ბათუმში სადარბაზოს ნგრევის შედეგად დაავებული 37 წლის კაცის შესახებ „მედცენტრის“ ექიმმა ჯემალ გენაშვილმა მედიას განახლებული ინფორმაცია მიაწოდა.
„პაციენტის მდგომარეობა რჩება მძიმე, თუმცა კონტროლირებადი. მას გუშინ ჩაუტარდა ანალიზები, კონსულტაციები, დიაგნოსტირდა პაციენტი – სუნთქვის მწვავე უკმარისობა, ხანგრძლივი ზეწოლის სინდრომი, დაუზუსტებელი შოკი, ამ დიაგნოზებით აგრძელებს პაციენტი რეანიმაციაში მკურნალობას. ის მართვით სუნთქვზე რჩება. შემოყვანის შემდეგ მისი მდგომარეობა არ გართულებულა“, – განაცხადა ექიმმა.
ექიმის ინფორმაციით, პაციენტს აღენიშნება მოტეხილობები.
ნანგრევებიდან მაშველებმა 37 წლის კაცი დაახლოებით ღამის 11 საათზე ამოიყვანეს.
ბათუმში სადარბაზოს ნგრევის შედეგად ამ დრომდე არსებული ინფორმაციით, დაიღუპა 5 ადამიანი. შსს-მ მიმდინარე გამოძიების ფარგლებში 3 პირი დააკავა.
სამძებრო-სამაშველო ღონისძიებები კვლავ გრძელდება.
