მარტვილში პეტრე ცაავას შემცვლელი ეპისკოპოსი გრიგოლ კაცია ჩავიდა. ის მარტვილში სხვა მეუფეებთან ერთად იმყოფება და როგორც ჟურნალისტებს განუცხადა, ჭყონდიდის ეპარქიის სასულიერო პირებთან გეგმავს შეხვედრას. მისივე თქმით, ის დარჩება ეპარქიაში და კვირას წირვას აღავლენს.
„დაველაპარაკები აქ მყოფებს. ვისაც უნდა დარჩეს და ვისაც უნდა იყოს მეუფესთან(პეტრესთან)“ – განაცხადა ეპისკოპოსმა გრიგოლ კაციამ.
გუშინ სინოდის გადაწყვეტილებით, მეუფე პეტრე ცაავა მღვდელმთავრობიდან გადააყენეს. მეუფე პეტრემ მიტროპოლიტის უფლებამოსილების შეჩერების შემდეგ განაცხადა, რომ გათავისუფლების „მიზეზი საქართველოს ეკლესიაში მამათმავლობის მხილებაა“.
საქართველოს საპატრიარქო გრიგოლ კაციას ბიოგრაფიას აქვეყნებს:
დაიბადა ქ. სოხუმში ექიმის ოჯახში. 1972 წელს.
მამა: ვლადიმერ გრიგოლის ძე კაცია, ექიმი-ქირურგი.
დედა: ლუდმილა დავითის ასული რუხაია, ექიმი-სტომატოლოგი.
1982 წელს მოინათლა სოხუმის საკათედრო ტაძარში.
1989 წელს დაამთავრა ქ. სარატოვის საშუალო სკოლა, ხოლო 1995 წელს სარატოვის სამედიცინო უნივერსიტეტი.
1997 წელს ჩაირიცხა ქ. მოსკოვის ასპირანტურაში _ სისხლძარღვთა და გულის ქირურგიის სამეცნიერო ცენტრში.
2000 წლის 29 ოქტომბერს დაიცვა საკანდიდატო დისერტაცია თემაზე: ,,გულის იშემიური დაავადების ქირურგიული მკურნალობა” და მიენიჭა მედიცინის მეცნიერებათა კანდიდატის ხარისხი.
2004 წლის 7 მაისს დაიცვა სადოქტორო დისერტაცია და მიენიჭა მედიცინის მეცნიერებათა დოტქორის წოდება.
2005 წელს საქართველოში დაბრუნდა.
2005-2010 წლებში სწავლობდა თბილისის სასულიერო აკადემიაში.
2010 წლის 26 აგვისტოს სიონის ყოვლადწმინდა ღვთისმშობლის მიძინების სახელობის საპატრიარქო ტაძარში ბერად აღიკვეცა და სახელად გრიგოლი ეწოდა.
2010 წლის 28 აგვისტოს ამავე ტაძარში ეკურთხა დიაკვნად და განმწესდა თბილისის ყოვლადწმინდა სამების სახელობის საპატრიარქო ლავრაში.
2010 წლის 14 ნოემბერს უწმინდესმა და უნეტარესმა ილია II-მ მღვდლად დაასხა ხელი და დაადგინა თბილისის მამა დავითის წმ. დავით გარეჯელის სახელობის მამათა მონასტერში.
2013 წლის 11 ოქტომბერს საქართველოს ეკლესიის წმინდა სინოდის სხდომაზე გამოარჩიეს ეპისკოპოსად.
მისი კურთხევა მოხდა 2013 წლის 4 დეკემბერს სვეტიცხოვლის თორმეტი მოციქულის სახელობის საპატრიარქო ტაძარში.
2015 წლის 13 იანვრიდან იგი აგარაკ-წალკის ეპარქიის მმართველია.
