„მინდა, მშობლებს ვთხოვო, კიდევ ერთხელ და მოვუწოდო, რომ გავაგრძელოთ შეთანხმებები და ყველა ის პროცესი, რომლებიც აუცილებელია ამ იშვიათი დაავადებების მკურნალობისა და მეთოდების ქვეყანაში დასანერგად. გავაგრძელოთ სამინისტროში, სამუშაო მაგიდასთან, ყველა იმ ფორმატში, რომელთა მეშვეობითაც ჩვენ ვცდილობთ, ამ დაავადებას მივხედოთ და პრობლემები მოვაგვაროთ და ის, რაც დღეს და გასული დღეების განმავლობაში ხდება თვითონაც ხედავენ, რომ ეს არანაირად არ წაადგება ამ საქმეს“, – ამის შესახებ ჯანდაცვის მინისტრმა ზურაბ აზარაშვილმა აქონდროპლაზიის დიაგნოზის მქონე ბავშვების მშობლების პროტესტის შესახებ საუბრისას მთავრობის სხდომის დასრულების შემდგომ განაცხადა.
მინისტრი ამბობს, რომ „ხმაურის და დაძაბულობის ფონზე ძალიან ძნელია“ პროცესი გაგრძელდეს. მისივე თქმით, „მხარეები ძალიან ხშირად აღნიშნავენ, რომ ეს პროცესი არ უნდა მიმდინარეობდეს ასეთი პროტესტის ფონზე“, სამინისტრო და დაინტერესებული მხარეები უნდა იყვნენ კონსტრუქციულ ფორმატში.
აზარაშვილის თქმით, ჯანდაცვის სამინისტროს არასდროს უთქვამს უარი აქონდროპლაზიის მკურნალობასთან დაკავშირებით და ასევე არასდროს გაუკეთებიათ აქცენტი იმაზე, რომ დაფინანსებასთან დაკავშირებით რაიმე სახის პრობლემაა.
„ჩვენი სამინისტრო არცერთი დღე არ შეჩერებულა ამ მიმართულებით და რამდენიმე მხარესთან აქვს უწყვეტი კომუნიკაცია. თქვენ იცით, რომ არსებობს სხვადასხვა სამუშაო ჯგუფი, როგორც უწყებათაშორისი საბჭოს ფორმატში, ასევე პროტოკოლის ჯგუფი. ასევ თხოვნა იყო რამდენიმე დღის წინ მშობლების მხრიდან, რომ ჩართულიყვნენ ამ ჯგუფებში. რასაკვირველია, უწყებათაშორისი საბჭო იშვიათ დაავადებებს შეეხება და ათობით იშვიათი დაავადება გვაქვს ქვეყანაში. სხვადასხვა დაავადებაზე უწევს საბჭოს მსჯელობა. იმ ფორმატში, როდესაც ამ კონკრეტული იშვიათი დაავადების ირგვლივ იქნება მსჯელობა, რასაკვირველია, მოვიწვევთ (მშობლებს). და ის სამი მშობელი, რომლებიც მათ წარმოგვიდგინეს, აუცილებლად იქნებიან ამ საბჭოს მსჯელობის ფორმატში. ასევე, პროტოკოლის შექმნის ჯგუფში გამოვთქვით მზაობა, რომ იყვნენ მშობლები. დაინტერესებული მხარეები არიან და არანაირი შეფერხება ჩვენი მხრიდან არ იქნება”, – აცხადებს აზარაშვილი.
აქონდროპლაზიის მქონე ბავშვთა მშობლები 10 დღეზე მეტია, მთავრობის ადმინისტრაციასთან საპროტესტო აქციას მართავენ. მათი მოთხოვნაა, სახელმწიფომ საქართველოში შემოიტანოს და დააფინანსოს ბავშვებისთვის აუცილებელი პრეპარატი Voxzogo, რომელიც ავტორიზებულია აშშ-ის წამლისა და საკვების ადმინისტრაციის (FDA), ასევე ევროპის წამლის სააგენტოს (EMA) მიერ.
