აშშ-ის ახალარჩეულმა პრეზიდენტმა, დონალდ ტრამპმა დააანონსა, რომ თეთრი სახლის აპარატის ხელმძღვანელად, მისი საარჩევნო კამპანიის ერთ-ერთ მენეჯერს, სუზი უაილსს დანიშნავს.
Reuters-ის ცნობით, 67 წლის სუზი უაილსი პირველი ქალი იქნება, რომელიც თეთრი სახლის აპარატის უფროსის თანამდებობას დაიკავებს.
მედიის ინფორმაციით, თეთრი სახლის აპარატის ხელმძღვანელს დიდი გავლენა აქვს. ის, როგორც პრეზიდენტის „კარიბჭე”, მართავს თეთრი სახლის პერსონალს, აორგანიზებს პრეზიდენტის ღონისძიებებსა და განრიგს და, ასევე, კონტაქტშია სხვა სამთავრობო დეპარტამენტებთან და კანონმდებლებთან.
„სუზი ძლიერი, ჭკვიანი, ნოვატორული, საყოველთაოდ აღმაფრთოვანებელი და პატივცემულია. ის დამეხმარა ამერიკის ისტორიაში ერთ-ერთი უდიდესი პოლიტიკური გამარჯვების მიღწევაში და 2016 და 2020 წლებში ჩემი წარმატებული კამპანიის განუყოფელი ნაწილი იყო.
სუზი გააგრძელებს დაუღალავად მუშაობას, რათა ამერიკა კვლავ დიადი გახდეს. პატივია, რომ სუზი შეერთებული შტატების ისტორიაში თეთრი სახლის აპარატის პირველი ქალი ხელმძღვანელი იქნება. ეჭვი არ მეპარება, რომ ის ჩვენს ქვეყანას ამაყს გახდის […]
ჩვენ მას ყინულის ქალწულს ვეძახით”, – განაცხადა ტრამპმა.
როგორც „როიტერი“ წერს, სუზი უაილსი რონალდ რეიგანის 1980 წლის საპრეზიდენტო შტაბში მუშაობდა, 2018 წელს კი რესპუბლიკელ გუბერნატორს, რონ დესანტისს, ფლორიდაში არჩევნების მოგებაში დაეხმარა.
უაილსი 2016 და 2020 წლების არჩევნებზე ტრამპის წინასაარჩევნო კამპანიების უფროსი მრჩეველი იყო.
