აშშ-ის საკვებისა და მედიკამენტების ადმინისტრაციამ (FDA) კორონავირუსის წინააღმდეგ მონოკლონური ანტისხეულების თერაპიის პრეპარატი „სოტროვიმაბი“ საგანგებო გამოყენებისთვის დაამტკიცა.
„სოტროვიმაბს“ გამოიყენებენ Covid-19-ით ინფიცირებულ მსუბუქ და საშუალო სიმძიმის პაციენტებში, რომელთა ასაკი, მინიმუმ, 12 წელია, ხოლო წონა, მინიმუმ, 40 კილოგრამი. მედიკამენტი იმ პაციენტებისთვის იქნება გამიზნული, რომლებიც მდგომარეობის ისეთი გართულების რისკქვეშ არიან, რომ შესაძლოა მათი ჰოსპიტალიზაცია გახდეს საჭირო. მათ შორის, ჯანმრთელობის პრობლემების მქონე და ხანდაზმული პაციენტებისთვის.
„სოტროვიმაბის“ უსაფრთხოებისა და ეფექტიანობის კვლევა გრძელდება, თუმცა ცნობილია, რომ ის არ არის ავტორიზებული კორონავირუსით ინფიცირებული იმ პაციენტებისთვის, რომლებიც ჰოსპიტალურ მკურნალობას გადიან და ჟანგბადის მიწოდება სჭირდებათ. მეტიც, მონოკლონური ანტისხეულების თერაპიამ შესაძლოა, უარესი კლინიკური შედეგიც კი მოიტანოს მათთვის.
„მონოკლონური ანტისხეულების თერაპიის ავტორიზაციით, ჩვენ კორონავირუსით ინფიცირებულ მაღალი რისკის ქვეშ მყოფ პაციენტებს ახალ შესაძლებლობას მივცემთ, ჰოსპიტალში მოთავსების გარეშე დაასრულონ მკურნალობა“, – განაცხადა მედიკამენტთა შეფასებისა და კვლევის ცენტრის დირექტორმა, პატრიცია კავაცონიმ.
მონოკლონური ანტისხეულები ლაბორატორიაში დამზადებული პროტეინებია, რომლებიც იმუნურ სისტემას ბაძავენ და ორგანიზმში არსებულ საფრთხისშემცველ ანტიგენებს, მათ შორის, ვირუსებს ებრძვიან. „სოტროვიმაბი“ კი სპეციალურად SARS-CoV-2 ცილის წინააღმდეგ არის შექმნილი, რომელსაც უჯრედებთან დაკავშირება უნდა შეუზღუდოს.
მედიკამენტმა საგანგებო ავტორიზაციამდე კლინიკური კვლევის სამივე ეტაპი გაიარა და 583 ადამიანზე გამოიცადა. მათგან 291-მა „სოტროვიმაბი“ მიიღო, 292-მა კი – პლასებო. მეცნიერები იკვლევდნენ, მედიკამენტის მიღების შემდეგ რამდენი ცდის პირის მდგომარეობა გართულდებოდა ისე, რომ საავადმყოფოში 24 საათზე მეტი გაეტარებინა.
კვლევის შედეგებით, მათში, ვინც პლასებო მიიღო, ჰოსპიტალიზაციით და/ან სიკვდილით 21 პირის ვირუსული ინფექცია დასრულდა, რაც პლასებომიღებულთა 7%-ს შეადგენს. ხოლო მათში, ვინც მედიკამენტი რეალურად მიიღო, მსგავსი გამოსავლით მხოლოდ 3 ადამიანის ვირუსული ინფექცია დასრულდა. ეს კი მხოლოდ 1%-ია მათგან, ვინც „სოტროვიმაბით“ მკურნალობდა.
„სოტროვიმაბის“ გამოყენების რეკომენდაცია რამდენიმე დღის წინ ევროპის წამლის სააგენტომაც გასცა.
FDA-ის დაკვირვებით, მედიკამენტი ეფექტიანია კორონავირუსის ახალ შტამებშიც, თუმცა კვლევა ჯერ კიდევ გრძელდება. საგანგებო გამოყენების ავტორიზაციის შემდეგ „სოტროვიმაბს“ 500-მილიგრამიანი ამპულებით, ინტრავენურად, ერთჯერადი დოზის სახით გამოიყენებენ.
