მიკროავტობუსების შესყიდვის მიზნით გამოცხადებული ტენდერი დასრულებულია. მათი ნაწილი თბილისში ოქტომბერში შემოვა. ამის შესახებ კახა კალაძემ დედაქალაქის მთავრობის სხდომაზე ისაუბრა.
მისი თქმით, გამარჯვებულმა კომპანიამ „ფორდის“ მარკის 300 ერთეული მიკროავტობუსი 180 დღის განმავლობაში უნდა შემოიყვანოს.
„თქვენ იცით, რომ 15 ივლისს გამოცხადებული იყო ტენდერი, 300 ერთეულის შესყიდვის მიზნით, რათა ეტაპობრივად დავიწყოთ მიკროავტობუსების ჩანაცვლება და მთლიანად განვაახლოთ ისევე, როგორც ავტობუსები. ტენდერი უკვე დასრულებულია, გვყავს გამარჯვებული კომპანია, 18 სექტემბერს გაფორმდა ხელშეკრულება და „ფორდის“ მარკის სამასი ერთეული ავტობუსი ეტაპობრივად შემოვა დედაქალაქში. ოქტომბერში ნაწილი ადგილზე იქნება და დანარჩენიც 180 დღის განმავლობაში შემოვა. ეს სამასი ერთეული საკმარისი არ არის და საჭირო იქნება დამატებით შესყიდვაც“, – განაცხადა დედაქალაქის მერმა.
მისივე თქმით, დედაქალაქში ადრე 3000-მდე მიკროავტობუსი გადაადგილდებოდა, თუმცა ახლახან წამოწყებული სატრანსპორტო რეფორმით, მათი რაოდენობა 1200-მდე შემცირდება.
„ეს გამოწვეულია იმით, რომ ჩვენ მთლიანად მოდერნიზებას ვაკეთებთ ავტობუსების ქსელის და მარშრუტების. ქალაქში, ძირითადად, იმოძრავებს 12, 10, 8-მეტრიანი ავტობუსები, თუმცა რელიეფიდან და ქუჩების სივიწროვიდან გამომდინარე, რა თქმა უნდა, საჭიროა მიკროავტობუსებიც. ეს ყველაფერი ისე იქნება ინტეგრირებული და დალაგებული, რომ კომფორტული იყოს მგზავრობა“, – აღნიშნა კახა კალაძემ.
