„მთავარი არხის“ გენერალური დირექტორი, ნიკა გვარამია აცხადებს, რომ კომპანია IPSOS-მა, რომელიც კვლევებს ატარებდა კონტრაქტი უხეშად და არაკეთილსინდისიერად დაარღვია. მისი განცხადებით, „მთავარი არხი“ წყვეტს პარტნიორობას კომპანიასთან.
ნიკა გვარამიას თქმით, კომპანიის არაკეთილსინდისიერი და არაპარტნიორული ქმედებები გასაჩივრდება კონტრაქტით დადგენილი საარბიტრაჟო წესით, სადაც ტელეკომპანია არა მხოლოდ გადახდილი თანხის უკან დაბრუნებას მოითხოვს, არამედ რეპუტაციული ზიანის ანაზღაურებას და ეგზიტპოლის გაუქმებით მიყენებული ზიანის ანაზღაურებასაც.
ასევე, ნიკა გვარამიას განცხადებაში ნათქვამია, რომ „მთავარი არხი“ ასევე მიმართავს შესაბამისი ქვეყნის საგამოძიებო ორგანოებს, მისი კონკრეტული მოქალაქის ქმედებებში შესაძლო კორუფციული დანაშაულის ნიშნების მოკვლევის დაწყების თაობაზე და ასევე, მის ტერიტორიაზე ჩადენილ კორუფციულ გარიგებაში საქართველოს მოქალაქის შესაძლო მონაწილეობის შესახებ.
ნიკა გვარამიას განცხადებას უცვლელად გთავაზობთ:
„1. ნარჩენი 4.4%ის გადანაწილება იმგვარად, რომ 49/51 მივიღოთ „ოცნების“ კანდიდატის სასარგებლოდ, იმედია, მარტივად გასაგებია, რომ აბსურდია, სულ რომ 4.4% მთლიანად წოწერიას დაემატოს (რაც უკვე სტატისტიკური აბსურდია). ჩვენთვის ციფრების მოწოდების შემდეგ, ერთადერთი შეკითხვა გაგვიჩდა ქალაქ ზუგდიდის მონაცემების შესაძლო ხარვეზზე, რაზეც მივიღეთ სატელეფონო განმარტება, რომ, სავარაუდოდ, ტექნიკური შეცდომაა და გვეხელმძღვანელა იმ მონაცემებით, რომლებიც მოგვიანებით გამოვაქვეყნეთ. ასევე, მივიღეთ განმარტება, რომ რაკიღა გამოქვეყნებამდე დრო მცირეა, შეფერხების თავიდან ასაცილებლად, დადასტურებად ჩავთვალოთ სატელეფონო თანხმობა, ხოლო ელექტრონული ფოსტით თანხმობას მივიღებდით პოსტფაქტუმ (აღნიშნულს არაერთხელ ჰქონია ადგილი ჩვენი პარტნიორობის განმავლობაში).
2. თუ გავაკეთებთ დაშვებას, რომ „მთავარმა არხმა“ გადაწყვიტა შედეგების გაყალბება. ჩნდება კითხვა: ჩვენი მიკერძოებული მიდგომა გავრცელდა მხოლოდ ქალაქ ზუგდიდზე, სადაც კონსენსუსია ქართულ საზოგადოებაში, რომ ოპოზიციური კანდიდატი ყველაზე დიდი უპირატესობით იგებს? სადაც სულ 2% დააკლდა ოპოზიციის კანდიდატს პირველ ტურში მოსაგებად და ყველაზე დიდი სხვაობა იყო „ნაცმოძრაობის“ კანდიდატსა და „ქართული ოცნების“ კანდიდატს შორის? და, ამის პარალელურად, მინიმალური სხვაობები (ცდომილების ფარგლებში) ხელუხლებელი დავტოვეთ ყველა სხვა ქალაქში და განსაკუთრებით, ყველაზე მნიშვნელოვან ადგილას, თბილისში – 3%ით უკან დავტოვეთ ოპოზიციის კანდიდატი?
3. ასეც რომ ყოფილიყო, იფსოსს არ აქვს უფლება, გამოაქვეყნოს რაიმე ინფორმაცია, ჩვენი თანხმობის გარეშე. თუ თვლის, რომ ან შეგვეშალა, ან გავაყალბეთ მონაცემი, წინასწარ უნდა შედგეს კომუნიკაცია ამ საკითხზე დაზუსტების მიზნით, რასაც ადგილი არ ჰქონია. თუ ეჭვს შეიტანდა ჩვენს კეთილსინდისიერებაში, პარტნიორ კომპანიას შეეძლო მხოლოდ დაუყოვნებლივ გაეწყვიტა კონტრაქტი.
