ჯანდაცვის სამინისტრომ „რესპუბლიკური საავადმყოფოს“ ახალი კონცეფცია წარმოადგინა

ჯანდაცვის სამინისტრომ „რესპუბლიკური საავადმყოფოს“ ახალი კონცეფცია წარმოადგინა.

სამინისტროს მიერ გავრცელებული ინფორმაციით, იგეგმება არსებული ძირითადი შენობების რეაბილიტაცია. იფუნქციონირებს 400 საწოლზე გათვლილი სტაციონარი, სხვადასხვა თერაპიული თუ ქირურგიული მიმართულების, ფსიქიატრიული, გადაუდებელი დახმარებისა და კრიტიკული მედიცინის დეპარტამენტებით.

„განვითარებული იქნება მძლავრი ამბულატორიული, დიაგნოსტიკური და სარეაბილიტაციო სერვისები, კლინიკური ლაბორატორიები. შეიქმნება განყოფილება პაციენტების პალიატიური მოვლისთვის. მოეწყობა იზოლირებული დეპარტამენტი პენიტენციური დაწესებულებიდან გადმოყვანილი პაციენტებისთვის. შეიქმნება სარეზერვო სივრცე ფორსმაჟორული სიტუაციებისთვის. შეიქმნება თანამედროვე სტანდარტების შესაბამისი ცენტრალური სისხლის ბანკი. მოეწყობა სასწავლო და საკონფერენციო სივრცეები. არსებული შენობა სპეციალური ხიდით დაუკავშირდება ახალ შენობას, რომელიც ყოფილი ე.წ. პათანატომიის შენობის ადგილას აშენდება.

ახალ შენობაში განთავსდება 250 საწოლზე გათვლილი სტაციონარი, რომელიც ორიენტირებული იქნება სპეციალიზირებულ მაღალტექნოლოგიურ სამედიცინო სერვისებზე (ორგანოთა ტრანსპლანტაცია, კარდიოქირურგია, კომბუსტიოლოგია, ჰიბრიდული საოპერაციოები), განსაკუთრებული ადგილი დაეთმობა ონკოლოგიურ მიმართულებას, შეიქმნება უახლესი აპარატურით აღჭურვილი ბირთვული და სხივური მედიცინის დეპარტამენტი.

აშენდება ახალი თანამედროვე სტანდარტების შესაბამისი ბავშვთა ინფექციური ბლოკი;

ახალი კონცეფციის თანახმად, რესპუბლიკური საავადმყოფო გათვლილი იქნება 700-ზე მეტ საწოლზე.

რესპუბლიკური საავადმყოფოს ტერიტორიაზე განთავსდება GMP სტანდარტების შესაბამისი მედიკამენტების მარაგების საწყობი.

რეაბილიტაცია ჩაუტარდება გამწვანებისა და სარეკრეაციო ზონას.

პროექტის განხორციელების ვადად განსაზღვრულია დაახლოებით 4 წელი, სავარაუდო ბიუჯეტი 160 მილიონ ლარს შეადგენს“, – ნათქვამია ინფორმაციაში.

რესპუბლიკური საავადმყოფოს დემონტაჟის ბრძანება ჯანდაცვის ყოფილმა მინისტრმა ზურაბ აზარაშვილმა გამოსცა, რასაც საავადმყოფოში დასაქმებულთა პროტესტი მოჰყვა.

საბოლოოდ პრემიერი ირაკლი კობახიძე რესპუბლიკურის ექიმებს შეხვდა.

2024 წლის 1 მარტს ზურაბ აზარაშვილმა თანამდებობა დატოვა. ირაკლი კობახიძემ კი განაცხადა, რომ ხედავდა პრობლემას მართვის კუთხით, ამაში კი რესპუბლიკურის მაგალითმა დაარწმუნა.