ლიეტუვის საზოგადოებრივი მაუწყებლის (LTR) ინფორმაციით, ლიეტუვის საგარეო საქმეთა მინისტრმა გაბრიელიუს ლანდსბერგისმა განაცხადა, რომ ევროკავშირის წევრი ქვეყნების საგარეო საქმეთა მინისტრები ქმნიან „მედიატორთა ჯგუფს“, რათა საქართველოს პოლიტიკური კრიზისის დაძლევაში დაეხმარონ.
LTR-ის ცნობით, შეკითხვას – გეგმავს თუ არა საქართველოში ვიზიტს, – მინისტრმა ლანდსბერგისმა უპასუხა, რომ, შესაძლოა, „პოლიტიკურ კრიზისში გახლართულ ქვეყანას უფრო დიდი ევროპული დელეგაცია ესტუმროს“.
„[საქართველოში ვიზიტთან დაკავშირებით] არსებობს გეგმა, ახლა ჩვენ განვიხილავთ, რამდენად იქნება ასეთი ვიზიტი შედეგიანი. საგარეო საქმეთა მინისტრების მედიატორთა ჯგუფი კომპლექტდება და ამ ჯგუფში ნამდვილად ერთზე მეტი ქვეყანა იქნება“, – განაცხადა ლანდსბერგისმა ჟურნალისტებთან და დასძინა – „მჯერა, რომ მნიშვნელოვანია საქართველოს სიგნალი გავუგზავნოთ არა მხოლოდ ლიეტუვიდან […], არამედ ეს უნდა იყოს სიგნალი ევროპიდან, რადგან ჩვენ ვსაუბრობთ განგრძობად ევროპულ და ტრანსატლანტიკურ ინტეგრაციაზე“.
