„უკრაინის შესახებ აუცილებელია პარლამენტის ყველა წევრმა, ყველა პარტიამ მივიღოთ ერთობლივი რეზოლუცია! მაგრამ რეზოლუციის ტექსტში რუსეთის არხსენება არის არა სიფრთხილის გამოჩენა, არამედ უთავმოყვარეობა!” – ამბობს პარტია „მოქალაქეების” ლიდერი, დეპუტატი ალეკო ელისაშვილი.
მისი თქმით, “არავინ ამბობს რომ უნდა შევუტიოთ რუსულ ბაზებს სამაჩაბლოში და აფხაზეთში, მაგრამ განცხადების/რეზოლუციის ტექსში რუსეთის გამოტოვება უკრაინაზე საუბრისას არის სირცხვილი!”
„დიდება უკრაინას! დიდება თავმოყვარე ქართულ სახელმწიფოს!” – წერს ელისაშვილი.
„ქართული ოცნება“ პარლამენტში არეგისტრირებს უკრაინის მხარდამჭერი რეზოლუციის პროექტს, რომელსაც, როგორც ცნობილია, ოპოზიციის მხარდაჭერა არ აქვს.
დღეს, 26 იანვარს „ქართულ ოცნებასა“ და ოპოზიციურ ფრაქციებს შორის ორი შეხვედრა გაიმართა, რომლის შემდეგ ოპოზიციონერმა დეპუტატებმა განაცხადეს, რომ „ქართული ოცნების“ წარმოდგენილი პროექტის თანაავტორები ვერ იქნებიან, რადგან რეზოლუციის ტექსტში, რუსეთის როლი ხაზგასმული არ არის.
ოპოზიცია ახლა მსჯელობს, რა ფორმით გამოხატავს უკრაინის მხარდაჭერას – წარმოადგენს ალტერნატიულ რეზოლუციას თუ მოითხოვს არსებულ ტექსტში ცვლილებების შეტანას.
რა წერია „ქართული ოცნების“ მიერ მომზადებულ პროექტში
„საქართველოს პარლამენტის რეზოლუცია
უკრაინაში შესაძლო სამხედრო ესკალაციის შესახებ
ეყრდნობა რა საქართველოს კონსტიტუციას, კანონმდებლობას და საერთაშორისო ხელშეკრულებებს;
მიესალმება რა საერთაშორისო ურთიერთობებში მშვიდობისა და თანამშრომლობის პრინციპების აღიარებასა და დამკვიდრებას;
ერთგულია რა საერთაშორისო სამართლის პრინციპებზე დაფუძნებული საერთაშორისო წესრიგისა და საერთაშორისო საზოგადოების საყოველთაოდ აღიარებული ნორმებისა, მათ შორის საზღვრების ურღვევობისა და ტერიტორიული მთლიანობის და სახელმწიფოს სუვერენიტეტის პრინციპებისა;
გამოხატავს ღრმა შეშფოთებას უკრაინაში შესაძლო სამხედრო ესკალაციის გამო და გმობს ყოველგვარ განზრახვას, რომელიც სუვერენული სახელმწიფოს სუვერენიტეტისა და ტერიტორიული მთლიანობის წინააღმდეგ შეიძლება იყოს მიმართული, რაც ახალ საფრთხეს უქმნის არა მხოლოდ უკრაინის, არამედ რეგიონულ მშვიდობასა და უსაფრთხოებას;
აცხადებს, რომ ჩრდილოატლანტიკურ ალიანსში გაწევრიანება არის სახელმწიფოს სუვერენული უფლება და სამხედრო-პოლიტიკური ინსტრუმენტებით ამ უფლების შეზღუდვის ყოველგვარი მცდელობა კატეგორიულად მიუღებელია;
მიიჩნევს, რომ უკრაინაში ომის არდაშვება უნდა იყოს საერთაშორისო თანამეგობრობის უმთავრესი საზრუნავი;
სოლიდარობას უცხადებს მეგობარ უკრაინელ ხალხს, რომელსაც ყოველგვარი შესაძლო სამხედრო ესკალაციით მძიმე ზიანი შეიძლება მიადგეს.
ყოველივე ზემოაღნიშნულის გათვალისწინებით, საქართველოს პარლამენტი მოუწოდებს საქართველოს მთავრობას, დიპლომატური ინსტრუმენტების გამოყენებითა და სტრატეგიულ პარტნიორებთან მჭიდრო კოორდინაციით, განაგრძოს თავისი წვლილის შეტანა უკრაინაში ომის არდაშვებაში“, – წერია რეზოლუციის ტექსტში.
„რეზოლუციაში რუსეთის როლი ხაზგასმული არ არის“ – ოპოზიცია „ოცნების“ პროექტს მხარს არ უჭერს
26 იანვარი, 2022
ტექსტი, რომელსაც პარლამენტი მიიღებს, დაცლილია ყოველგვარი პროვოკაციული რიტორიკიდან – მდინარაძე
26 იანვარი, 2022
