თბილისის ინფექციური საავადმყოფოს კლინიკური დირექტორის, მარინა ეზუგბაიას განცხადებით, 25 ახალადადსტურებული ინფიცირებულიდან ერთის ინფიცირების წყარო, ე.წ. გაჩიანის წყაროა, 16 დადასტურებულ შემთხვევასთან კონტაქტია, ერთი სამედიცინო პერსონალია, 5 კი იმპორტირებული შემთხვევაა. ერთი პაციენტი აფხაზეთიდანაა გადმოყვანილი, ერთის დაინფიცირების წყაროსა და კონტაქტებს ჯერ ისევ იკვლევენ.
რაც შეეხება უშუალოდ ინფექციურ კლინიკაში მოთავსებულ პაციენტებს, მარინა ეზუგბაიას განცხადებით, კლინიკაში შეყვანილია 6 ახალი პაციენტი.
„6 ახალი დადასტურებული შემთხვევის კონფიგურაცია ასეთი გახლავთ: 3 არის დადასტურებულ შემთხვევასთან კონტაქტი, ერთი – აფხაზეთიდან გადმოყვანილი და ორიც საკარანტინო სივრცეში დადასტურებული შემთხვევა გახლავთ.
დღევანდელი მონაცემებით, ჩვენს კლინკაში 2 მძიმე პაციენტია, როგორც თვითონ კოვიდის მიმდინარეობით, ასევე თან არსებული დაავადების გათვალისწინებით. ჯერჯერობით მათი მდგომარეობა მძიმეა, მაგრამ სტაბილური, პროგრესირება არ შეინიშნება. დანარჩენი პაციენტები საშუალო სიმძიმისაა, გვყავს რამდენიმე მსუბუქი“, – განაცხადა ეზუგბაიამ.
საკარანტინო სივრცეში დაინფიცირებულთაგან, 2 პაციენტი ბათუმში დაფიქსირდა. მათგან ერთი გუშინ საღამოს თბილისში გადმოიყვანეს, მეორეს კი ბათუმის რესპუბლიკურ კლინიკაში ელოდებიან.
ბათუმის რესპუბლიკური კლინიკის დირექტორის, გია კიკაბიძის განცხადებით, ერთ-ერთს თან ბავშვი ახლდა, რომელსაც კორონავირუსი არ დაუდასტურდა.
საქართველოში კორონავირუსით ინფიცირების 25 ახალი შემთხვევა გამოვლინდა და ინფიცირების შემთხვევათა რაოდენობა, ჯამში, 1250-მდე გაიზარდა. გამოჯანმრთელდა კიდევ 10 ადამიანი.
StopCov.ge-ზე განახლებული მონაცემები ასეთია:
- კორონავირუსის დადასტურებული შემთხვევა – 1 250;
- აქედან გამოჯანმრთელებული – 1 010;
- გარდაცვლილი – 17;
- კარანტინის რეჟიმში – 7 068;
- სტაციონარში მეთვალყურეობის ქვეშ – 242;
- *უცხოეთიდან სამკურნალოდ გადმოყვანილი საქართველოს მოქალაქე – 41;
