გაეროს უშიშროების საბჭო მთიან ყარაბაღში მიმდინარე კონფლიქტის შესახებ იმსჯელებს. საგანგებო სხდომა დღეს ნიუ-იორკის დროით 17:00 საათზე გაიმართება.
როგორც სააგენტო „ფრანს პრესი“ დიპლომატიურ წყაროებზე დაყრდნობით წერს, უშიშროების საბჭოს სხდომა ფორმალურად ბელგიამ მოიწვია, თუმცა მოლაპარაკების გამართვას აქტიურად ითხოვდა გერმანია და საფრანგეთი, ასევე უშიშროების საბჭოს სხდომის მოთხოვნას მხარს უჭერდა დიდი ბრიტანეთი და ესტონეთიც. უშიშროების საბჭოს წევრებს ყარაბაღში მიმდინარე მოვლენებზე რეზოლუციის მიღება სურთ.
გაერთიანებული ერების უშიშროების საბჭოს მუდმივი და დროებითი წევრები ჰყავს. მუდმივ წევრებს შორის 5 ქვეყანაა: რუსეთი, ჩინეთი, აშშ, დიდი ბრიტანეთი და საფრნაგეთი. ხოლო დროებით, 2 წლით არჩეული წევრებია: ბელგია, დომინიკელთა რესპუბლიკა, ესტონეთი, გერმანია, ინდონეზია, ნიგერი, სენტ-ვინსენტი და გრენადინები, სამხრეთ აფრიკა, ტუნისი და ვიეტნამი.
მთიან ყარაბაღში აზერბაიჯანულ და სომხურ შეიარაღებულ ძალებს შორის დაპირისპირება 27 სექტემბერს დილით დაიწყო. ორივე მხარე კონფლიქტის განახლებაში ერთმანეთს ადანაშაულებს. რეგიონში სამხედრო მოქმედებები მესამე დღეა არ წყდება. აზერბაიჯანის ხელისუფლება ამტკიცებს, რომ მათ გაანადგურეს არერთი სომხური პოზიცია და დაიკავეს დასახლებებისა და სტრატეგიული ობიექტების ნაწილი. სომხეთის ხელისუფლება კი აცხადებს, რომ აზერბაიჯანის მიერ დაკავებული ტერიტორიების მნიშვნელოვანი ნაწილის უკან დაბრუნება შეძლეს.
სამხედრო დაპირისპირებას ათობით სამხედრო ემსხვერპლა. როგორც აზერბაიჯანი, ისე სომხეთი ირწმუნება, რომ მათ მტერს გაცილებით დიდი ზიანი მიაყენეს, საუბარია ასობით დაღუპულ ჯარისკაცზე. კონფლიქტის განახლების შემდეგ მსხვერპლი იყო მშვიდობიან მოქალაქეებშიც.
ამჟამად როგორც უშუალოდ მთიანი ყარაბაღის თვითგამოცხადებულ რესპუბლიკაში, ისე სომხეთსა და აზერბაიჯანში საომარი მდგომარეობაა გამოცხადებული. სომხეთში მთელი ქვეყნის მასშტაბით, ხოლო აზერბაიჯანში ნაწილობრივ მობილიზაციაც გამოცხადდა.
კონფლიქტს გამოეხმაურა არაერთი ქვეყანა. მათ შორის თურქეთმა მკაცრად გააკრიტიკა სომხეთი და მას კონფლიქტის გაღვივებასა და რეგიონში დესტაბილიზაციის მცდელობაში დასდო ბრალი. თურქეთის ხელისუფლების წარმომადგენლებმა აზერბაიჯანს მხარდაჭერა აღუთქვეს. ხოლო აზერბაიჯანი გააკრიტიკა კვიპროსმა ოფიციალურ განცხადებაში. მხარეებს კონფლიქტის შემდგომი ესკალაციის თავიდან არიდებისკენ მოუწოდა კრემლმაც, მას შემდეგ რაც ვლადიმერ პუტინი სომხეთის პრემიერ-მინისტრს ნიკოლ ფაშინიანს ესაუბრა.
ფაშინიანი ესაუბრა გერმანიის კანცლერს ანგელა მერკელსაც, რომელმაც გავრცელებული ინფორმაციით, მოუწოდა დაპირისპირების დიალოგის ფორმატში გადაყვანისკენ, ფაშინიანმა კი მოითხოვა, რომ შეაჩერონ თურქეთი კონფლიქტში შესაძლო ჩართვისკენ.
კონფლიქტის მხარეებს სამხედრო დაპირისპირების შეწყვეტისკენ აქტიურად მოუწოდებს საერთაშორისო საზოგადოება, მათ შორის, NATO, ევროპის საბჭო, აშშ და სხვ.
