოქალაქო აქტივისტია, ის 2012 წლიდან პუტინის რეჟიმის წინააღმდეგ აქტიურად იყო ჩართული რუსეთში ანტისამთავრობო აქციებში, არაერთხელ იყო დაკავებული ადმინისტრაციული წესით – პოლიციისადმი დაუმორჩილებლობისა თუ წვრილმანი ხულიგნობის მუხლით – ბანერის გაშლისა თუ გზის გადაკეტვის გამო. ის იყო ალექსეი ნავალნის აქტიური მხარდამჭერი.
ვრცლად, იხილეთ „პუბლიკის” ვიდეო ამავე თემაზე;
საჯარო წყაროებში გავრცელებული ცნობებით, ზინოვკინა საქართველოში 2022 წელს ჩამოვიდა. არტემ გრიბული კი მობილიზაციის დაწყების შემდეგ სომხეთში მიდის. ანასტასიია ერთ წელში სომხეთში გადავიდა, 2024 წლის ზაფხულში კი ორივე ერთად ჩამოვიდა საქართველოში. ისინი თბილისში დროებით იმყოფებოდნენ, იანვარში მათ სამხრეთ ამერიკაში გამგზავრების ბილეთი უკვე შეძენილი ჰქონდათ.
ადვოკატის ცნობით, ის და არტემი მონაწილეობდნენ თბილისში გამართულ პროევროპულ აქციებში, გამოხატავდნენ მხარდაჭერას აქციის მონაწილეებისადმი და უმასპინძლდებოდნენ მათ ყავით და ჩაით.
შოთა თუთბერიძე „პუბლიკას” უყვება, რომ არტემ გრიბული IT-სფეროში მუშაობდა და ჰქონდა ძალიან კარგი ანაზღაურება.
31 წლის ანასტასია ზინოვკინასა და 24 წლის არტემ გრიბული კრიმინალურმა პოლიციამ 17 დეკემბერს დააკავა. მათ წინააღმდეგ აღძრული მუხლი ქართული კანონმდებლობით განსაკუთრებით დიდი ოდენობით ნარკოტიკული საშუალების ფლობად კვალიფიცირდება და სასჯელის სახით 8-დან ოც წლამდე ან უვადო თავისუფლების აღკვეთას ითვალისწინებს.
დაკავების დღე – 17 დეკემბერი
საქმე კრიმინალური პოლიციის დეტექტივის, ჯემალ მირაზანაშვილის პატაკის საფუძველზე დაიწყო – ის წერს, რომ მიიღო ოპერატიული ინფორმაცია, რომ რუსეთის ფედერაციის მოქალაქეები გასაღების მიზნით ფლობდნენ ნარკოტიკულ საშუალებას. შედეგად პოლიციამ მათ იმავე დღესვე მიაკითხა.
„2024 წლის 17 დეკემბერს, ჩემს მიერ მიღებული ოპერატიული ინფორმაციის თანახმად, რუსეთის ფედერაციის მოქალაქეები – არტემ გრიბული და ანასტასიია ზინოვკინა წარმოადგენენ ნარკორეალიზატორთა ჯგუფს, რომლებიც ერთობლივად ეწევიან ნარკოტიკული საშუალებების უკანონო შეძენა, შენახვას და შემდგომ გასაღებას“, – წერს მირაზანაშვილი პატაკში.
ბრალდებულები თბილისში, ბუდაპეშტის ქუჩაზე, ერთ-ერთი სუპერმარკეტიდან გამოსვლის დროს დააკავეს. ადვოკატი შოთა თუთბერიძე დაკავებისა და ჩხრეკის დროს არაერთ კანონდარღვევაზე მიუთითებს:
„ასეთ შემთხვევაში, ბუნებრივია, ჩნდება ხოლმე კითხვები – როდესაც პოლიცია იღებს შეტყობინებას, რომ კონკრეტული პირი ნარკორეალიზატორია და ნარკოტიკებს ასაღებს, მის სახლში მივარდნა და დაკავება, არცერთ შემთხვევაში გონივრული გამოსავალი არაა.
