საქართველოს პარლამენტის თავმჯდომარე, კახა კუჭავა პარლამენტის ბიუროს სხდომის დაწყებამდე ქვეყანაში არსებულ ეპიდსიტუაციას შეეხო.
„დღეს საკოორდინაციო საბჭომ გააჟღერა რეკომენდაციები და მინდა, მოვუწოდო ყველას, დაიცვან ეს რეკომენდაციები, ასევე – ვაქცინაცია რაც უმნიშვნელოვანესია. ციფრს გაგაცნობთ, ალბათ თქვენთვისაც ძალიან საინტერესო იქნება. პარლამენტის თანამშრომელთა დაახლოებით 70%-მდე აცრილია, რაც კარგი შედეგია, თუმცა პროცესი მიმდინარეობს და იმედია, მალე სრულად დავასრულებთ ვაქცინაციას“, – განაცხადა კახა კუჭავამ.
მან ასევე მადლობა გადაუხადა ექიმებს მძიმე თვეების გამო.
დღევანდელი სტატისტიკის მიხედვით, გამოვლინდა კორონავირუსის 4 778 ახალი შემთხვევა და გარდაიცვალა კიდევ 79 ადამიანი.
დაავადებათა კონტროლის ცენტრის ინფორმაციით, ბოლო 24 საათში აიცრა 25 670 ადამიანი.
სულ ჩატარებულია 1 184 306 აცრა. ერთი დოზით აცრილია 790 542 ადამიანი – მოზრდილი მოსახლეობის 27.7%; სრულად ვაქცინირებულია 393 764 ადამიანი – მოზრდილი მოსახლეობის 13.8%.
