უკრაინის პრეზიდენტი ვოლოდიმირ ზელენსკი აზერბაიჯანში ვიზიტით იმყოფება.
ის პრეზიდენტ ილჰამ ალიევს პირისპირ შეხვდა, რის შემდეგაც მედიასთან განცხადებები გაკეთდა.
როგორც აზერბაიჯანის პრეზიდენტმა განაცხადა, შეხვედრაზე შეთანხმდნენ, რომ მომდევნო შეხვედრა უკრაინაში გაიმართება. ალიევის თქმით, პრეზიდენტებმა გაცვალეს მოსაზრებები და კიდევ ერთხელ დადასტურდა ორი ქვეყნის სერიოზული თანამშრომლობა.
„იმ საკითხებს შორის, რომლებსაც დღეს განვიხილავდით, პოლიტიკური დიალოგის გარდა, განსაკუთრებით აღვნიშნეთ თანამშრომლობა ენერგეტიკაში“, – განაცხადა ალიევმა.
მისი თქმით, აქვთ ერთობლივი ინიციატივები და ინვესტიციები, რომლებზეც შეხვედრაზე იმსჯელეს. ასევე განიხილეს სავაჭრო კავშირები.
„განვიხილეთ სავაჭრო ბრუნვაც და ის უნდა გაიზარდოს. 500 მილიონ აშშ დოლარზე მეტია და ვფიქრობ, კიდევ გაიზრდება, რადგან ამის ყველა შესაძლებლობა გვაქვს
რაც შეეხება სამხედრო-ტექნიკურ თანამშრომლობას, ჩვენ ეს საკითხიც განვიხილეთ. მას ასევე აქვს საკმაოდ ფართო პერსპექტივები როგორც უკრაინაში, ისე აზერბაიჯანში
ჩვენ ვხედავთ სამხედრო ინდუსტრიის, თავდაცვის სამრეწველო კომპლექსის განვითარებას და შეგვიძლია განვიხილოთ ერთობლივი წარმოება. ზოგადად წარმოებაშიც გვაქვს შესანიშნავი შესაძლებლობები და დღეს ამაზეც გვქონდა ვრცელი მოლაპარაკებები“, – განაცხადა ილჰამ ალიევმა.
აზერბაიჯანის პრეზიდენტმა ხაზი გაუსვა, რომ ეს ზელენსკისთან ბოლო 4 წელში მისი მეშვიდე შეხვედრაა, რომელიც საერთაშორისო ორგანიზაციების პლატფორმებზე იმართებოდა.
„მახსოვს, პრეზიდენტო, როგორ ეწვიეთ აზერბაიჯანს პირველად 2019 წელს. ჩვენი პირადი ურთიერთობები იმ დღეს დაიწყო და დღესაც წარმატებით გრძელდება.
2022 წლის იანვარში მე ვეწვიე კიევს, მახსოვს ეს ვიზიტი და ის აზრთა გაცვლა, რომელიც ჩვენ გვქონდა. ჩვენმა შემდგომმა კონტაქტებმა ჩვენი ურთიერთობები მნიშვნელოვნად მაღალ დონეზე აიყვანა. ჩვენს თანამშრომლობას ძალიან ძლიერი პოლიტიკური საფუძველი აქვს.
2008 და 2011 წლებში კიევსა და ბაქოში ჩვენ ხელი მოვაწერეთ ორ დოკუმენტს სტრატეგიული თანამშრომლობის შესახებ. ეს არის ძალიან ძლიერი პოლიტიკური დოკუმენტები და, რა თქმა უნდა, ისინი აღიარებენ ჩვენი საზღვრების სუვერენიტეტსა და ხელშეუხებლობას.
რა თქმა უნდა, ორმხრივ საფუძველზე, უკრაინა და აზერბაიჯანი საერთაშორისო ორგანიზაციების ფარგლებში მხარს უჭერდნენ და დაუჭერენ ჩვენი ქვეყნების ტერიტორიულ მთლიანობას“, – განაცხადა ალიევმა.
უკრაინის პრეზიდენტმა ვოლოდიმირ ზელენსკიმ მადლობა გადაუხადა აზერბაიჯანს უკრაინის ტერიტორიული მთლიანობის და სუვერენიტეტის მხარდაჭერისთვის და აღნიშნა, რომ ეს მისი და მისი დელეგაციის პირველი ვიზიტია აზერბაიჯანში.
ზელენსკის თქმით, დღეს ხელი მოაწერეს ექვს დოკუმენტს სხვადასხვა მიმართულებით.
უკრაინის პრეზიდენტის მიხედვით, ნომერ პირველი მიმართულებაა უსაფრთხოება, თავდაცვის სამრეწველო კომპლექსი.
„უკრაინამ აგრესორის წინააღმდეგ ამ ომში გამძლეობა აჩვენა და დღეს თავის გამოცდილებას აზიარებდა. დღეს ვესაუბრე ჩვენს ექსპერტებს, რომლებიც ამჟამად აზერბაიჯანში იმყოფებიან, ისინი უდავოდ უჭერენ მხარს ჩვენს კოლეგებს, უდავოდ განვავითარებთ ჩვენს თანამშრომლობას, ერთობლივ წარმოებას.
