განათლებისა და მეცნიერების სამინისტრო ეხმიანება 119-ე სკოლის გარშემო მიმდინარე მოვლენებს და კატეგორიულად უარყოფს გავრცელებულ ინფორმაციას იმის შესახებ, რომ თითქოს 119-ე სკოლის დირექტორის მოადგილე თეა ბრეგვაძე თანამდებობიდან პოლიტიკური ნიშნით გათავისუფლდა.
„ეს ინფორმაცია არის ტყუილი. პირველ რიგში, განვმარტავთ, რომ თეა ბრეგვაძე არასდროს ყოფილა 119-ე სკოლის დირექტორი, ის გახლდათ ამ სკოლის დირექტორის მოადგილე და დროებით ასრულებდა დირექტორის მოვალეობას.
მოგახსენებთ, რომ ქალაქ თბილისის N119 საჯარო სკოლის დირექტორს, პაატა რაზმაძეს, 2020 წლის 8 სექტემბერს ამოეწურა სამეურვეო საბჭოსთან დადებული შრომითი ხელშეკრულების 6-წლიანი ვადა, რის შემდეგ დირექტორის მოვალეობის შესრულება გააგრძელა დირექტორის მოადგილემ, თეა ბრეგვაძემ, როგორც დირექტორის არყოფნის, ან დირექტორის მიერ თავისი უფლებამოსილების განხორციელების შეუძლებლობის შემთხვევაში მართვის საინფორმაციო სისტემაში რეგისტრირებულმა პირმა.
სამინისტროს მიერ, მიმდინარე წლის 27 ოქტომბერს ქალაქ თბილისის 119-ე საჯარო სკოლის დირექტორის მოვალეობის შემსრულებლად დაინიშნა თამარ თაბუაშვილი. ზოგადი განათლების შესახებ კანონის თანახმად, დირექტორის არჩევა ან დირექტორის/დირექტორის მოვალეობის შემსრულებლის დანიშვნა იწვევს დირექტორის მოადგილის/მოადგილეების უფლებამოსილების ვადამდე შეწყვეტას, რაზეც ინფორმირებული იყო ქალბატონი თეა ბრეგვაძე. ამდენად, ქალბატონი თეა ბრეგვაძის მიერ, პოლიტიკური ნიშნით სპეკულაცია მოადგილის თანამდებობიდან გათავისუფლების საკითხის შესახებ, სრულიად უსაფუძვლოა. ასევე კატეგორიულად მიუღებელია განათლების სისტემაში მომუშავე ადამიანის მხრიდან სკოლაში სასწავლო პროცესის მიმდინარეობისთვის ხელისშეშლა და მოსწავლეთა და მასწავლებელთა პოლიტიკურ იარაღად გამოყენება“, – ნათქვამია სამინისტროს მიერ გავრცელებულ განცხადებაში.
თბილისის 119-ე საჯარო სკოლაში სასწავლო პროცესი დილიდან შეჩერებულია. მასწავლებლები და მშობლები დირექტორის მოვალეობის შემსრულებლის თანამდებობიდან გათავისუფლებას აპროტესტებენ.
თავად სკოლის დირექტორის მოვალეობის შემსრულებელი, თეა ბრეგვაძე მიიჩნევს, რომ სკოლიდან პოლიტიკური ნიშნით გაათავისუფლეს. ის ამბობს, რომ გლდანში ენმ-ის წარდგენილი კანდიდატის ნათესავია და მას „ქართული ოცნების“ მხარდამჭერით ანაცვლებენ.
„დიახ, ზუსტადაც, ეს უკავშირდება მოახლოებულ მეორე ტურს, მე გახლავართ გლდანის რაიონის გამგეობის კანდიდატის დეიდა, რომელიც წარადგინა „ნაციონალურმა მოძრაობამ“ და მოვალეობის შემსრულებლად ამ ეტაპზე უშვებენ პიროვნებას, რომელიც არის „ქართული ოცნების“ მხარდამჭერი.
მეც და ის პიროვნებაც, რომელმაც უნდა გააგრძელოს დღეიდან მოვალეობის შესრულება, ვაკმაყოფილებთ ერთსა და იმავე მოთხოვნებს. მებადება კითხვა, რატომ მიწყდება მე უფლებამოსილება და რატომ უგრძელდება მას, როცა ვაკმაყოფილებთ ერთსა და იმავე მოთხოვნებს.
ჩვენ ძალიან ბევრი კითხვა გვაქვს, რომ მოვიდოდა დირექტორი. მოლოდინი ყოველთვის გვქონდა და ველოდებოდით გამოცდაჩაბარებულ, სერტიფიცირებულ კონკურსგავლილ დირექტორს”, – ამბობს „ფორმულას“ ეთერში თანამდებობიდან გათავისუფლებული დირექტორის მოვალეობის შემსრულებელი, თეა ბრეგვაძე.
