საპარლამენტო ოპოზიციამ პარლამენტის თავმდჯომარეს, შალვა პაპუაშვილს სასამართლოს საკითხზე საგამოძიებო კომისიის შექმნის თაობაზე 50 დეპუტატის ხელმოწერა წარუდგინა. დეპუტატების თქმით, თუ მათ საგამოძიებო კომისიის შექმნის შესაძლებლობა არ მიეცემათ, საკონსტიტუციო სასამართლოს მიმართავენ.
საგამოძიებო კომისიის შექმნას პარლამენტში დეპუტატთა საკმარისი რაოდენობა უჭერს მხარს, თუმცა მის შექმნას საპარლამენტო უმრავლესობა უშლის ხელს. მმართველმა გუნდმა წინა სასესიო კვირას კვორუმი რამდენჯერმე ჩააგდო.
ოპოზიციონერი დეპუტატები კომისიის შექმნის საკითხს გუშინდელი, 2 მაისის სხდომის კენჭსაყრელ საკითხთა შორის ელოდებოდნენ, თუმცა ის სიაში ვერ მოხვდა.
„ჩვენ მომსწრენი ვართ უპრეცედენტო ადმინისტრაციული ძალადობის. სიაში კენჭის საყრელად კვლავ არ არის საგამოძიებო კომისიის შესახებ საკითხი. უმრავლესობამ, რომელმაც გადაწყვიტა, რომ მართლმსაჯულებაში არსებულ პრობლემებსა და პრობლემურ ადამიანებს ბოლომდე გადაეფაროს და ჩაყვეს იქით, საითაც მიემართებიან, ყველა ხრიკს მიმართა – უკანონოს, კონსტიტუციის დამრღვევს“, – განაცხადა „ლელოს“ დეპუტატმა, დავით უსუფაშვილმა.
ოპოზიციონერი დეპუტატების განცხადებით, კონსტიტუცია უფლებას აძლევს პარლამენტის 50 წევრს, შექმნას საგამოძიებო კომისია, ამის ხელშეშლა კი კონსტიტუციის დარღვევაა.
„პარლამენტის თავმჯდომარევ, წარგიდგენთ პარლამენტის 50 წევრის ხელმოწერას. ანუ ხელმოწერით ვადასტურებთ ჩვენს ნებას და გადაწყვეტილებას იმის თაობაზე, რომ შეიქმნას საქართველოს კონსტიტუციის 42-ე მუხლით გათვალისწინებული საგამოძიებო კომისია, რომლისთვისაც საჭიროა პარლამენტის 1/3-ის მხარდაჭერა და სხვა ადამიანები რა აზრზე ბრძანდებით, ეს არ აინტერესებს კონსტიტუციას. ამ ჩვენი ნების გამოვლენით, მოგმართავთ, გააგრძელოთ საგამოძიებო კომისიის ფუნქციონირებისთვის საჭირო პროცედურები და თუ ესეც არ არის საკმარისი, მაშინ შევხვდებით საკონსტიტუციო სასამართლოში და აუცილებლად შევხვდებით უკვე საგამოძიებო კომისიაში, რომელიც აუცილებლად შეიქმნება ამ პარლამენტში თუ არა, შემდეგ პარლამენტი იმისთვის, რომ ყველაფერთან ერთად რაც ხდება მართლმსაჯულებაში, გამოძიებულ და სააშკარაოზე გამოტანილ იქნას, რაც მოხდა ამ დღეებში პარლამენტში. კონსტიტუციით გარანტირებული უფლება წაშალეთ და ამის პატიება არ შეიძლება“, – განაცხადა დავით უსუფაშვილმა.
6 აპრილს აშშ-ის სახელმწიფო დეპარტამენტის მიერ 4 ქართველი მოსამართლის სანქცირების შემდეგ საპარლამენტო ოპოზიცია სასამართლო „კლანზე“ საგამოძიებო კომისიის შექმნის ინიციატივით გამოვიდა.
სახელმწიფო დეპარტამენტმა სანქციები დაუწესა იუსტიციის საბჭოს წევრ ლევან მურუსიძეს, თბილისის სააპელაციო სასამართლოს თავმჯდომარე მიხეილ ჩინჩალაძეს, თბილისის სააპელაციო სასამართლოს ადმინისტრაციულ საქმეთა პალატის თავმჯდომარეს, ირაკლი შენგელიას და თბილისის სააპელაციო სასამართლოს ყოფილი თავმჯდომარესა და იუსტიციის უმაღლესი საბჭოს ყოფილი მდივანს, ვალერი ცერცვაძეს.
