ამჯერად თბილისის ანძა აშშ-ის დროშის ფერებში განათდა

პუბლიკა

კორონავირუსთან ბრძოლაში ამერიკის შეერთებული შტატების მხარდასაჭერად თბილისის ანძა ამერიკის დროშის ფერებში განათდა.

„საქართველო მუდამ იყო და არის ამერიკის შეერთებული შტატების გვერდით! ჩვენ გვჯერა ამერიკის გამარჯვების!”, – ამის შესახებ ინფორმაციას თბილისის მერია ავრცელებს და წერს, რომ საქართველო მესიჯს თავის სტრატეგიულ პარტნიორს უგზავნის.

საქართველომ მსგავსი ფორმით სოლიდარობა იტალიელ და ესპანელ ხალხსაც გამოუცხადა.

Worldometers-ის ბოლო მონაცემებით, ამერიკის შეერთებულ შტატებში კორონავირუსის დადასტურებული 265 506  შემთხვევა ფიქსირდება, მათგან გამოჯანმრთელდა 11 983 პაციენტი, ხოლო გარდაიცვალა 6 786 ადამიანი.