ესტონეთის საგარეო საქმეთა სამინისტრო “ევროპული საქართველოს” ერთ-ერთი ლიდერის, გიგი უგულავას დაკავებასთან დაკავშირებით განცხადებას Twitter-ზე ავრცელებს.
„შეშფოთებით ვადევნებთ თვალს უზენაესი სასამართლოს მიერ გიგი უგულავას წინააღმდეგ გამოტანილ გადაწყვეტილებას.
გამოტანილი განაჩენის გარშემო არსებული გარემოებები ხელს უშლის პოლიტიკური სიტუაციის პოლარიზაციის შემცირების შესახებ ბევრად უფრო საჭირო დიალოგის გაგრძელებას საქართველოში“,-ნათქვამია განცხადებაში.
We are following the recent ruling by the Georgian Supreme Court against Gigi #Ugulava with concern.
The circumstances around this verdict are not conducive to advancing the political dialogue aimed at a much needed depolarisation of the political situation in #Georgia. https://t.co/gryR26lcnK
— Estonian MFA (@MFAestonia) February 12, 2020
10 თებერვალს გამოტანილი გადაწყვეტილებით, „ევროპული საქართველოს“ ლიდერსა და თბილისის ყოფილ მერს, გიგი უგულავას უზენაესმა სასამართლომ 3-წლიანი პატიმრობა მიუსაჯა. უგულავას საქმეზე გადაწყვეტილება ზეპირი მოსმენის გარეშე გამოცხადდა.
გიგი უგულავას ხელახლა დაპატიმრებას არაერთი კრიტიკული გამოხმაურება მოჰყვა. სასამართლოს გადაწყვეტილების გამოცხადებიდან რამდენიმე საათში აშშ-ის რესპუბლიკელი კონგრესმენი, საქართველოს მხარდამჭერი ჯგუფის თანათავმჯდომარე, ადამ კინზინგერი გამოეხმაურა.
„იმის თქმა, რომ ეს მხოლოდ შემაშფოთებელია, რბილი შეფასება იქნება. სასამართლოს გამოყენება იარაღად არ არის დემოკრატია“, – წერდა Twitter-ზე ადამ კინზინგერი.
კინზინგერის განცხადებიდან რამდენიმე საათში უგულავას დაპატიმრება გააკრიტიკა სენატორმა ჯიმ რიშმაც, რომელიც საგარეო საქმეთა კომიტეტის თავმჯდომარეა. „როგორც საქართველოს საგარეო საქმეთა მინისტრს გასულ კვირას გამართულ შეხვედრაზე ვუთხარი, სასამართლოს დამოუკიდებლობის კოლაფსი და ოპოზიციის დევნა მიუღებელი ქცევაა“, – წერდა Twitter-ზე სენატორი რიში.
ამერიკელ პოლიტიკოსებთან ერთად პოზიცია საქართველოში აშშ-ის საელჩომაც გამოხატა. როგორც საელჩო წერდა, იმედგაცრუებულია იმით, რომ ოპოზიციის ლიდერის მიმართ გუშინ გამოტანილი განაჩენისა და თავისუფლების აღკვეთის დრო და კონტექსტი ოპოზიციისა და ხელისუფლების დიალოგს რისკის ქვეშ აყენებს.
შეშფოთება გამოთქვა ლიეტუვის საგარეო საქმეთა მინისტრმა ლინას ლინკევიჩუსმაც და განაცხადა, რომ მოახლოებული საპარლამენტო არჩევნები „ლაკმუსის ქაღალდი“ იქნება.
უგულავას დაკავება გააკრიტიკეს იმ ქართველმა პოლიტიკოსებმაც, რომლებიც წარსულში „ქართული ოცნების“ წევრები ან გიგი უგულავასთან დაპირისპირებულები იყვნენ. მათ შორის, გიორგი მარგველაშვილმა, თამარ ჩუგოშვილმა, გიორგი კვირიკაშვილმა და ალექსანდრე ელისაშვილმა.
