პარტია „გახარია – საქართველოსთვის“ მოუწოდებს საქართველოს ხელისუფლებას, ჟენევის საერთაშორისო დისკუსიებზე, რომლის 67-ე რაუნდი დღეს იწყება, ცხინვალის რეგიონის მიმდინარე ანექსიის საკითხი მწვავედ დააყენოს.
პარტია ასევე მოუწოდებს ჟენევის დისკუსიების თანათავმჯდომარეებს, დაგმონ რუსეთის ფედერაციის მიერ საერთაშორისო სამართლის ნორმების, მათ შორის – 2008 წლის ცეცხლის შეწყვეტის შეთანხმებით ნაკისრი ვალდებულებების მორიგი უხეში დარღვევა.
„წინა რაუნდის შემდეგ, მოსკოვმა მნიშვნელოვნად დააჩქარა საქართველოს ოკუპირებული ცხინვალის რეგიონის ფაქტობრივი ანექსიის პროცესი, რომელიც მის რუსეთის ფედერაციაში ინტეგრაციას ისახავს მიზნად.
ანექსიის ეს ახალი ფაზა ე.წ. „მოკავშირეობრივი ურთიერთობების გაღრმავების შესახებ“ 9 მაისის შეთანხმების ხელმოწერით დაიწყო, რასაც ცხინვალის საოკუპაციო რეჟიმის ე.წ. ხელმძღვანელად რუსი მოხელის დანიშვნა მოჰყვა.
ამ ფონზე, „ოცნების“ ხელისუფლება სრულ დუმილს ინარჩუნებს საქართველოს ტერიტორიული მთლიანობისა და სუვერენიტეტის ამ აშკარა დარღვევაზე და უარს ამბობს ანექსიის დამგმობი რეზოლუციის მხარდაჭერაზეც კი. “ოცნება” დანაშაულებრივი დუმილითა და უმოქმედობით, კოლაბორაციონისტული პოლიტიკით ხელს უწყობს ოკუპანტის ინტერესების განხორციელებას.
ჟენევის დისკუსიები წარმოადგენს ერთადერთ ფორმატს, სადაც საქართველო რუსეთთან კონფლიქტსა და ოკუპირებულ ტერიტორიებზე არსებულ მდგომარეობას განიხილავს და სადაც ჩვენი სტრატეგიული პარტნიორები მონაწილეობენ.
შესაბამისად: მოვითხოვთ საქართველოს ხელისუფლებისგან, შეხვედრის მსვლელობისას მწვავედ დააყენოს ოკუპირებული ცხინვალის რეგიონის მიმდინარე ანექსიის საკითხი. მოვუწოდებთ ჟენევის დისკუსიების თანათავმჯდომარეებს, დაგმონ რუსეთის ფედერაციის მიერ საერთაშორისო სამართლის ნორმების, მათ შორის – 2008 წლის ცეცხლის შეწყვეტის შეთანხმებით ნაკისრი ვალდებულებების მორიგი უხეში დარღვევა“, – ნათქვამია პარტიის განცხადებაში.
13 მაისს რუსეთის დუმამ ე.წ. სამხრეთ ოსეთთან თანამშრომლობის გაღრმავების შესახებ შეთანხმების რატიფიცირება მოახდინა.
შეთანხმებას ვლადიმერ პუტინმა და ალან გაგლოევმა 9 მაისს მოაწერეს ხელი.
დოკუმენტს 15 მაისს გამოეხმაურა მაკა ბოჭორიშვილი, რომელმაც ევროსაბჭოს მინისტრთა 135-ე მინისტერიალის სესიაზე განაცხადა, რომ რუსეთი „კვლავ აგრძელებს საერთაშორისო ვალდებულებების უგულებელყოფას და დგამს ნაბიჯებს საქართველოს რეგიონების ანექსიისკენ“.
23 ივნისს ცნობილი გახდა, რომ ოკუპირებული ცხინვალის ე.წ. პრეზიდენტი ალან გაგლოევი გადადგა – ის რუსეთის პრეზიდენტის, ვლადიმირ პუტინის მრჩეველი გახდა. მანამდე თანამდებობა დატოვა ე.წ. პრემიერმაც. მის ნაცვლად ჩრდილოეთ ოსეთის წარმომადგენელი მარატ კამბოლოვი დანიშნეს.
