ავტორი: არშალუის ბარსეღიანი
რუსეთის საგარეო დაზვერვის სამსახურის ხელმძღვანელმა, სერგეი ნარიშკინმა განაცხადა, რომ სომხეთის საპარლამენტო არჩევნები „გარკვეული თვალსაზრისით საეჭვო“ იყო. რუსეთის პრეზიდენტ ვლადიმირ პუტინს კი ჯერ კიდევ არ მიულოცავს გამარჯვება პრემიერ-მინისტრ ნიკოლ ფაშინიანისთვის, რითაც დაირღვა ტრადიცია, რომელიც სომხეთის, როგორც რუსეთის მრავალწლიანი მოკავშირის მიმართ არსებობდა.
„ცხადია, სიტუაცია რთულია. არჩევნები, ასე ვთქვათ, მარტივი არ ყოფილა. შედეგები ფარდობითია და, გარკვეული თვალსაზრისით, საეჭვოც. ამიტომ ეს საკმაოდ, ვიტყოდი, აქტიური პოლიტიკური პროცესები გაგრძელდება“, – განუცხადა ნარიშკინმა რუსეთის სახელმწიფო სააგენტო TASS-ს 15 ივნისს – არჩევნების საბოლოო შედეგების გამოქვეყნების მეორე დღეს.
საბოლოო შედეგების მიხედვით, მმართველმა პარტია „სამოქალაქო შეთანხმებამ“ პარლამენტში 64 მანდატი მოიპოვა, ხოლო ოპოზიციურმა პარტია „ძლიერმა სომხეთმა“ – 29 მანდატი, „სომხეთის ალიანსმა“ კი 12 მანდატი მიიღო. კიდევ ერთმა გავლენიანმა ოპოზიციურმა ძალამ, „აყვავებულმა სომხეთმა“, რომელსაც მილიარდერი გაგიკ ცარუკიანი ხელმძღვანელობს, პარლამენტში შესასვლელად საჭირო 4%-იანი ბარიერი ვერ გადალახა და ხმების 3.9893% მიიღო.
საბოლოო შედეგები რამდენიმე ასეულ საარჩევნო უბანზე ხმების გადათვლისა და ცენტრალური საარჩევნო კომისიის (CEC) გადაწყვეტილებების შემდეგ გამოქვეყნდა. კომისიამ სამი საარჩევნო უბნის შედეგები ბათილად ცნო. ამასთან, მან სადავო გადაწყვეტილება მიიღო და გაუქმებულ უბნებზე განმეორებითი კენჭისყრა არ დანიშნა. შედეგად, მმართველმა პარტიამ შეინარჩუნა პარლამენტში 3/5-იანი უმრავლესობა, რაც აუცილებელია მნიშვნელოვანი აღმასრულებელი და სასამართლო თანამდებობების დანიშვნისა და გათავისუფლებისთვის, ასევე კონსტიტუციის შესაცვლელად.
15 ივნისს ნარიშკინმა კიდევ ერთხელ გაუსვა ხაზი ორმხრივი „კარგი ურთიერთობების“ მნიშვნელობას და განაცხადა, რომ „თანამშრომლობა და პარტნიორობა ყველა მიმართულებით ვითარდება: ეკონომიკაში, ჰუმანიტარულ სფეროში, სამხედრო და სამხედრო-ტექნიკურ თანამშრომლობაში“.
ეს განცხადებები გაკეთდა იმ ფონზე, როდესაც მოსკოვი კვლავ თავს იკავებს არჩევნების შედეგების ოფიციალურად აღიარებისგან, მაშინ როცა სომხეთსა და მის ისტორიულ მოკავშირეს შორის ურთიერთობები დაძაბული რჩება.
კრემლის პრესსპიკერმა დმიტრი პესკოვმა 8 ივნისს განაცხადა, რომ მოსკოვი აკვირდებოდა ცნობებს საარჩევნო დარღვევების შესახებ და თავი შეიკავა არჩევნების შეფასებისგან. მისი თქმით, რუსეთი საბოლოო შედეგების გამოქვეყნებას ელოდებოდა.
