უკრაინის პრეზიდენტი ვოლოდიმირ ზელენსკი დონალდ ტრამპის განცხადების საპასუხოდ აცხადებს, რომ უკრაინა არჩევნების ჩატარებას შეძლებს, თუ რუსეთის პრეზიდენტი 60-დღიან ცეცხლის შეწყვეტაზე დათანხმდება.
ზელენსკის თქმით, მან ტრამპის გუნდს განუცხადა, რომ თუ მათ ნამდვილად სურთ უკრაინაში არჩევნების ჩატარება, „გთხოვთ, უთხარით პუტინს, მოგვცეს ორი თვე, 60 დღე სრული ცეცხლის შეწყვეტისთვის – 60 დღე და ჩვენ არჩევნებს ჩავატარებთ. რა თქმა უნდა, ჩვენ მზად ვიქნებით ნებისმიერი არჩევანისთვის, რომელსაც ჩვენი ხალხი, კერძოდ, უკრაინელი ხალხი გააკეთებს“, – თქვა მან ABC News-თან ინტერვიუში.
უკრაინის პრეზიდენტის განცხადებით, პრეზიდენტ ტრამპის მიმართ პატივისცემის მიუხედავად, სწორედ უკრაინის საზოგადოებასა და ხალხზეა დამოკიდებული, თუ რომელ ლიდერს აირჩევს.
„დიახ, ჩვენ ომში ვართ და არჩევნების ჩატარება მართლაც რთული საკითხია. საქმე მხოლოდ უსაფრთხოების გარანტიების არარსებობასა და კანონმდებლობისა თუ კონსტიტუციის ჩარჩოებიდან გასვლაში არ არის; მთავარია შესაბამისი უსაფრთხოების ინფრასტრუქტურის არსებობა, რათა ხალხს ხმის მიცემის შესაძლებლობა ჰქონდეს“, – აღნიშნა ზელენსკიმ.
10 ოქტომბერს აშშ-ის პრეზიდენტმა დონალდ ტრამპმა განაცხადა, რომ მისი აზრით, „დროა, უკრაინამ ახალი პრეზიდენტი აირჩიოს“.
BBC-ის ცნობით, მან ეს განცხადება გააკეთა უკრაინის პრეზიდენტ ვოლოდიმირ ზელენსკის კრიტიკის საპასუხოდ, რომელიც აშშ-სა და რუსეთს შორის დიზელის საწვავის შესახებ შეთანხმებას შეეხებოდა.
ტრამპმა განაცხადა, რომ ზელენსკის „მსოფლიოსთვის პრობლემების შექმნა სურს“, რადგან ის რუსეთის ნავთობგადამამუშავებელ ქარხნებზე თავდასხმების ნებართვას კვლავ გასცემს.
„ჯანდაბას, უნდა შეწყვიტოს“, – თქვა ტრამპმა, შემდეგ კი მიანიშნა, რომ უკრაინამ „ახალი ლიდერი უნდა აირჩიოს, რომელსაც შეთანხმების მიღწევა შეუძლია“.
„ჩვენ ვუთხარით: რუსეთს რაც გინდათ, ის უქენით, ოღონდ ნავთობგადამამუშავებელ ქარხნებს არ დაარტყათ, რადგან ეს მსოფლიო პრობლემას ქმნის“, – განაცხადა მან.
„მას შეეძლო ბევრი შეთანხმების მიღწევა, მაგრამ რატომღაც ამას არასდროს აკეთებს“ – თქვა ტრამპმა.
ტრამპის განცხადებას გამოეხმაურა პუტინის წარმომადგენელი კირილ დმიტრიევი. მან აშშ-ის პრეზიდენტის სიტყვებს „სიმბოლური და ისტორიული“ უწოდა და განაცხადა, რომ უკრაინას სჭირდება ლიდერობა, რომელიც „რეალურად მშვიდობაზე იქნება ორიენტირებული“.
