სუსის ცნობით, დააკავეს 2 პირი, რომელთაც ქარელისა და მარნეულის მუნიციპალიტეტების ბაგა-ბაღებში საქონლის ხორცის ნაცვლად, მოტყუებით, ცხენის ხორცი შეჰქონდათ.
„გამოძიებით დადგინდა, რომ კომპანიებს – „ბი.ჯი.ემ.1“-სა და ,,ქართული ხორც-პროდუქტების ფერმას“ მოგებული ჰქონდათ ა(ა)იპ „მარნეულის მუნიციპალიტეტის ტერიტორიაზე არსებული ბაგა-ბაღების გაერთიანებისა“ და ა(ა)იპ „ქარელის მუნიციპალიტეტის ტერიტორიაზე არსებული ბაგა-ბაღების გაერთიანების“ მიერ გამოცხადებული ტენდერები, რომელთა ფარგლებშიც ევალებოდათ საბავშვო ბაღებისთვის საქონლის ხორცის მიწოდება.
აღნიშნული კომერციული ორგანიზაციების დირექტორებმა, 2026 წლის მაისში, საბავშვო ბაღებში საქონლის ხორცის ნაცვლად, მოტყუებით, შეიტანეს ცხენის ხორცი და შედეგად, თაღლითურად დაეუფლნენ სახელმწიფო ბიუჯეტის კუთვნილ დიდი ოდენობით თანხას“, – ნათქვამია სუსის განცხადებაში.
უწყების ცნობით, გამოძიება სსსკ-ის 180-ე მუხლის მესამე ნაწილის „ბ“ქვეპუნქტით, ასევე 197-ე მუხლის პირველი ნაწილით მიმდინარეობს, რაც სასჯელის სახით 6-დან 9 წლამდე ვადით თავისუფლების აღკვეთას ითვალისწინებს.
შპს „ბი.ჯი.ემ.1“-ის მფლობელი და დირექტორი არჩილ დალაქიშვილია. ხოლო შპს ,,ქართული ხორც-პროდუქტების ფერმის“ მფლობელი და დირექტორი – მამუკა მენთეშაშვილი. კომპანია 2025 წლის დეკემბერში დაფუძნდა. აქამდე კომპანიის წილებს მამუკა მენთეშაშვილი და ბესიკ კახიძე ინაწილებდნენ. მოგვიანებით, 2026 წლის ივნისში, კახიძემ თავისი 60%-იანი წილი მენთეშაშვილს უსასყიდლოდ გადასცა.
