ზუგდიდის მუნიციპალიტეტში, სოფელ ჯიხაშკარის მეორე საჯარო სკოლაში სარეაბილიტაციო სამუშაოს დროს ერთი მუშა დაშავდა.
„პუბლიკას“ შინაგან საქმეთა სამინისტროში განუცხადეს, რომ გამოძიება სისხლის სამართლის კოდექსის 240-ე მუხლის 1 ნაწილითაა დაწყებული, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია.
„რუსთავი 2-თან“ სკოლის ადმინისტრაცია ამბობს, რომ მუშას მესამე სართულიდან გადმოყრილი ნაშალი მასალა თავის არეში მოხვდა.
დაშავებული ზუგდიდის რეფერალურ საავადმყოფოშია გადაყვანილი.
„ახალგაზრდა მამაკაცი მოთავსდა გადაუდებელი მედიცინის განყოფილებაში. ჩატარებული კვლევებით დაუდგინდა დიაგნოზი ქალა-ტვინის ღია ტრავმა. თავის ტვინის დაჟეჟილობა. ტრავმული სუბანაქროიდული სისხლჩაქცევა. ქალაფუძის და ქალასარქვლის მოტეხილობა.
მისი მდგომარეობა ახლა სტაბილურია, შეესაბამება ტრავმული დაზიანების სიმძიმეს“, – განაცხადა ექიმმა.
