დღეს თბილისში რუსთაველის გამზირზე ბელარუსში მიმდინარე დემონსტრაციების მხარდამჭერი აქცია გაიმართა. სოლიდარობის აქციაში საქართველოს მოქალაქეებთან ერთად ბელარუსის მოქალაქეებიც მონაწილეობდნენ.
„თავისუფლება ბელარუსს“, „სამართალი ბელარუსს“, „კანონით, ლუკაშენკო პრეზიდენტობის ყოფილი კანდიდატია და არა პრეზიდენტი“, – აქციის მონაწილეები ამ შინაარსის პლაკატებით გამოხატავდნენ ბელარუსში საპროტესტო გამოსვლებში მონაწილეებისადმი მხარდაჭერას.
ბელარუსში დემონსტრაციები ამ დრომდე გრძელდება. 9 აგვისტოს საპრეზიდენტო არჩევნებში ალექსანდრ ლუკაშენკომ მე-6 ვადით იყარა კენჭი. ის 1994 წლიდან მართავს ბელარუსს. მინსკის ცენტრში მოქალაქეები მას შემდეგ შეიკრიბნენ, რაც ეგზიტპოლის შედეგები გამოქვეყნდა. ნაციონალური ეგზიტპოლის მიხედვით, ბელარუსის მოქმედმა პრეზიდენტმა, ალექსანდრ ლუკაშენკომ ხმების თითქმის 80% მიიღო. არჩევნების დღეს ბელარუსში დააკავეს ჟურნალისტები, მანამდე კი სვეტლანა ტიხანოვსკაიას საარჩევნო შტაბის წარმომადგენლები. BBC-ის ინფორმაციით, არჩევნებს არცერთი საერთაშორისო დამკვირვებელი არ აკვირდებოდა. ოფიციალური მონაცემებით, საპროტესტო გამოსვლებში მონაწილე 3 000-მდე ადამიანია დაკავებული. სპეცრაზმელებსა და მოქალაქეების დაპირისპირებისას ერთი ადამიანი დაიღუპა. BBC-ის ცნობით, ბელარუსის საპროტესტო აქციების მეოთხე ღამეს პოლიციის წინასწარი დაკავების იზოლატორში მეორე დემონსტრანტი გარდაიცვალა.
