„ქართული ოცნების” აღმასრულებელი მდივნის, მამუკა მდინარაძის განცხადებით, „სისხლის სამართლის კოდექსში სამშობლოს ღალატის მუხლი დაემატება”. ამის შესახებ მან „ოცნების” უმრავლესობის სხდომის დასრულების შემდეგ განაცხადა.
„ჩვენი გადაწყვეტილებით, საქართველოს სისხლის სამართლის კოდექსს დაემატება და უფრო სწორი იქნება, თუ ვიტყვით, სისხლის სამართლის კოდექსში აღდგება სამშობლოს ღალატის მუხლი, რომელიც თავის დროზე „ნაციონალურმა მოძრაობამ“ ამოიღო სისხლის სამართლის კოდექსიდან. რაც უნდა ვინმეს გაუკვირდეს, თუ არ გაუკვირდეს ან სიმბოლური იყოს, ეს მოხდა აგვისტოს ომამდე, ეს გააკეთეს აგვისტოს ომამდე, 2007 წლის აპრილის თვეში“, – განაცხადა მდინარაძემ.
ასევე, მდინარაძის თქმით, მიმდინარე კვირას „ოცნების” პარლამენტში დაინიციირდება ამერიკული FARA-ს კანონი, „მედიის კანონი” და დარეგისტრირდება იმ კანონების პირველადი ვერსიები, რომელიც საჯარო სამსახურში უცხოური წყაროდან სარგებლის მიღებას შეზღუდვას.
„მიმდინარე კვირაში დაინიცრდება „ფარა”-ს ამერიკული კანონი რომელთან დაკავშირებითაც ჩვენ გადაწყვეტილება მივიღეთ და წინა პერიოდში საზოგადოებას ვაცნობეთ;
„მედიის კანონი“, რომელიც ძირითადად „ფეიკ ნიუსებს“ შეეხება და იქნება ბრიტანული მოდელის პრინციპების გათვალისწინებით მიღებული. ასევე დარეგისტრირდება იმ კანონების პირველადი ვერსიები, რომელიც შეეხება საჯარო სამსახურში უცხოური წყაროდან სარგებლის მიღების შეზღუდვას – „ენჯეოების“ ამოღებას ყველა კანონიდან, სადაც გადაწყვეტილების მიღების პროცესში მათ სავალდებულო მონაწილეობაზეა საუბარი. „სიპების“ ხელმძღვანელების დანიშვნის გამარტივებას, ანტინარკოტიკული კანონმდებლობის გამკაცრებას, არასრულწლოვანთა მართლმსაჯულებას, მიგრაციის შესახებ კანონმდებლობის გამკაცრებას.
ამ პროექტების საბოლო მიღებამდე რჩება თვე-ნახევარი, შესაბამისად, მოხდება საქართველოს პარლამენტში კანონპროექტების დეტალური დამუშავება“,- განაცხადა მდინარაძემ.
