სააკაშვილის მკურნალობა პოლიტიკური კონიუნქტურით არ უნდა გადაწყდეს - NGO-ები

საქართველოს მესამე პრეზიდენტის მიხეილ სააკაშვილის მკურნალობასთან დაკავშირებით არასამთავრობო ორგანიზაციების ნაწილი განცხადებას ავრცელებს.

NGO-ები აცხადებენ, რომ არსებული ცნობებით, მიხეილ სააკაშვილის ჯანმრთელობის მდგომარეობა გაუარესდა და შემდგომი მკურნალობის საკითხი არა პოლიტიკური მიზანშეწონილების, არამედ მხოლოდ ადამიანის სიცოცხლისა და ჯანმრთელობის დაცვის სტანდარტების გათვალისწინებით უნდა გადაწყდეს.

„ბოლო დღეეებში გავრცელებული ინფორმაციის თანახმად, მიხეილ სააკაშვილის სამედიცინო მდგომარეობა კიდევ უფრო დამძიმებულია და საჭიროებს მყისიერ რეაგირებას. ექსპრეზიდენტის მდგომარეობის დამძიმებას ადასტურებენ ვიზიტორებიც. სააკაშვილის ჯანმრთელობის მდგომარეობას ხაზს უსვამენ საერთაშორისო პარტნიორები და საქართველოს პრეზიდენტი.

პრეზიდენტმა სალომე ზურაბიშვილმა აღნიშნა, რომ მიხეილ სააკაშვილის მდგომარეობის მნიშვნელოვანი დამძიმების შესახებ დასკვნის არსებობის შემთხვევაში, სამკურნალოდ მისი უცხოეთში გადაყვანა არის “სწორი გზა, სხვა გზა არ არსებობს“.

სამწუხაროდ, ხელისუფლების მხრიდან ხსენებულ განცხადებას პოლიტიკური შინაარსის პასუხები მოყვა, რაც ეწინააღმდეგება ადამიანის უფლებების დაცვის კუთხით სახელმწიფოს მიერ ნაკისრ ვალდებულებებს.

ამრიგად, მოვუწოდებთ ხელისუფლებასა და გადაწყვეტილების მიმღებ ყველა პირს, მიხეილ სააკაშვილის შემდგომი მკურნალობის, მათ შორის – საზღვარგარეთ გადაყვანის საჭიროების საკითხზე მსჯელობისას, იხელმძღვანელოს ექსპერტთა დასკვნებში მითითებული ინფორმაციისა და რეკომენდაციების მიხედვით და არა პოლიტიკური კონიუნქტურის გათვალისწინებით, რათა სრულად გამოირიცხოს ჯანმრთელობის შემდგომი დამძიმებისა და სიცოცხლის ხელყოფის რისკები“, – ნათქვამია განცხადებაში, რომელსაც ხელს აწერენ ორგანიზაციები:

• ფონდი „ღია საზოგადოება საქართველო“;
• „საქართველოს დემოკრატიული ინიციატივა“;
• „ფსიქოსოციალური და სამედიცინო რეაბილიტაციის ცენტრი“;
• „პრევენცია პროგრესისთვის“;
• „ადამიანის უფლებათა ცენტრი;
• „საქართველოს სასამართლოს გუშაგი“;
• „დემოკრატიის კვლევის ინსტიტუტი“;
• „სოციალური სამართლიანობის ცენტრი“;
• საქართველოს ახალგაზრდა იურისტთა ასოციაცია;
• „სამართლიანი არჩევნებისა და დემოკრატიის საერთაშორისო საზოგადოება“;
• „მედიის განვითარების ფონდი“;
• „მწვანე ალტერნატივა“;
• „ეკონომიკური პოლიტიკის კვლევის ცენტრი“.