4. იფსოსის საიტზე გამოქვეყნებულ შედეგებში მითითებული ცთომილების ზღვარი მერყეობს 4%დან 5% მდე. აღნიშნული კი თეორიულად შეუძლებელია და არაა დაშვებული ქართული კანონმდებლობით, რომლითაც ეს ზღვარი არ უნდა აღემატებოდეს 3%-ს. ცხადია, იფსოსმა იცის ეს მოთხოვნა და ის ყოველთვის კვლევის ტექნიკური პროტოკოლის ნაწილია. მათ მიერ გამოგზავნილი კვლევის მეთოდოლოგიაში ცთომილების ფარგლები მითითებულია კანონით მოთხოვნილ სამპროცენტიან ფარგლებში.
5. განცხადებაში ასევე განსხვავდება ინფორმაცია საველე სამუშაოს ჩატარების ვადების შესახებ იფსოსის მიერვე ჩვენთვის მოწოდებული ვადებისგან.
6. მნიშვნელოვან ეჭვს ბადებს და სრულიად გამაოგნებელია ის ფაქტი, რომ ტელეკომპანია მთავარი პარტნიორი კომპანიის პოზიციის თაობაზე ინფორმაციას იღებს „ქართული ოცნების“ ბრიფინგიდან. რუსული ყაიდის ოლიგარქიულ ქვეყანაში, რთული არაა იმის წარმოდგენა, თუ რასთან გვაქვს საქმე. ჩვენ გამოვთქვამთ საფუძვლიან ეჭვს, რომ ადგილი აქვს კორუფციულ გარიგებას. ბოლო საათებში ჩვენ ინტენსიურად ვიკვლევდით ამ საკითხს და მოვიპოვეთ კონკრეტული ინფორმაცია, დავადგინეთ პირი, რომელიც მთავარი ფიგურანტია ამ სიყალბეში და ჩვენს მიერ იდენტიფიცირებულია კონკრეტული მიზეზიც, რამაც განაპირობა ეს არაკეთილსინდისიერი ქმედება.
7. მთავარი არხი მიიჩნევს, რომ ამ მკაფიოდ არაპარტნიორული და უკიდურესად საეჭვო საქციელით, კომპანია იფსოსმა მოახდინა საკუთარი თავის აღუდგენელი დისკრედიტაცია. რეპუტაციაშელახული კომპანია კი ვეღარ იქნება ჩვენთვის სანდო და საიმედო პარტნიორი. მით უფრო, ქვეყნისთვის ამ ეგზისტენციალური მნიშვნელობის არჩევნების დროს და, მით უფრო, როცა ვსაუბრობთ ეგზიტპოლზე.
8. ბოდიშს ვუხდით იფსოსის ყველა კეთილსინდისიერ და უაღრესად კომპეტენტურ თანამშრომლებს, ვისთანაც თანამშრომლობა ჩვენთვის დიდი პატივი და უკიდურესად ეფექტიანი იყო. თუმცა, ვწუხვართ, რომ მათ ვერ შეძლეს ამ ტიპის ქმედებების შეჩერება და, მათ შორის, საკუთარი კომპანიის რეპუტაციის დაცვა არაკეთილსინდისიერი პირებისგან.
9. ზემოთქმულიდან გამომდინარე, ჩვენ ვწყვეტთ პარტნიორობას კომპანია იფსოსთან და ის აღარ ჩაატარებს ეგზიტპოლს მთავარი არხის სახელით.
10. სამწუხაროდ, ვაცნობიერებთ, რომ ეს სიყალბე სწორედ იმიტომაა ჩადენილი, რომ ჩვენი ეგზიტპოლი ჩაშლილიყო და აღარ არსებობდეს გაყალბების პრევენციის მთავარი მექანიზმი.
11. სამწუხაროდ, ისიც უნდა ითქვას, რომ პრაქტიკულად წარმოუდგენელია 2 დღეში ახალი მკვლევარი ორგანიზაციის დაკონტრაქტება. ეს კი მხოლოდ ხელისუფლების ინტერესებშია და სწორედ ამ მიზეზით მივიღეთ დივერსია არჩევნებამდე ერთი დღით ადრე. მიუხედავად ამისა, ვაცნობიერებთ რა, რომ ქართული იფსოსის ამგვარმა მოქმედებამ საფრთხის წინაშე დააყენა ქართული დემოკრატია, ინტენსიურად ვმუშაობთ ამ საკითხზე, რათა ხვალ, არჩევნებზე, მაინც შევძლოთ ეგზიტპოლის ჩატარება.
