2022 წლის იანვრიდან ფარმაცევტულ დაწესებულებებს ახალი სტანდარტის დაკმაყოფილება მოუწევთ

პუბლიკა

ჯანდაცვის სამინისტროში ფარმაცევტული დაწესებულებებისა და ასოციაციების წევრებთან შეხვედრა გაიმართა.

როგორც ჯანდაცვის სამინისტროს მიერ გავრცელებულ ინფორმაციაშია ნათქვამი, შეხვედრის მთავარი თემა, ქართულ ფარმაცევტულ ბაზარზე, კარგი საწარმოო პრაქტიკის (GMP) და კარგი სადისტრიბუციო პრაქტიკის (GDP)  სტანდარტის დანერგვაა. აქვე აღნიშნულია, რომ ინიციატივა საქართველოში წარმოებული მედიკამენტის ხარისხის მკვეთრად გააუმჯობესებს და გაზრდის ქვეყნის საექსპორტო პოტენციალსაც.

GMP და GDP სტანდარტების დაცვის მოთხოვნა 2022 წლის პირველი იანვრიდან შედის ძალაში.

ჯანდაცვის მინისტრმა, ეკატერინე ტიკარაძემ განმარტა, რომ აღნიშნულ სტანდარტზე გადასვლა მკვეთრად გააუმჯობესებს საქართველოში წარმოებული მედიკამენტების ხარისხს, რაც ასევე ქვეყნის საექსპორტო პოტენციალზეც აისახება.

„მრავალწლიანი გამოცდილება გვიჩვენებს, თუ რამდენად მნიშვნელოვანია ხარისხიანი წამალი, ხარისხიანი წამლის მიწოდება და მიწოდების პროცესის სწორი ზედამხედველობა. მაშინ, როდესაც ბევრი პოსტსაბჭოთა ქვეყანა აღნიშნულ სტანდარტზე 2014, ასევე 2019 წლებში გადავიდა, მნიშვნელოვანი არის, რომ ქართულმა ბიზნესმაც არ დაკარგოს მისი საექსპორტო წილი. შესაბამისად მნიშვნელოვანია რაც შეიძლება სწრაფი ნაბიჯებით და უსაფრთხოდ გადავიდეთ ჩვენც ამ სტანდარტზე“, – აღნიშნა ეკატერინე ტიკარაძემ.

შეხვედრაზე მხარეები შეთანხმდნენ, რომ შეიქმნება სამუშაო ჯგუფი, რომელიც ახალ GMP და GDP სტანდარტზე გადასვლის ტექნიკურ საკითხებს განიხილავს.

სამინისტროს ცნობით, GMP საერთაშორისო სტანდარტზე გადასვლა 2016 წლიდან იგეგმებოდა, თუმცა სისტემის დანერგვა, ფარმაცევტული დაწესებულებების თხოვნითა და მათთვის მოსამზადებელი პერიოდის გახანგრძლივების მიზნით ჯერ 2018 წლის პირველ იანვრამდე გადაიდო, მოგვიანებით კი, 2019 წლის პირველი ივლისიდან 2022 წლის პირველ იანვრამდე გარდამავალი პერიოდი განისაზღვრა.

კარგი საწარმოო და სადისტრიბუციო პრაქტიკის სტანდარტის დანერგვა 2022 წლის პირველი იანვრიდან გახდება სავალდებულო.

GMP/GDP-ის დანერგვით საქართველო აღიარებს ევროკავშირის სტანდარტებს ფარმაცევტული პროდუქტების ხარისხის კონტროლის მიმართულებით.