აქ იგეგმება ხოლმე ძალიან ბევრი ოპერატიული ღონისძიება, მათ შორის სხვა რეალიზატორების გამოვლენის მიზნით, სხვა მყიდველებისა და გამყიდველების გამოვლენის მიზნით. ეს კი რა თქმა უნდა არ მოხდა, რადგან მიზანი არ ყოფილა გამოძიების ჩატარება, მიზანი იყო ამ ადამიანების დაჭერა, ამიტომ პოლიცია მათ დახვდა ერთ-ერთი სუპერმარკეტიდან გამოსულებს, სასწრაფოდ დაიწყეს ჩხრეკა და ძალადობა, ჩასვეს ავტომობილებში, წაართვეს ჩანთები და ქურთუკები, 10-15 წუთში მოვიდა გამომძიებელი და თარჯიმანი, მათი მოსვლის შემდეგ უკვე დაუბრუნეს ქურთუკი და ჩანთა და უთხრეს, რომ ახლა უნდა გაგჩხრიკოთო, ხოლო პოლიციელების მიერ წართმეულ უკან დაბრუნებულ ტანსაცმელსა და ჩანთებში პოლიციელებმა თითქოს აღმოაჩინეს ნარკოტიკული ნივთიერება.
ამის შემდეგ ისინი წავიდნენ მათ ნაქირავებ სახლში და იქაც, ზერელე ჩხრეკის შედეგად პოლიციამ „იპოვა“ ნარკოტიკული ნივთიერება.
ჩხრეკის პროცესი ძალიან ბევრ ეჭვს ბადებს, ვიდეოში ჩანს, რომ ვიდეოს გადაღების არსი არ არის დაკმაყოფილებული, იქ არ ჩანს ჩხრეკის პროცესი… ბინის დანარჩენ ნაწილებში სხვა პოლიციელები დადიან – უცნობია, რას აკეთებენ, კამერა კი სხვებს დაჰყვება. ხოლო როცა კამერა ტრიალდება და შედის სხვა საძინებელში, რომელიც მანამდე არ ჩანს კამერის ობიექტივში, უკვე სასთუმალთან გამოღებულ ტუმბოში ხვდებათ ორი შეკვრა ნარკოტიკული საშუალება“, – ამბობს შოთა თუთბერიძე.
რაც შეეხება პირად ჩხრეკას, მისი თქმით, ამის ამსახველი ვიდეოკადრები არ არსებობს. ადვოკატი ამბობს იმასაც, რომ ჩხრეკისა და პირველი/რეალური დაკავების დრო არ ემთხვევა შესაბამის ოქმებში ასახულ ინფორმაციას.
ბრალის შესახებ დადგენილებაში აღნიშნულია, რომ ბრალდებულებმა უარი განაცხადეს მასზე ხელმოწერაზე.
ადვოკატი ასევე ამბობს იმასაც, რომ სასამართლომ არ დააკმაყოფილა მათი შუამდგომლობა სუპერმარკეტის კადრების ამოღებაზე, რაც მისი თქმით, ამყარებს ეჭვს, რომ სასამართლოს, ისევე როგორც პროკურატურას არ აქვს ინტერესი, საქმეზე დადგინდეს ჭეშმარიტება.
თუთბერიძის თქმით, ბრალდებულების მიერ აღწერილი გარემოებების დადასტურება ასევე შეუძლია ტაქსის მძღოლს, რომელიც მათ ჰყავდათ გამოძახებული. თუმცა, დაცვის მხარე წინაღობებს ამ შემთხვევაშიც აწყდება.
თუთბერიძე ამბობს, რომ საქმეში არ არსებობს რაიმე სახის მტკიცებულება – მიმოწერა, ე.წ. სქრინი, აპლიკაცია, რაც მათ მიერ ნარკოტიკების გასაღების მიზანს დაადასტურებდა.
„ხელს იდებდა სასქესო ორგანოზე და მეუბნებოდა, თუ გავინძრეოდი, სხეულის ამ ნაწილით დამსჯიდა“
გარდა ზემოთ აღნიშნულია, ანასტასიია ზინოვკინა დაკავების პერიოდში მის მიმართ სექსუალურ შევიწროებისა და სექსუალური ხასიათის მუქარაზე საუბრობს. მისი თქმით, ის პირი, ვინც მას აკავებდა, სასქესო ორგანოზე იდებდა ხელს და ეუბნებოდა, რომ თუ გაინძრეოდა, „სხეულის ამ ნაწილით დასჯიდა“.
„ხელს მიყოფდნენ ჯიბეში, ათვალიერებდნენ ჩემს ნივთებს, მე მეხებოდნენ კაცები… მე ასევე ვფიქრობ, რომ ეს ჟესტი – შეხება საკუთარ სასქესო ორგანოზე – იმ კონტექსტში შეესაბამებოდა მუქარას. სიტყვიერად მეუბნებოდა, რომ თუ მე გავინძრეოდი, ის მე სხეულის ამ ნაწილით დამსჯიდა“, – განაცხადა ანასტასია ზინოვკინამ სასამართლოზე.
