კომუნიკაციების კომისიამ „იმედი” და „მთავარი არხი” 2500 ლარით დააჯარიმა

პუბლიკა

კომუნიკაციების კომისიამ „მთავარი არხი“ და „ტელეიმედი“ გადაცემებში პროდუქტის განთავსების  წესების დარღვევის გამო დააჯარიმა.

როგორც განცხადებაშია ნათქვამი, კომუნიკაციების კომისიის გადაწყვეტილებით, კოვიდ 19-ის პანდემიის გათვალისწინებით, მაუწყებლებს კანონდარღვევისთვის ჯარიმის მინიმალური ოდენობა – 2500 ლარი დაეკისრათ.

„საქმე ეხება „მთავარი არხის“ ეთერში 2021 წლის 26 აპრილს 07:56 საათზე გასულ გადაცემას „შენი დილა“, სადაც მაღაზია „ელიტ ელექტრონიკსის“ შესახებ სიუჟეტი განთავსდა. 4 წუთნახევრიანი სიუჟეტი ფასდაკლებებსა და შეთავაზებებს ეხებოდა, რომელშიც დეტალურად იყო წარმოდგენილი კონკრეტული ბრენდების საყოფაცხოვრებო ტექნიკა.

რაც შეეხება „ტელეიმედს“, 2021 წლის 18 მაისს 13:32 საათზე, გადაცემაში „იმედის დღე“ „ლილო მოლის“ შესახებ გავიდა სიუჟეტი, რომელიც სავაჭრო ცენტრის 30 წლის იუბილეს ეძღვნებოდა. რეპორტაჟი ეხებოდა ფასდაკლებების კვირეულსა და ახალ აპლიკაციას, რომელიც მაყურებელს აპლიკაციის ინტერფეისისა და ფუნქციების შესახებ დეტალურ ინფორმაციას აწვდიდა. სტუდიაში მოწვეული სტუმრები დეტალურად საუბრობდნენ „ლილო მოლის“ უპირატესობებზე. აღნიშნულ გადაცემებში პროდუქტებს მიენიჭა გადაჭარბებული მნიშვნელობა, რაც გავლენას ახდენს პროგრამის შინაარსზე. სიუჟეტებში მოხდა შეძენისკენ წაქეზება, სარეკლამო განცხადებების გაჟღერება, ინფორმაციის მიწოდება ხელმისაწვდომობის შესახებ და გაკეთდა პროდუქტის პოზიტიურ თვისებებზე მითითება. ასევე სიუჟეტებისთვის დათმობილი დროის ხანგრძლივობა მიუთითებს პროდუქტის განთავსების წესების დარღვევაზე, რითაც მაუწყებლების მხრიდან დაირღვა საქართველოს კანონმდებლობა“,- ნათქვამია განცხადებაში.

კომისიის მიერ გავრცელებულ განცხადებაში ნათქვამია, რომ გამომდინარე იქედან, რომ მსგავსი კანონდარღვევისთვის „მთავარ არხს“ 2021 წლის 4 თებერვალს, ხოლო „ტელეიმედს“ 2021 წლის 28 იანვარს წერილობითი გაფრთხილება მიღებული აქვთ, სამართალდარღვევის განმეორებით ჩადენის გამო კომუნიკაციების კომისიამ მაუწყებლები 2500-2500 ლარით დააჯარიმა.

LB loan image desktop LB loan image mobile