საფრანგეთის პრეზიდენტი საფრანგეთში მიმდინარე საპროტესტო აქციებს გამოეხმაურა – მან გუშინ, 18 ოქტომბერს მოსახლეობას მიმართა და თქვა, რომ ძალადობაში მონაწილეები მკაცრად დაისჯებიან.
მისი განცხადებით, ქვეყანაში ლეგიტიმური პროტესტი ძალადობისგან უნდა გაიმიჯნოს, თუმცა ხელისუფლება ქუჩებში წესრიგის აღსადგენად მკაცრ ზომებს მიიღებს.
საფრანგეთში ბოლო წლების განმავლობაში ერთ-ერთი ყველაზე მძიმე არეულობის შემდეგ 1200 ადამიანი დააკავეს – მათ გაძარცვეს და დააზიანეს მაღაზიები, ხოლო რამდენიმე ქალაქში საჯარო შენობებს თავს დაესხნენ.
შაბათს, 17 ოქტომბერს, ქვეყნის მასშტაბით გამართული დემონსტრაციები ძალადობრივ დაპირისპირებაში გადაიზარდა. შეტაკებები მოხდა პარიზსა და მარსელშიც, სადაც პოლიცია ბიზნესობიექტების გაძარცვის მცდელობების აღსაკვეთად ჩაერია. მაკრონის განცხადებით, არეულობის დროს ასობით პოლიციელი და ჟანდარმი დაშავდა.
საფრანგეთში მასშტაბური არეულობის დროს დემონსტრანტებმა ლიმოჟის მერიის შენობას ცეცხლი წაუკიდეს, ლიონში კი ტურისტული საინფორმაციო ცენტრი დაწვეს. მარსელში დემონსტრანტები მერიაში შეიჭრნენ, ბორდოში კი პრეფექტის რეზიდენციას დაესხნენ თავს. ვანდალებმა ქვეყნის სხვადასხვა ქალაქში მაღაზიები გაძარცვეს და დააზიანეს, დაარბიეს საჯარო შენობები და შენობების კედლები წარწერებით დაფარეს.
„მათ, ვინც იძალადა, ზარალი უნდა აანაზღაუროს. მათ, ვინც გაძარცვა, მოპარული უნდა დააბრუნონ ან ზიანი უნდა აანაზღაურონ. ისინი, ვინც რესპუბლიკის დამხობას ცდილობდნენ, პასუხს აგებენ“, – განაცხადა მაკრონმა.
პრეზიდენტმა შინაგან საქმეთა მინისტრს დაავალა, შეისწავლოს სამართალდამცველების მზადყოფნასთან და სადაზვერვო ინფორმაციის შეგროვებასთან დაკავშირებული საკითხები, რათა მსგავსი მასშტაბის ძალადობა აღარ განმეორდეს. მისი თქმით, გამოძიებები სწრაფად ჩატარდება, ხოლო იუსტიციის მინისტრმა პროკურორს სამართალდარღვევებზე მკაცრი რეაგირება დაავალა.
ასევე ცნობილი გახდა, რომ მაკრონმა არ დააკმაყოფილა შინაგან საქმეთა მინისტრის გადაგომის შესახებ განცხადება.
საფრანგეთის პრეზიდენტმა ასევე თქვა, რომ პრემიერ-მინისტრი კრიზისულ შტაბს უხელმძღვანელებს, რათა ძალადობის შედეგად დაზარალებულმა ბიზნესებმა დახმარება რაც შეიძლება სწრაფად მიიღონ.
პრეზიდენტი პროტესტის მიზეზების მოსმენასაც აპირებს
მაკრონმა ხაზი გაუსვა, რომ ძალადობაში მონაწილე პირები არ უნდა გაიგივდნენ იმ ასიათასობით მოქალაქესთან, რომლებიც დემონსტრაციებზე ლეგიტიმური მოთხოვნებით გამოვიდნენ.
მისი თქმით, პროტესტის ერთ-ერთი მთავარი მიზეზი მოსახლეობის მსყიდველუნარიანობის შემცირება და საწვავის გაძვირებაა. საფრანგეთის პრეზიდენტმა ეს პრობლემები სპარსეთის ყურეში მიმდინარე კონფლიქტის შედეგებს დაუკავშირა და აღნიშნა, რომ ხელისუფლება საწვავითა და გაზით მომარაგების უზრუნველსაყოფად საერთაშორისო დონეზე მუშაობს.
მაკრონის განცხადებით, მთავრობა საწვავის დისტრიბუტორებთან თანამშრომლობს, რათა მიღებულმა ზომებმა ფასებზე რეალური გავლენა მოახდინოს.
პრეზიდენტმა ყურადღება ახალგაზრდების უკმაყოფილებაზეც გაამახვილა. მისი თქმით, მოსწავლეებსა და სტუდენტებს მომავალი, განათლებისა და ცხოვრების პირობები და საზოგადოებაში საკუთარი ადგილის პოვნის შესაძლებლობა აწუხებთ.
მაკრონის განცხადებით, ახალგაზრდების მოთხოვნები ყურადღებით უნდა მოისმინონ და მათი პრობლემები არ უნდა დააკნინონ. ამ მიზნით, სტუდენტები, მასწავლებლები, დამსაქმებელთა და პროფკავშირული ორგანიზაციების წარმომადგენლები, ადგილობრივი ხელისუფლების წარმომადგენლები და პარლამენტის წევრები მთავრობასთან ერთად კონკრეტულ წინადადებებზე მუშაობას დაიწყებენ.
„ქვეყანას სჭირდება წესრიგი და ვითარების განმუხტვა და არა ესკალაცია“
მაკრონმა პოლიტიკურ პარტიებს, დამსაქმებელთა ორგანიზაციებსა და პროფკავშირებს მოუწოდა, ერთმნიშვნელოვნად დაგმონ ძალადობა და საზოგადოებას სიმშვიდისკენ მოუწოდონ.
მისი თქმით, ხელისუფლება მზად არის დიალოგისთვის, თუმცა ეს ძალადობის მონაწილეების მიმართ ლმობიერებას არ ნიშნავს.
„მოსმენა და დიალოგი სისუსტეს ან დაუსჯელობას არ ნიშნავს“, – განაცხადა საფრანგეთის პრეზიდენტმა.
მაკრონის თქმით, პრეფექტები ადგილობრივ ხელისუფლებასთან კოორდინაციით მიიღებენ ზომებს ქალაქების, საჯარო შენობებისა და ბიზნესობიექტების დასაცავად. საჭიროების შემთხვევაში, შესაძლოა, გარკვეული შეკრებებიც აიკრძალოს.
პრეზიდენტმა ასევე გააკრიტიკა ისინი, ვინც მოქალაქეებს ქუჩებში გამოსვლისა და არეულობისკენ მოუწოდებს. მისი შეფასებით, პოლიტიკური დებატები პარტიებში, მედიასა და მშვიდობიან შეკრებებზე უნდა მიმდინარეობდეს და არა ძალადობის გზით.
„დიახ – დიალოგს. დიახ – მოკლევადიან პერიოდში კონკრეტული გამოსავლების მოძიებასა და მომავალი გადაწყვეტილებებისთვის მზადებას. მაგრამ არა – ნებისმიერი სახის ძალადობას.
გაუმარჯოს რესპუბლიკას, გაუმარჯოს საფრანგეთს!“ – თქვა ემანუელ მაკრონმა.
