საპროტესტო აქციების აქტიური მონაწილის, ბაია მარგიშვილის თქმით, მის მიმართ სასამართლოს უპატივცემულობის მუხლით სისხლისსამართლებრივი დევნა დაიწყო. ეს ინფორმაცია „პუბლიკას“ დაუდასტურა საზოგადოებრივმა ადვოკატმაც.
რაც შეეხება შემთხვევას, „პუბლიკა“ ამ ინფორმაციას პროკურატურასთან აზუსტებს. სავარაუდოდ, საქმე ეხება 2025 წლის 7 ნოემბერს ადმინისტრაციული საქმის განხილვაზე მომხდარს.
2025 წლის 7 ნოემბერს მოსამართლე ზვიად ცეკვავა ბაია მარგიშვილის გზის გადაკეტვის საქმეს განიხილავდა. სხდომის მიმდინარეობისას ბაია მარგიშვილმა საქმის მასალები დახია და მოსამართლის წინ მაგიდაზე დაყარა. ცეკვავამ ის 200 ლარით დააჯარიმა და დარბაზიდან გააძევა, მოგვიანებით კი 14 დღე შეუფარდა. ბაია მარგიშვილი სასამართლოს ეზოში დააკავეს.
სისხლის სამართლის კოდექსის 366-ე მუხლი, რომელიც სასამართლოს უპატივცემულობას გულისხმობს, 2 წლამდე თავისუფლების აღკვეთას, ჯარიმას ან გამასწორებელ სამუშაოებს ითვალისწინებს.
