პოლიტიკურმა პარტიამ „ჩვენი საქართველო – სოლიდარობის ალიანსი“ თბილისის 8 მაჟორიტარულ ოლქში კანდიდატები წარადგინა. პრეზენტაცია ვერის ბაღში გაიმართა.
- ბექა ნაცვლიშვილი – ვაკის სამაჟორიტარო ოლქი;
- ჯაბა ჯიშკარიანი – მთაწმინდა-კრწანისის ოლქი;
- ლევან გოგიჩაიშვილი – საბურთალოს ოლქი;
- გედევან ფოფხაძე – დიდუბე-ჩუღურეთის ოლქი;
- რამაზ ბლუაშვილი – ისნის ოლქი;
- ზვიად თავაძე – ნაძალადევის ოლქი;
- ლაშა გიორგაძე – გლდანის ოლქი;
- ალექსანდრე რიჟამაძე – სამგორის საარჩევნო ოლქი;
პარტიის პრესსამსახურის ინფორმაციით, პრეზენტაციაზე პარტიის გენერალურმა მდივანმა მარიამ ჯაშმა წარმოადგინა მიზნები, რომელთა შესრულებას პარტია მოსახლეობას არჩევნებში გამარჯვების შემდეგ ჰპირდება.
- „საქართველოში დაწესდება მინიმალური ხელფასი 500 ლარის ოდენობით და ღირსეული შრომის პირობები შეექმნება ყველა ჩვენს მოქალაქეს და ამოქმედდება უმუშევრობის დაზღვევის სისტემა.
- 500 000 ადამიანს, რომელსაც დღეს 1000 ლარზე ნაკლები შემოსავალი აქვს, გაუნახევრდება 20%-იანი საშემოსავლო გადასახადი.
- ყველა დევნილს ექნება საკუთარი ბინა და არც ერთი ოჯახი არ დარჩება ხელმისაწვდომი ღირსეული საცხოვრებლის გარეშე.
- გაძლიერდება მრეწველობა და სოფლის მეურნეობა.
- გაიზრდება ინვესტიციები განათლებაში, მეცნიერებასა და კულტურაში.
- პენსიონერებისათვის გაიაფდება წამლები და მათ მიეცემათ საშუალება, რომ კვლავაც აქტიურად იყვნენ ჩართული საზოგადოებრივ ცხოვრებაში.
- შეიქმნება პირობები, რომ საზღვარგარეთ მცხოვრებ ჩვენ თანამემამულეებს გაუმარტივდეთ ცხოვრება და საქართველოში დაბრუნება.
- ხელახლა მოხდება უზენაესი სასამართლოს წევრების არჩევა და გადაიხედება ყველა იმ ოჯახის საპროცესო შეთანხმება, რომელთაც უკანონოდ ჩამოერთვა ქონება და ბიზნესი 2004 წლიდან.
- დაჩქარდება საქართველოს ევრო-ატლანტიკურ სტრუქტურებში ინტეგრაცია.
- დეოკუპაციის გზაზე სახალხო დიპლომატიის გაძლიერებით ხელი შეეწყობა „დიდ შერიგებას“ აფხაზ და ოს ოჯახებთან“, – ნათქვამია პრესსამსახურის მიერ გავრცელებულ რელიზში.
