ნიკა კვარაცხელიას მკვლელობაში ბრალდებულ 2 პირს თბილისის საქალაქო სასამართლომ აღკვეთის ღონისძიების სახით პატიმრობა დაუწრებლად შეუფარდა. მომდევნო პროცესი 15 ნოემბერს ჩაინიშნა.
18 სექტემბერს შინაგან საქმეთა სამინისტროში განაცხადეს, რომ კვარაცხელიას მკვლელობისთვის 2 პირს ეძებენ.
შსს-ს ვერსიით, 21 და 22 წლის პირები ნიკა კვარაცხელიას მკვლელობის განზრახვით წინასწარ შემუშავებული გეგმით მოქმედებდნენ.
„კერძოდ, მიმდინარე წლის 15 სექტემბერს აღნიშნული პირები ნაქირავები ავტომანქანით თბილისში, ვერიკო ანჯაფარიძის ქუჩაზე მივიდნენ და ნ.კ.-ს ჩაუსაფრდნენ.
საქმეზე მოპოვებული მტკიცებულებებით, ასევე დადგინდა, რომ ა.ჭ.-მ ნ.კ.-ს მიმართ ცეცხლსასროლი იარაღიდან 10-ზე მეტი გასროლა განახორციელა და შემთხვევის ადგილიდან გ.კ.-სთან ერთად, ნაქირავები ავტომანქანით მიიმალა.
სხეულზე მიყენებული დაზიანებებით ნ.კ. საავადმყოფოში მიყვანის შემდეგ გარდაიცვალა.
გამოძიება საქართველოს სისხლის სამართლის კოდექსის 108-ე მუხლით და 236-ე მუხლის მე-3 და მე-4 ნაწილებით მიმდინარეობს.
ა.ჭ.-ს და გ.კ.-ს ადგილსამყოფელის დადგენის და მათი დაკავების მიზნით ტარდება კომპლექსური ოპერატიულ-სამძებრო და საგამოძიებო მოქმედებები“, – ვკითხულობთ განცხადებაში.
