სომხეთის მმართველი პარტიის დეპუტატს რუსეთში შესვლაზე უარი უთხრეს

ავტორი: ელიზაბეთ მაკბრაიდი

ლუსინე ბადალიანის განცხადებით, რუსეთის ხელისუფლებას უარის მიზეზი არ განუმარტავს.

სომხეთის მმართველი პარტია „სამოქალაქო შეთანხმების“ წარმომადგენელი დეპუტატი ლუსინე ბადალიანი აცხადებს, რომ 14 ოქტომბერს რუსეთში შესვლაზე უარი უთხრეს. ეს იმ ფონზე ხდება, როდესაც ორ ქვეყანას შორის ურთიერთობები სულ უფრო უარესდება.

Facebook-ზე გამოქვეყნებულ განცხადებაში ლუსინე ბადალიანმა თქვა, რომ სანქტ-პეტერბურგში მიემგზავრებოდა დამოუკიდებელ სახელმწიფოთა თანამეგობრობის (დსთ) კომიტეტის შეხვედრაში მონაწილეობის მისაღებად, როცა რუსეთში შესვლაზე უარის შესახებ აცნობეს.

სომხეთმა წარსულში რამდენჯერმე არ შეუშვა ქვეყანაში რუსეთის წარმომადგენელი – მაგალითად, 2022 წელს მსგავსი შეზღუდვა რუსეთის სახელმწიფო სათათბიროს დეპუტატ კონსტანტინ ზატულინსაც შეეხო. თუმცა ბოლო პერიოდის განმავლობაში ეს პირველი შემთხვევაა, როდესაც რუსეთმა სომეხ პოლიტიკოსს ქვეყანაში შესვლაზე უარი უთხრა.

ტელეწამყვანად მუშაობის წარსულის მქონე დეპუტატის თქმით, მას განუცხადეს, რომ „იქ შესვლა აკრძალული ჰქონდა. რა მიზეზით – უცნობია“. გაურკვეველია, ბადალიანს ამის შესახებ რუსეთში ჩასვლის შემდეგ აცნობეს თუ თვითმფრინავში ასვლამდე. OC Media-მ დეპუტატს კომენტარისთვის მიმართა.

ბადალიანის განცხადებით, „უცნაური და შემაშფოთებელი ვითარებაა, როდესაც ეროვნული საპარლამენტო დელეგაციის წევრს არ აძლევენ საშუალებას, გაემგზავროს საერთაშორისო საპარლამენტო ორგანიზაციის შტაბ-ბინაში, შეასრულოს თავისი ოფიციალური მოვალეობები და მონაწილეობა მიიღოს კომიტეტის მუშაობაში“.

რუსეთსა და დსთ-ს ბადალიანის განცხადებებზე კომენტარი ჯერ არ გაუკეთებიათ.

სომხეთსა და რუსეთს შორის ურთიერთობები 2020 წლიდან თანდათან უარესდება. ვითარება კიდევ უფრო დაიძაბა მას შემდეგ, რაც მოსკოვმა 2021 და 2022 წლებში აზერბაიჯანის თავდასხმების ფონზე კოლექტიური უსაფრთხოების ხელშეკრულების ორგანიზაციის (ОДКБ/კუხო) ფარგლებში ნაკისრი თავდაცვითი ვალდებულებების შესრულება არ ისურვა.

რუსეთი სულ უფრო მეტად უპირისპირდებოდა პრემიერ-მინისტრ ნიკოლ ფაშინიანსა და მის პარტიას – „სამოქალაქო შეთანხმებას“. მოსკოვმა ღიადაც კი გამოხატა სურვილი, რომ ფაშინიანი ივნისის საპარლამენტო არჩევნებში დამარცხებულიყო.

სომხეთის მიერ ევროკავშირთან ურთიერთობების გაღრმავების მცდელობის პარალელურად, ორ ქვეყანას შორის ურთიერთობები მკვეთრად გაუარესდა. 2026 წლის აგვისტოში ფაშინიანმა განაცხადა, რომ სომხეთი მალე ევროკავშირში გაწევრებაზე ოფიციალურ განაცხადს წარადგენს, რასაც რუსეთში მწვავე უკმაყოფილება მოჰყვა.

მოსკოვის განცხადებით, ერევანი ერთდროულად ვერ იქნება რუსეთის ხელმძღვანელობით მოქმედი ევრაზიის ეკონომიკური კავშირისა (EAEU) და ევროკავშირის წევრი.

სტატია მომზადებულია OC Media-სთან პარტნიორული შეთანხმების ფარგლებში. შესაძლოა, მცირედ რედაქტირებული იყოს სტილისტური თვალსაზრისით. სტატიის ორიგინალი ვერსია შეგიძლიათ, წაიკითხოთ აქ.