„ამ საქმეში განსაკუთრებით გულისამრევი არის ის სისასტიკე, რითაც ექცეოდნენ განსაკუთრებით ანასტასიას… ანასტასია, რომელიც გოგოა, რუსულენოვანია – თქვენ შეგიძლიათ, წარმოიდგინოთ ახალგაზრდა გოგო, ჩავარდნილი იმ კრიმინალების ხელში, რომლებიც მზად არიან ადამიანს ნარკოტიკი ჩაუდონ ჯიბეში?!
დაწყებული სექსუალური ძალადობის მუქარით, დამთავრებული იმით, რომ ის მამაკაცმა გაჩხრიკა პირველ ჯერზე, რაც არ შეიძლება, იგივე სქესის ადამიანმა უნდა ჩაატაროს ჩხრეკა. დამთავრებული იმით, რომ იყო ჩხრეკის დროს ინტიმურ ადგილებში შეხება, ასევე, არამხოლოდ სიტყვიერი, ჟესტების ენით მინიშნება და მუქარა შესაძლო სექსუალური ძალადობის შესახებ, იგივე შინაარსის, თუმცა სექსუალური მიმართულებით ნაკლებად ფანტაზირებული კომუნიკაცია ჰქონდა არტემს…“, – ამბობს ადვოკატი შოთა თუთბერიძე.
ადვოკატ შოთა თუთბერიძის თქმით, მათ ამ საკითხზე მიმართეს სპეციალურ საგამოძიებო სამსახურს და დაწყებულია გამოძიება.
„კაციტაძის გამოძიებული საქმე ჯერ ჩვენ არ გვინახავს ამ საქმეებზე და ამიტომაც, ჩვენ არ გვაქვს დიდი იმედი, მაგრამ დარწმუნებული ვარ, რომ ოდესმე გამოინახება გამომძიებელი, რომელიც ამას გამოიძიებს. ასეთ დანაშაულზე ხანდაზმულობის ვადა ძალიან დიდია“, – ამბობს თუთბერიძე.
აღსანიშნავია, რომ საპროტესტო აქციების ფარგლებში საქართველოში დაკავებულია რუსეთის კიდევ ერთი მოქალაქე – ანტონ ჩეჩინი, მასაც 4 გრამი ალფა-პვპ-ის ფლობას ედავება ქართული პოლიცია.
ანტონ ჩეჩინი მონაწილეობას იღებდა რუსეთში პუტინის რეჟიმის წინააღმდეგ აქციებში, აქვს მოგებული საქმე სტრასბურგის სასამართლოში. საქართველოში ჩამოსვლის შემდეგ მონაწილეობდა თბილისში მიმდინარე აქციებშიც. ის 3 დეკემბერს დააკავეს.
რას ამბობს პროკურატურა
„არანაირი კავშირი ნარკოტიკული საშუალების შეძენა-შენახვასა და მათ პოლიტიკურ აქტივობას შორის არ არის“, – ამბობს „პუბლიკასთან“ საუბრისას საქმის პროკურორი ნუგზარ ჭიტაძე.
მას ასევე ვკითხეთ, რატომ არ ამოიღო პროკურატურამ სუპერმარკეტის ჩანაწერები, რაზეც დაცვის მხარე აცხადებს, რომ გამოჩნდებოდა რეალური სურათი – თუ რა და როგორ მოხდა დაკავების ადგილზე.
პროკურორს მიაჩნია, რომ ვინაიდან ჩხრეკა ავტომობილში ჩატარდა, როგორ მიმდინარეობდა საგამოძიებო მოქმედებები, ამის აღბეჭდვა კამერებზე ვერ მოხდებოდა. პროკურორი ნეიტრალურ მოწმედ მიიჩნევს თარჯიმანსაც, რომლის მიმართ დაცვის მხარე უნდობლობას აცხადებს.
„თავად ბრალდებულებიც ამბობენ, რომ მათი ჩხრეკა ჩატარდა ავტომობილში, რაც საგამოძიებო მოქმედების ოქმებშიც ასახულია. შესაბამისად, ვიდეოჩანაწერზე ჩანდეს საგამოძიებო მოქმედება, ეს არის გამორიცხული…“, – ამბობს ის.
პროკურორს მიაჩნია, რომ სასამართლოში თარჯიმნისა და პოლიციელების გამოკითხვა და მათთვის შეკითხვების დასმა ნეიტრალური ვიდეომტკიცებულების ალტერნატივას გასწევს.
