აშშ-ის საელჩოს განცხადებით, ოპოზიციას ცივი წყალი გადაესხა - კობახიძე

პუბლიკა

აშშ-ის საელჩოსგან ამ შინაარსის განცხადება როდესაც ვრცელდება, ეს არის დადასტურება, რომ მთელი ამ პერიოდის განმავლობაში ოპოზიცია იტყუებოდა და ბრალს სდებდა დანაშაულში ამერიკის საელჩოს, რაც არის სრულიად მიუღებელი მოვლენა, – ამის შესახებ ჟურნალისტებს საპარლამენტო უმრავლესობის ლიდერმა, ირაკლი კობახიძემ განუცხადა. კობახიძის კომენტარს „პირველი არხი“ ავრცელებს.

„ძალიან სწორი განცხადებაა, ზუსტად ისაა, რასაც ვამტკიცებდით ჩვენ. 2012 წლამდეც, მიუხედავად იმისა, რომ მაშინ იყო უმძიმესი რეჟიმი მათ შორის სასამართლოში, ამერიკის შეერთებული შტატები მხარს უჭერდა სასამართლო სისტემას და მხარდაჭერა დღესაც გრძელდება უკვე იმ ვითარებაში, როდესაც სასამართლო არის მთლიანად რეფორმირებული. რასაც ჩვენ ვამბობდით, ეს დაადასტურა ამერიკის საელჩოს განცხადებამ და ცივი წყალი გადაესხა ამით ოპოზიციის მტკიცებას იმასთან დაკავშირებით, თითქოს ამერიკის საელჩო ჩადიოდა დანაშაულს, იბარებდა მოსამართლეს, ახორციელებდა ზეწოლას მოსამართლეზე, სასამართლოზე და ცდილობდა არაფორმალურ მმართველობას. ამ განცხადებით ცივი წყალი გადაესხა ოპოზიციის მტკიცებას ამასთან დაკავშირებით“, – განაცხადა ირაკლი კობახიძემ.

კითხვაზე, რომ მმართველი გუნდი აშშ-ის საელჩოსგან გავრცელებული ინფორმაციის უარყოფას ითხოვდა, ირაკლი კობახიძემ განაცხადა, რომ საელჩოს განცხადება ზუსტად ამას ნიშნავს.

„ეს განცხადება ჩვენთვის ზუსტად ამას ნიშნავს. ამერიკის საელჩო რაღაცას რომ აკეთებს, მერე ამას ღიადაც ამბობს, მე ასე მგონია და როდესაც ამ შინაარსის განცხადება ვრცელდება, ეს არის ზუსტად იმის დადასტურება, რომ მთელი ამ პერიოდის განმავლობაში ოპოზიცია იტყუებოდა და ბრალს სდებდა დანაშაულში ამერიკის საელჩოს, რაც არის სრულიად მიუღებელი მოვლენა. თუ რამე არის ანტიდასავლური კამპანია, ეს არის ის, როდესაც ოპოზიცია ამერიკის საელჩოს ბრალს სდებს სასამართლოზე ზეწოლაში. ეს არის ანტიდასავლური კამპანია და ეს აღარ უნდა განმეორდეს. ამას პასუხი გაეცა ცალსახად. ბუნებრივია, ამერიკის საელჩო ვერ იკადრებდა სასამართლოზე ზეწოლას, გამორიცხულია“, – აღნიშნა ირაკლი კობახიძემ.

კითხვაზე, რატომ ვერ წავიდა კონკრეტული მოსამართლე აშშ-ში, საპარლამენტო უმრავლესობის ლიდერმა განაცხადა, რომ ყველაფერს მოეფინება ნათელი.

გუშინ პარტია „ქართული ოცნების“ თავმჯდომარემ, ირაკლი კობახიძემ აშშ-ის საელჩოს მოუწოდა, მცირე განცხადება გაევრცელებინა, რომელიც გვარამიას საქმის განმხილველ მოსამართლეზე „სპეკულაციებს დაასრულებდა“. მისი თქმით, ოპოზიცია დემაგოგობს, როცა ამბობს, რომ აშშ-ის საელჩომ ლაშა ჩხიკვაძე გვარამიას საქმის გამო მოხსნა პროგრამიდან. პროგრამის ფარგლებში, მოსამართლე ამერიკის შეერთებულ შტატებში უნდა წასულიყო.

LB loan image desktop LB loan image mobile