12. მთავარი არხი აცხადებს, რომ კომპანია იფსოსის ამგვარი არაკეთილსინდისიერი და არაპარტნიორული ქმედებები გასაჩივრდება კონტრაქტით დადგენილი საარბიტრაჟო წესით, სადაც ჩვენ არა მხოლოდ გადახდილი თანხის უკან დაბრუნებას მოვითხოვთ, არამედ რეპუტაციული ზიანის ანაზღაურებას და ეგზიტპოლის გაუქმებით მიყენებული ზიანის ანაზღაურებასაც.
13. მთავარი არხი ასევე მიმართავს შესაბამისი ქვეყნის საგამოძიებო ორგანოებს, მისი კონკრეტული მოქალაქის ქმედებებში შესაძლო კორუფციული დანაშაულის ნიშნების მოკვლევის დაწყების თაობაზე და ასევე მის ტერიტორიაზე ჩადენილ კორუფციულ გარიგებაში საქართველოს მოქალაქის შესაძლო მონაწილეობის შესახებ.
14. მთავარი არხი ასევე მოახდენს ყველა პარტნიორი ტელევიზიის, საერთაშორისო მედია და უფლებადაცვითი ორგანიზაციების, ასევე ქვეყნის შიგნით იფსოსის მომსახურებით მოსარგებლე კერძო კომპანიების ინფორმირებას მისი არასაიმედოობის, არაკეთილსინდისიერების და კორუფციულ გარიგებებში სავარაუდო მონაწილეობის თაობაზე”, – ნათქვამია ნიკა გვარამიას განცხადებაში.
27 ოქტომბერს, ტელეკომპანია „მთავარმა“ გამოაქვეყნა IPSOS-გლობალის ახალი კვლევის შედეგები. IPSOS-მა კვლევა „მთავარი არხის“ დაკვეთით დიდ ქალაქებში ჩაატარა, სადაც მოსახლეობას დაუსვა კითხვა – „მომდევნო შაბათს რომ არჩევნები ტარდებოდეს, მერობის რომელ კანდიდატს მისცემდით ხმას?”. ტელეკომპანია „მთავარის“ ინფორმაციით, კვლევის შედეგები დიდ ქალაქებში ასე გადანაწილდა.
28 ოქტომბერს პარტია „ქართული ოცნების“ თავმჯდომარემ, ირაკლი კობახიძემ განაცხადა, რომ კომპანია IPSOS-ის კვლევებში, როგორც წესი, მნიშვნელოვანი ცთომილებაა. კომენტარი გააკეთა ასევე პრემიერ-მინისტრმა, ირაკლი ღარიბაშვილმა და განაცხადა, რომ „არავითარი ნდობა არ აქვს ლევან თარხნიშვილის მიერ ჩატარებულ კვლევებს“.
მოგვიანებით პარტია „ქართული ოცნების“ ოფისში საგანგებო ბრიფინგი გაიმართა, სადაც პარტიის საზოგადოებასთან ურთიერთობის მდივანმა, შალვა პაპუაშვილმა განაცხადა, რომ „საზოგადოებას ამცნობენ ერთ-ერთი სკანდალის შესახებ, რომელშიც „ნაციონალური მოძრაობა“, „მთავარი არხი“ და კომპანია IPSOS გაეხვა”.
შალვა პაპუაშვილის თქმით, კომპანია IPSOS-ის ოფიციალურ გვერდზე გამოკითხვის შედეგებში სულ სხვა მონაცემებია მითითებული და „მთავარმა არხმა“ კი სხვა მონაცემები გამოაქვეყნა. მაგალითად, „მთავარი არხის“ მიერ გამოქვეყნებული მონაცემების თანახმად, ზუგდიდში მერობის კანდიდატების ხმები ასე გადანაწილდა: ანზორ მელია – 54.7%, მამუკა წოწერია – 45.3%. შალვა პაპუაშვილის თქმით, თავად კომპანიის გვერდიდან ჩამოტვირთულ ფაილში კი წერია, რომ 51%-ია მამუკა წოწერიას შემთხვევაში და 49% – ანზორ მელიას შემთხვევაში.
IPSOS-ის ცნობით, გამოკითხვა ჩატარდა 23-დან 27 ოქტომბრის ჩათვლით, შემთხვევითი შერჩევის პრინციპით, პირისპირ ინტერვიუს საშუალებით. გამოიკითხა 2 600, 18 წელს ზემოთ ასაკის რესპონდენტი, რომელსაც ამ ქალაქებში, არჩევნებში მონაწილეობის უფლება აქვს. ცდომილების მაქსიმალური ზღვარი სხვადასხვა ქალაქში განსხვავებულია, ზუგდიდის შემთხვევაში ცდომილების მაქსიმალური ზღვარია – 4.71%.