ეს არის ძალიან მნიშვნელოვანი მიმართულებები, რომლებიც ნამდვილად გაზრდის როგორც ჩვენი ქვეყნების, ისე ჩვენი ხალხების უსაფრთხოებას და საქონელბრუნვას, რომლის გაზრდაც ჩვენს ქვეყნებს შორის ძალიან გვსურს“, – განაცხადა ზელენსკიმ.
მეორე საკითხი, რაზეც უკრაინის პრეზიდენტმა ყურადღება გაამახვილა, პარტნიორების მხარდაჭერაა.
„დღეს მადლობა გადავუხადე ბატონ პრეზიდენტს იმისთვის, რომ ამ მძიმე ზამთრის განმავლობაში პარტნიორები ჩვენთან იყვნენ. უკრაინელი ხალხი არ ყოფილა მარტო. რა თქმა უნდა, ეს არის ჩვენი საჰაერო თავდაცვა, ჩვენი გმირი ჯარისკაცები, რომლებიც გვიცავდნენ, ჩვენი ენერგეტიკოსები, მაგრამ ასევე პარტნიორული ურთიერთობები და ენერგეტიკული პაკეტები, რომლებითაც მთელი ამ დროის განმავლობაში აზერბაიჯანი მხარს უჭერდა უკრაინას. ჩვენ მივიღეთ 11 დახმარების პაკეტი ასეთ ძალიან რთულ პერიოდში.
ჩვენ ამისთვის მადლიერები ვართ, ამას მაღალ დონეზე ვაფასებთ და ვსაუბრობთ შესაბამისი ინიციატივების გაგრძელებაზე“, – განაცხადა ზელენსკიმ.
მან ილჰამ ალიევს ასევე მადლობა გადაუხადა სასაზღვრო ტერიტორიებზე ბავშვების დახმარებისთვის და ჰუმანიტარული მხარდაჭერისთვის.
ზელენსკის მიხედვით, შეხვედრაზე საუბარი შეეხო ენერგეტიკას და სტაბილური პარტნიორობის საჭიროებას, განიხილეს ასევე სამშვიდობო ძალისხმევა.
„უკრაინისთვის ძალიან მნიშვნელოვანია, რომ რუსეთმა საკუთარ თავში იპოვოს ძალა, დაასრულოს ეს უსამართლო ომი. რა თქმა უნდა, ჩვენ მაღალ დონეზე ვაფასებთ ჩვენი პარტნიორების როლს ამ პროცესის მედიაციაში. ჩვენ გავუზიარეთ აზერბაიჯანის პრეზიდენტს, რომ მზად ვართ სამმხრივი მოლაპარაკებებისთვის. ჩვენ გვქონდა ასეთი მოლაპარაკებები თურქეთში, გვქონდა ასეთი მოლაპარაკებები ჩვენს ამერიკელ პარტნიორებთან, შვეიცარიაში.
რა თქმა უნდა, ჩვენ მზად ვართ უახლოესი მოლაპარაკებებისთვის აზერბაიჯანში, თუ რუსეთი მზად იქნება დიპლომატიისთვის.
…ბატონო პრეზიდენტო, ვთვლი, რომ თავდაცვის მრეწველობის კომპლექსი, უსაფრთხოება და ეს ღრმა თანამშრომლობაა, რომლისკენაც, ჩემი აზრით, დღეს ჩვენ ძალიან სერიოზული ნაბიჯი გადავდგით შესაბამისი დოკუმენტების ხელმოწერით.
მე ვთვლი, რომ ეს არა მხოლოდ იარაღის საკითხია. ეს დღეს მთელი მსოფლიოსთვის სტაბილურობის საკითხია, ხალხებისთვის სიმშვიდის, რომ ქვეყნები ისეთი ძლიერები არიან, რომ შეუძლიათ ნებისმიერი გამოწვევისგან თავის დაცვა და ეს ასევე ძალიან მნიშვნელოვანი სიგნალია, ჩემი აზრით, ნებისმიერი ქვეყნისთვის, სანამ ისინი თეორიულადაც კი გაიფიქრებენ ამა თუ იმ აგრესიაზე, უნდა იცოდნენ, რომ ქვეყნები, რომელთა წინააღმდეგაც მათ სურთ საბრძოლო მოქმედებების გაჩაღება, მზად არიან ნებისმიერი გამოწვევისთვის.
ჩვენ ვუსურვებთ აზერბაიჯანელ ხალხს ძალას და მშვიდობას და ჩვენთვის ეს ძალიან მნიშვნელოვანია. ჩვენ გვესმის, რომ ყველაფერი ასე მარტივად არ არის, გვესმის, რომ ჩვენ დღეს ვიმყოფებით ბოლო 80 წლის განმავლობაში ყველაზე ცხელი ომის პროცესში. ახლაც კი, გულწრფელად გეტყვით, ბატონო პრეზიდენტო, ახლახან მქონდა ჩემი კოლეგების მოხსენება, ახლაც კი რუსეთი გვბომბავს სხვადასხვა საჰაერო სამიზნეებით. რა თქმა უნდა, არის ნგრევა, რა თქმა უნდა, ისინი ბომბავენ სამოქალაქო ობიექტებს, ინფრასტრუქტურას, ენერგეტიკას, რკინიგზას. ამ მომენტით სარგებლობისას, ვიცი, რომ უკვე არიან მსხვერპლნი, სამწუხაროდ, არის დაჭრილების დიდი რაოდენობა, ჩემს სამძიმარს ვუცხადებ ყველა უკრაინულ ოჯახს“, – განაცხადა ზელენსკიმ.
