უწყებათაშორისი საკოორდინაციო საბჭოს გადაწყვეტილებით, გადაადგილების შეზღუდვა, მუნიციპალური და საქალაქთაშორისო ტრანსპორტისგან განსხვავებით, არ შეეხება ტაქსებს.
პრემიერ-მინისტრმა გიორგი გახარიამ განმარტა, რა წესით იმუშავებს ტაქსები.
„ტაქსებთან მიმართებით არანაირი სპეციფიკური შეზღუდვა, გარდა პირბადისა, რაოდენობის შეზღუდვების არ წესდება“, – განაცხადა გიორგი გახარიამ.
დღეს მოქმედი რეგულაციებით, იკრძალება ტაქსით გადაადგილებით მომსახურებისას 3-ზე მეტი პირის (მძღოლის ჩათვლით) გადაადგილება. ამასთან, მძღოლი აღჭურვილი უნდა იყოს პირბადით და მგზავრები უნდა განთავსდნენ მძღოლის უკანა მხარეს.
საკოორდინაციო საბჭოს გადაწყვეტილებით, ტრანსპორტზე წესდება შემდეგი შეზღუდვები:
28 ნოემბერი – 31 იანვრის ჩათვლით:
ქვეყნის მასშტაბით იზღუდება:
- მგზავრების რეგულარული საქალაქთაშორისო გადაყვანა, მათ შორის – რკინიგზით, ავტობუსით, სამარშრუტო ტაქსით. მსუბუქ ავტომობილებზე (მათ შორის ტაქსებზე) არ წესდება შეზღუდვა;
- ქ. თბილისის, ქ. თელავის, ქ. ბათუმის, ქ. ქუთაისის, ქ. რუსთავის, ქ. გორის, ქ. ფოთის, ქ. ზუგდიდის საზღვრებში მუნიციპალური ტრანსპორტის მუშაობა;
24 დეკემბერი – 2 იანვრის პერიოდში ხდება შეზღუდვების შემსუბუქება:
- აღდგება როგორც მუნიციპალური, ისე – საქალაქთაშორისო ტრანსპორტის მუშაობა.
3 იანვარი – 15 იანვრის პერიოდში
- აღდგება ყველა ის შეზღუდვა, რომელიც მოქმედებდა 28 ნოემბრიდან 24 დეკემბრამდე პერიოდში;
16 იანვარი – 31 იანვარი
ქვეყნის მასშტაბით:
- აღდგება მუნიციპალური და საქალაქთაშორისო ტრანსპორტის მუშაობა,
- შაბათ-კვირას ტრანსპორტი აჩერებს მუშაობას.
მთელი ამ პერიოდის განმავლობაში შეზღუდვები არ ეხება:
- მსუბუქი ავტომობილით (მათ შორის – ტაქსით) გადაადგილებას.
