ევროსაბჭოს გენერალური მდივანი ალან ბერსე უახლოეს დღეებში საქართველოში ჩამოსვლას აპირებს.
ამის შესახებ განცხადებაშია ნათქვამი, რომელშიც ბერსე საქართველოში მიმდინარე მოვლენებს გამოეხმაურა.
მისი თქმით, ბოლო 24 საათის განმავლობაში ის ელაპარაკა საქართველოს პრეზიდენტ სალომე ზურაბიშვილს და პრემიერ-მინისტრ ირაკლი კობახიძეს.
დაძაბული ვითარების და მიმდინარე დაპირისპირებების ფონზე, გენერალურმა მდივანმა გამოხატა ევროსაბჭოს შეშფოთება მზარდი პოლარიზაციისა და პოლიტიკური ჩიხის გამო.
მან ასევე გააკეთა მოწოდება რელევანტური პოლიტიკური ნაბიჯების გადადგმისკენ, რათა თავიდან იქნას აცილებული შემდგომი ესკალაცია.
გენერალურმა მდივანმა ასევე ხაზი გაუსვა დემონსტრაციების დროს სამართალდამცველების მიერ ძალის გადამეტებული გამოყენების შემთხვევების გამოძიების მნიშვნელობას.
ვინაიდან საქართველო არის ევროსაბჭოს წევრი, გენერალურმა მდივანმა კიდევ ერთხელ გაიმეორა ორგანიზაციის როლი აზრთა გაცვლაში ყველა დაინტერესებულ მხარესთან და შეახსენა ევროსაბჭოს ღირებულებებისა და სტანდარტების პატივისცემის ვალდებულება, გამოხატვის თავისუფლებისა და მშვიდობიანი შეკრების უფლების ჩათვლით.
„ეს არის როგორც ქართველი ხალხის, ისე მთელი ქვეყნის და მისი სტაბილურობის ინტერესებში“. – განაცხადა ალან ბერსემ.
ევროსაბჭოს გენერალურმა მდივანმა ასევე ხაზი გაუსვა თავის გადაწყვეტილებას, გააგრძელოს საქართველოს მხარდაჭერა მის ევროპულ მისწრაფებებში და უზრუნველყოს მისი დემოკრატიული უსაფრთხოება.
მან ასევე გამოხატა მზადყოფნა, განაგრძოს კონსტრუქციული დიალოგი ყველა შესაბამის პარტნიორთან, მათ შორის სამოქალაქო საზოგადოებასთან, არსებული კრიზისის დაძლევის მიზნით.
ევროსაბჭო მზად არის, გააგრძელოს საქართველოს მხარდაჭერა, მათ შორის არსებული სამოქმედო გეგმის ფარგლებში, რომელიც ქვეყანას ევროპულ გზაზე გაჰყვება.
ამ კონტექსტში, გენერალური მდივანი საქართველოში უახლოეს დღეებში ჩამოსვლას აპირებს.
