ავტორი: ელიზავეტა ჩუხაროვა
5 ოქტომბერს რამზან კადიროვმა ჩეჩნეთის ხელმძღვანელის თანამდებობაზე მეხუთე ვადა დაიწყო. ინაუგურაციის ცერემონია გროზნოში მის 50-ე დაბადების დღის დღეს გაიმართა. კადიროვმა პირობა დადო, რომ „დაიცავს ყურანს, რუსეთისა და ჩეჩნეთის რესპუბლიკის კონსტიტუციებს, ასევე ჩვენი მოსახლეობის სიცოცხლისა და ჩვენი შვილების ბედნიერი მომავლის უფლებას“.
„ეს ჩემი მოვალეობაა. ეს ჩემი სიტყვაა. რამზან კადიროვის სიტყვა“, – განაცხადა მან.
კადიროვის განცხადება, დაიცვას ჩეჩნების უფლებები, ეწინააღმდეგება რუსული და საერთაშორისო უფლებადამცველი ორგანიზაციების მრავალწლიან ანგარიშებს ჩეჩნეთში უფლებების დარღვევების შესახებ.
მაგალითად, Human Rights Watch-ის (HRW) მიერ 2026 წელს გამოქვეყნებულ ბოლო მსოფლიო ანგარიშში ნათქვამია, რომ ჩეჩნეთის ხელისუფლება 2025 წელს კადიროვის ოპონენტების ნათესავების დევნას აგრძელებდა. 2026 წელს ადამიანის უფლებათა დამცველმა ორგანიზაცია „მემორიალმა“ დაწერა ჩეჩნეთში რეიდების, გატაცებებისა და ადამიანების რუსეთის თავდაცვის სამინისტროსთან კონტრაქტების იძულებით გაფორმების ახალი ტალღის შესახებ. არაერთ უფლებადამცველ ორგანიზაციას კადიროვის მმართველობის პერიოდში ჩეჩნეთში წამებისა და სასამართლოს გარეშე სიკვდილით დასჯის პრაქტიკა აქვს გაკრიტიკებული.
სექტემბრის არჩევნებში კადიროვმა, რომელიც მმართველმა პარტიამ „ერთიანმა რუსეთმა“ წარადგინა, ოფიციალურად ხმების 99.85% მიიღო, ხოლო ამომრჩეველთა აქტივობამ 95.19% შეადგინა. მას ხმა 830 690-მა ადამიანმა მისცა. დანარჩენმა ორმა კანდიდატმა: პარტია „სამართლიანი რუსეთი სიმართლისთვის“ წარმომადგენელმა ისმაილ დენილხანოვმა და კომუნისტური პარტიის კანდიდატმა ხალიდ ნაკაევმა ხმების 0.05-0.05% მიიღეს. კადიროვი ჩეჩნეთს 2007 წლიდან მართავს.
არჩევნების დამკვირვებლები და დამოუკიდებელი რუსული მედია სექტემბრის არჩევნები მკაცრად გააკრიტიკეს და განაცხადეს, რომ პროცესი მკაცრად კონტროლდებოდა, ხოლო ოპოზიცია თითქმის არ იყო დაშვებული.
კადიროვის განცხადებით, პრეზიდენტი ვლადიმირ პუტინი ერთ-ერთი პირველი იყო, ვინც მას გამარჯვება მიულოცა.
„რა თქმა უნდა, მომილოცა. წარმატება და ბედნიერება მისურვა. მთხოვა, მისი მადლობა ჩეჩენ ხალხს გადავცე“, – განაცხადა კადიროვმა.
ეს კადიროვის მეხუთე ინაუგურაცია იყო. 2016 და 2021 წლებში გამართული წინა ცერემონიებიც 5 ოქტომბერს, ჩეჩნეთის ლიდერის დაბადების დღეზე გაიმართა.
მოსკოვისა და სრულიად რუსეთის პატრიარქმა კირილმა ინაუგურაციის დღეს კადიროვს დაბადების დღე მიულოცა და მას პირველი ხარისხის „დიდებისა და ღირსების“ ორდენი გადასცა. ეს ორდენი 2004 წელს დაარსდა და მას სახელმწიფო, რელიგიურ და საზოგადო მოღვაწეებს გადასცემენ, მათ შორის რელიგიათაშორისი თანამშრომლობისა და ხალხებს შორის მშვიდობისა და მეგობრობის განმტკიცებაში შეტანილი წვლილისთვის.
მილოცვაში კირილმა კადიროვს „ნებისყოფის მქონე, მიზანდასახული და პასუხისმგებლიანი ლიდერი“ უწოდა, რომელიც „დაუღალავად ზრუნავს მისთვის მინდობილ რეგიონსა და მის მოსახლეობაზე“. მან ცალკე გაუსვა ხაზი ჩეჩნეთის ხელისუფლებასა და რუსეთის მართლმადიდებელი ეკლესიის გროზნოს ეპარქიას შორის ჩამოყალიბებულ „კარგ ურთიერთობებს“.
ეს ჯილდო კადიროვისთვის კიდევ ერთი – არმიის გენერლის წოდების მინიჭებიდან სულ რაღაც ორ დღეში გაიცა. 3 ოქტომბერს როსგვარდიის დირექტორმა ვიქტორ ზოლოტოვმა კადიროვს, რომელსაც რუსეთის შეიარაღებულ ძალებში არასდროს უმსახურია, ოქროს სამხრეები და შინდისფერი ბერეტი გადასცა.
ინაუგურაციაზე მეზობელი რესპუბლიკების ხელმძღვანელებიც ჩავიდნენ. დაღესტნის მოვალეობის შემსრულებელმა ხელმძღვანელმა ფიოდორ შჩუკინმა კადიროვს „კარგი ჯანმრთელობა, ამოუწურავი ენერგია და მომავალ საქმიანობაში წარმატება“ უსურვა და მისი არჩევნებში გამარჯვება „ხალხის მხარდაჭერის დამაჯერებელ მტკიცებულებად“ შეაფასა.
ყაბარდო-ბალყარეთის ხელმძღვანელმა ყაზბეკ კოკოვმა კი კადიროვს „ძვირფასი ძმა და კოლეგა“ უწოდა და განაცხადა, რომ ის „დარწმუნებით მიუძღვის თავის ხალხს განვითარებისა და აღმშენებლობის გზაზე“. კოკოვმა კადიროვს „კარგი ჯანმრთელობა და მრავალი წელი ნაყოფიერი მუშაობა“ უსურვა.
კადიროვმა ასევე მიიღო მილოცვის დეპეშები რუსეთის პრემიერ-მინისტრ მიხაილ მიშუსტინისგან, რუსეთის პარლამენტის ზედა პალატის – ფედერაციის საბჭოს თავმჯდომარე ვალენტინა მატვიენკოსგან, ქვედა პალატის – სახელმწიფო დუმის სპიკერ ვიაჩესლავ ვოლოდინისგან, კრემლის ადმინისტრაციის ხელმძღვანელ ანტონ ვაინოსგან, ბელარუსის პრეზიდენტ ალექსანდრ ლუკაშენკოსგან და სხვა რუსი მაღალჩინოსნებისგან.
სტატია მომზადებულია OC Media-სთან პარტნიორული შეთანხმების ფარგლებში. შესაძლოა, მცირედ რედაქტირებული იყოს სტილისტური თვალსაზრისით. სტატიის ორიგინალი ვერსია შეგიძლიათ, წაიკითხოთ აქ.
