ევროპარლამენტის ვიცე-პრეზიდენტი, „მწვანეების“ წევრი ჰაიდი ჰაუტალა ნამახვანჰესის წინააღმდეგ პროტესტს მხარდაჭერას უცხადებს. ამის შესახებ მან დღეს Twitter-ზე დაწერა.
„მხარს ვუჭერ საქართველოს მწვანეებს და ადგილობრივ არასამთავრობო ორგანიზაციებს, რომლებიც საქართველოში ნამახვანი ჰესის მშენებლობას აპროტესტებენ“, – წერს ჰაიდი ჰაუტალა.
მოძრაობა „რიონის ხეობის გადარჩენისთვის“ აქტივისტები, სამოქალაქო საზოგადოების წევრები და მოქალაქეები 178-ე ღამეა, რიონის ხეობაში, კარვებში აპროტესტებენ ნამახვენჰესის მშენებლობას.
მათი მოთხოვნებია:
1. შეწყდეს 2019 წ. 25 აპრილს ხელმოწერილი ხელშეკრულება საქართველოს მთავრობასა და კომპანია „ენკა რინიუებლზს“ შორის მდინარე რიონზე დაგეგმილი ნამოხვანის ჰესების კასკადის მშენებლობის შესახებ და კომპანიამ დატოვოს რიონის ხეობა.
2. გაუქმდეს საქართველოს მთავრობის 2019 წლის 21 ნოემბრის #2405 განკარგულება „სახელმწიფო საკუთრებაში არსებული უძრავი ქონების შპს „ენკა რინიუებლზისათვის” აღნაგობის უფლებით გადაცემაზე თანხმობის მიცემისა და პირდაპირი მიყიდვის ფორმით პრივატიზების შესახებ.”
3. გაუქმდეს ნამოხვანის ჰესების კასკადზე 2015 წელს გაცემული სამშენებლო ნებართვა და ყველა სხვა მასზე დაფუძნებული დოკუმენტი.
4. თანამდებობიდან გადადგეს ეკონომიკისა და მდგრადი განვითარების მინისტრი ნათია თურნავა.