„მოცემულ შემთხვევაში საგამოძიებო მოქმედებას დაესწრნენ ნეიტრალური პირები, როგორიც გახლდათ თარჯიმნები და ისინი მისცემენ სასამართლოში განმარტებას, გამოკითხულებიც არიან. ასევე თითოეულ პოლიციელზე შეკითხვის დასმის საშუალება და უფლება არა მხოლოდ ადვოკატებს ექნებათ, არამედ ბრალდებულებსაც“, – ამბობს პროკურორი.
რაც შეეხება სახლის ჩხრეკას, თუ რამდენად ჩატარდა ის საპროცესო კანონმდებლობის შესაბამისად, ჭიტაძეს მიაჩნია, რომ ის ფაქტი, რომ სახლის მესაკუთრემ გააღო საცხოვრებელი სახლის კარი, რაც მითითებულია ოქმშიც, არ ტოვებს სახლში ჩატარებულ საგამოძიებო მოქმედებაში ეჭვის შეტანის საფუძველს.
აღსანიშნავია, რომ ანასტასიია ზინოვკინასა და არტემ გრიბულს ბრალი წარდგენილი აქვთ არა გასაღების, არამედ განსაკუთრებით დიდი ოდენობით ნარკოტიკული საშუალების ფლობის მუხლით. მიუხედავად ამისა, პროკურატურა ბრალის ფორმულირებაში სიტყვიერად მაინც აღნიშნავს, რომ მათ ეს ნივთიერებები გასაღების მიზნით ჰქონდათ.
პროკურორს ვკითხეთ, რის საფუძველზე აცხადებს უწყება, რომ აღნიშნულ პირებს საქმეში არსებული ნარკოტიკული საშუალება გასაღების მიზნით ჰქონდათ, – არის თუ არა საქმეში მტკიცებულების სახით წარმოდგენილი რაიმე მასალა, რაც ადასტურებს გასაღების მიზანს?
„გეტყვით, რამ განაპირობა ჩემი მხრიდან ბრალში ამ მიზნის ჩაწერა – მოცემულ შემთხვევაში სისხლის სამართლის საქმეზე ინფორმაციული პატაკი გახლავთ შემდეგი შინაარსის, რომ ისინი სისტემატურად იძენენ, ინახავენ და ასაღებენ ნარკოტიკულ საშუალებებს… საცხოვრებელ სახლში ჩხრეკის დროს ამოღებულ იქნა ასევე ელექტრო სასწორი და სხვადასხვა პაკეტი. ელექტრო სასწორზე აღმოჩნდა ნარკოტიკული საშუალების კვალი, რაც მიუთითებს იმ ფაქტზე, რომ ისინი ხშირად იყენებდნენ ელექტრო სასწორს, წონიდნენ და აფასოებდნენ.
ასევე ნიშანდობლივია ის ფაქტი, რომ საცხოვრებელი სახლის ჩხრეკა ჩატარდა ვიდეოს გადაღებით და მესაკუთრის მონაწილეობით, საცხოვრებელი სახლის კარი გაუღო სახლის მესაკუთრემ, რომელიც დაესწრო საგამოძიებო მოქმედებას და დაადასტურა ხელმოწერით აღნიშნული.
ასევე რაც შეეხება სისხლის სამართლის საქმეზე სხვა მტკიცებულებებს, რაც გასაღების ფაქტს დაადასტურებს – მოცემულ შემთხვევაში განჩინებით გამოთხოვილი გვაქვს – საბანკო დაწესებულებიდან საბანკო გადარიცხვების ისტორია, ასევე მათ ტელეფონებზე დანიშნულია ექსპერტიზა, რადგან შეიძლება რაიმე იყოს ამ მიმართულებითაც.
… ვინაიდან არ იყო დასაბუთებული ვარაუდის სტანდარტი, რომ მათ გასაღებით მივდავებოდით, შესაბამისად წავუყენეთ მხოლოდ შეძენა-შენახვა, თუმცა ის ფაქტები, რაც გითხარით, ვინაიდან მიუთითებდა შემდგომ მიზანს აღნიშნულისას, ბრალის ფორმულირებაში მოხდა ამის ასახვა“, – ამბობს პროკურორი ჭიტაძე.
ამასთან, ბრალდების მხარეს ჯერ არ აქვს ექსპერტიზის დასკვნა, ამოვიდა თუ არა საქმეში არსებულ ნარკოტიკულ ნივთიერების შეფუთვაზე ბრალდებულების ბიოლოგიური მასალა.
„შესაფუთ მასალაზე დანიშნულია ბიოლოგიური ექსპერტიზა, თუმცა ჯერ არ მიგვიღია ბიოლოგიური ექსპერტიზის პასუხი… გაგზავნილია ლევან სამხარაულის ექსპერტიზის ბიუროში“, – ამბობს პროკურორი.
