თბილისის საქალაქო სასამართლომ რუსული კანონის წინააღმდეგ საპროტესტო აქციებზე დაკავებულ ათივე პირზე განაჩენი უკვე დაადგინა. რუსული კანონის წინააღმდეგ პროტესტის დროს სისხლის სამართლის წესით ჯამში 10 პირი დააკავეს.
სტატიაში თავს მოვუყრით მათ შესახებ ინფორმაციას და კიდევ ერთ მოგიყვებით, თუ როგორ დასაჯა სისტემამ ისინი.
პოლიციელზე თავდასხმა ან სხვისი ნივთის დაზიანება – ათ მათგანს სწორედ ამ მუხლებიდან ერთ-ერთი ჰქონდა ბრალად წარდგენილი.
გიორგი შანიძე – ის მაისში სამეთვალყურეო კამერების დაზიანების გამო დააკავეს. მის საქმეზე განაჩენი ერთ-ერთ პირველი იყო – სექტემბერში მოსამართლე მიხეილ ჯინჯოლიამ მას 4 წელი მიუსაჯა. განაჩენის გამოცხადებიდან 4 დღეში პრეზიდენტმა სალომე ზურაბიშვილმა ის შეიწყალა.
პრეზიდენტის ასეთი მყისიერი გადაწყვეტილება სხვა ბრალდებულებმა აღიქვეს სიგნალად, რომ ზურაბიშვილი მათაც შეიწყალებდა. ამის გამო მათმა დაცვის მხარემ სტრატეგია შეცვალა – იმ იმედით, რომ სწრაფი მართლმსაჯულების შედეგად საქმეების განხილვა სალომე ზურაბიშვილის პრეზიდენტობის ვადაში მოესწრებოდა. თუმცა ყველაფერი ამ გეგმით არ განვითარდა.
ომარ ოკრიბელაშვილი, საბა მეფარიშვილი, გიორგი ოკმელაშვილი, გიორგი კუჭუაშვილი – მათი ადვოკატები ოქტომბრიდან მოყოლებული საქმის განხილვის მიზანმიმართულ გაჭიანურებაზე საუბრობდნენ. მოსამართლის ავად ყოფნის, პროკურორის შვებულებაში გასვლისა თუ სხვა ფორმალური მიზეზებით განაჩენი მათ საქმეზე იანვარ-თებერვალში დადგა, როცა უკვე სალომე ზურაბიშვილს მათი შეწყალების შესაძლებლობა აღარ ჰქონდა.
ომარისა და საბას ისტორია „პუბლიკის“ მკითხველისთვის კარგად ცნობილია. 400-ლარიანი ლითონის ჯებირის დაზიანების გამო მათ ბრალი ისეთი მუხლით წარუდგინეს, რაც ჯგუფურად მოქმედებას გულისხმობდა და შესაბამისად, მათ უფრო მკაცრი სასჯელიც ემუქრებოდათ. აღსანიშნავია, რომ ჯგუფურად ნივთის დაზიანების მუხლი „ქართულმა ოცნებამ“ კანონმდებლობაში პირველ რუსულ კანონზე საპროტესტო აქციების შემდეგ, დაჩქარებული წესით მიიღო.
ომარისა და საბას ადვოკატებმა არაერთხელ დააყენეს შუამდგომლობა პატიმრობის გირაოთი შეცვლის მოთხოვნით, თუმცა სასამართლომ არცერთ შემთხვევაში არ გაითვალისწინა დაცვის მხარის არგუმენტები. აანაზღაურეს ზიანი – 400 ლარიც. ომარისა და საბას თავდებში დაუდგა 66 პირი.
20 იანვარს სასამართლომ განაჩენი გამოაცხადა, ამ დღეს ომარ ოკრიბელაშვილი 20 წლის გახდა.
სასამართლომ ისინი დამნაშავედ ცნო წარდგენილ ბრალში და 2 წლითა და 6 თვით თავისუფლების აღკვეთა მიუსაჯა – მათ ციხეში ჯამში წელიწად-ნახევრის გატარება მოუწევთ, დამატებით 1 წელი კი ჩაეთვლებათ პირობით მსჯავრად – ეს საქმეზე გაფორმებული საპროცესო შეთანხმების პირობებია.
იმავე დღეს გახდა ცნობილი 20 წლის ფრიდონ ბუბუტეიშვილის განაჩენი, მას მოსამართლე ზვიად შარაძემ 5 წელი მიუსაჯა. მას მეხანძრე-მაშველისთვის ქვის სროლას ედავებოდნენ.
სამედიცინო ექსპერტიზის დასკვნით, მეხანძრე-მაშველს მხარზე ჰქონდა სისხლნაჟღენთი, რაც მიეკუთვნებოდა სხეულის დაზიანებათა მსუბუქ ხარისხს და რასაც ჯანმრთელობის მოშლა არ გამოუწვევია.
„შავნიღბიანები მომიტინგეებს ურტყამდნენ, აბრტყელებდნენ, ამ სიტყვის პირდაპირი მნიშვნელობით. მე თავი ჩავთვალე ვალდებულად, დამეცვა სუსტები და ხელს ვკრავდი“, – ეს სიტყვები კი გიორგი ოკმელაშვილს ეკუთვნის. პოლიციელზე თავდასხმის მუხლით მასაც 5 წელი მიესაჯა.
4 წელი მიესაჯა გიორგი კუჭუაშვილს სპეცრაზმელისთვის ნახევრადცარიელი ბოთლის სროლის გამო.
5 წლით თავისუფლების აღკვეთა შეეფარდა კიდევ ერთ ბრალდებულს – ირაკლი მეღვინეთუხუცესს. ისიც რუსული კანონის წინააღმდეგ აქციაზე დაკავებული ერთ-ერთი ბრალდებული იყო.
რაც შეეხება დავით კოლდარს, პოლიციელის მანქანის დაზიანების გამო მას 2 წლითა და 3 თვით თავისუფლების აღკვეთა მიესაჯა. შინაგან საქმეთა სამინისტრომ უარი განაცხადა მისთვის ამნისტიის გავრცელებაზე.
ბრალდებულთა შორის იყო ანდრეი რაუტბერგი – სამეთვალყურეო კამერების დაზიანების ბრალით. „პუბლიკის“ ინფორმაციით, მას მორიგების შედეგად, 3000 ლარის ჯარიმა დაეკისრა.
მეათე ბრალდებულის – ვაჟა დურგლიშვილის განაჩენის შესახებ ინფორმაციას კი არც პროკურატურა ამბობს და არც სასამართლო.