დამოუკიდებელმა რუსულმა მედია Meduza-მ გაავრცელა ინფორმაცია, რომ, კრემლთან დაახლოებული მსხვილი მედიის თანამშრომლის თქმით, კრემლმა სახელმწიფო და სამთავრობო მედია დაავალა, არჩევნების შედეგები ფაშინიანის „დამარცხებად“ წარმოეჩინათ – სწორედ ეს სიტყვის გამოეყენებინათ. ანგარიშის თანახმად, ოფიციალურ პირებს ასევე ურჩიეს, განსაკუთრებული ყურადღება გაემახვილებინათ სავარაუდო საარჩევნო დარღვევებზე, რათა „ფაშინიანის ლეგიტიმურობის მიმართ ეჭვები გაეღვივებინათ“.
არჩევნებამდე პუტინმა ღიად გამოთქვა სურვილი, რომ არჩევნებში პრო-რუსულ ჯგუფებს მიეღოთ მონაწილეობა.
ამავე პერიოდში რუსეთმა სომხური ექსპორტისთვის რამდენიმე შეზღუდვა დააწესა, რაც ბევრმა ეკონომიკურ ზეწოლად შეაფასა, რომელიც არჩევნების შედეგებზე გავლენის მოხდენას ისახავდა მიზნად. არჩევნებამდე რამდენიმე დღით ადრე მოსკოვმა სომხეთში თავისი ელჩი, სერგეი კოპირკინი „კონსულტაციებისთვის“ გაიწვია. რუსი ოფიციალური პირების განმარტებით, ამის მიზეზი სომხეთის ხელმძღვანელობის მიერ ევროკავშირთან დაახლოებისკენ გადადგმული ნაბიჯები იყო.
კოპირკინი ერევანში მხოლოდ არჩევნების დასრულების შემდეგ დაბრუნდა.
სომხეთში დაბრუნების შემდეგ, 12 ივნისს, ერევანში რუსეთის დღისადმი მიძღვნილ მიღებაზე სიტყვით გამოსვლისას, რუსეთის ელჩმა განაცხადა, რომ სომხეთ-რუსეთის ურთიერთობები „გადაფასებისა და ცვალებად გლობალურ და რეგიონულ რეალობებთან ადაპტაციის ეტაპზე გადავიდა“.
რუსეთის ელჩი სომხეთში სერგეი კოპირკინი (მარცხნივ) და სომხეთის ვიცე-პრემიერი მჰერ გრიგორიანი (მარჯვნივ) რუსეთის დღის აღნიშვნაზე სომხეთში, 2026 წლის 12 ივნისს. ოფიციალური ფოტო.
მან ასევე დაადასტურა მოსკოვის მზადყოფნა „ერთობლივი, კონსტრუქციული და ორმხრივად სასარგებლო თანამშრომლობისთვის, არსებული ორმხრივი და მრავალმხრივი მექანიზმების საფუძველზე“.
ღონისძიებას ესწრებოდნენ სომხეთის რამდენიმე მაღალი თანამდებობის პირი, მათ შორის პარლამენტის თავმჯდომარე ალენ სიმონიანი და ვიცე-პრემიერი მჰერ გრიგორიანი.
მიუხედავად იმისა, რომ მოსკოვი კვლავ დუმს არჩევნების შედეგებთან დაკავშირებით, ერევანმა რუსეთის დღე ოფიციალური მილოცვებით აღნიშნა, მათ შორის ფაშინიანის გზავნილით პუტინისადმი.
„დარწმუნებული ვარ, რომ სომხეთისა და რუსეთის ხალხებს შორის მრავალმხრივი კავშირები, ასევე ორმხრივი მზადყოფნა ღია და კონსტრუქციული დიალოგისთვის, რომელიც ერთმანეთის სუვერენიტეტისა და სახელმწიფო ინტერესების პატივისცემას ეფუძნება, მომავალშიც ხელს შეუწყობს თანამშრომლობის გაძლიერებას და ჩვენს ქვეყნებს შორის არსებული შესაძლებლობების სრულად გამოყენებას“, – ნათქვამია ფაშინიანის განცხადებაში.
სტატია მომზადებულია OC Media-სთან პარტნიორული შეთანხმების ფარგლებში. შესაძლოა, მცირედ რედაქტირებული იყოს სტილისტური თვალსაზრისით. სტატიის ორიგინალი ვერსია შეგიძლიათ წაიკითხოთ აქ.
