თბილისის მერის კახა კალაძის თქმით, გასულ წელს მერიაში თანამშრომელთა ნაწილისთვის ანაზღაურებისა და საწვავის ხარჯის გაზრდის აუცილებლობა იყო.
„ბენზინს არავინ სვამს და სახლში არ მიაქვს. ამის საჭიროება იყო და იქნა გამოყენებული“, – თქვა კალაძემ IDFI-ის კვლევის პასუხად. კვლევის მიხედვით, 2018 წელს თბილისის მერიაში გაიზარდა საწვავის ხარჯი, ასევე – შტატგარეშე თანამშრომელთა რაოდენობა და ანაზღაურება.
„ყველა ცვლილება განპირობებულია აუცილებლობიდან გამომდინარე“, – თქვა თბილისის მერმა.
IDFI-ის კვლევით, თბილისის მერიის მიერ სტრუქტურულ ერთეულებში დასაქმებულ თანამშრომელთა შრომითი ანაზღაურებისთვის დახარჯულმა ჯამურმა თანხამ 2017 წელს 23 მილიონ 400 ათას ლარზე მეტი შეადგინა, ხოლო 2018 წელს – დაახლოებით 23 მლნ 900 ლარი.
ასევე, კვლევის მიხედვით, 2018 წელს 278 ათასი ლარით გაიზარდა მერიის საწვავის ხარჯი.
