გერმანიის საგარეო საქმეთა მინისტრმა ჰაიკო მაასმა განაცხადა, რომ არ არის დარწმუნებული, რომ ახლა დიდი შვიდეულის სამიტის ფორმატის შეცვლისთვის შესაბამისი დროა.
„მეეჭვება ახლა რაიმე აზრი ჰქონდეს სხვაგვარი საშუამავლო ფორმატის შექმნას”, – განაცხადა მაასმა და დასძინა, რომ გადაწყვეტილება ჯერ კიდევ განხილვის პროცესშია.
აშშ-ის პრეზიდენტმა, დონალდ ტრამპმა შაბათს განაცხადა, რომ G7-ის (დიდი შვიდეული) სამიტი „ქვეყნების მოძველებული ერთობაა” და მოწვეულ ქვეყნებს შორის ავსტრალიის, რუსეთის, სამხრეთ კორეისა და ინდოეთის შეყვანის ინიციატივა გამოთქვა.
შაბათს ტრამპმა განაცხადა, რომ შექმნილი ვითარების გამო, მომდევნო თვეში დაგეგმილი G7-ის სამიტის გადადება მოუწევდა. აშშ-ის პრეზიდენტმა განაცხადა, რომ სამიტის გაფართოებული სიით გამართვას ემხრობა. მან გამოთქვა სურვილი, რომ მონაწილეებს შორის ავსტრალია, რუსეთი, სამხრეთ კორეა და ინდოეთიც იყვნენ.
ტრამპის ინიციატივას ბრიტანეთის პრემიერ-მინისტრი ბორის ჯონსონი გამოეხმაურა, რომელმაც განაცხადა, რომ G7-ის სამიტში რუსეთის ხელახლა შესვლას მხარს არ დაუჭერს, თუმცა, მისივე თქმით, მასპინძელმა ქვეყანამ უნდა გადაწყვიტოს, სამიტზე ვის მოიწვევს.
რუსეთის სამიტში ხელახლა შესვლას კატეგორიულად ეწინააღმდეგება კანადის პრემიერ-მინისტრი ჯასტინ ტრუდოც.
„რუსეთი რამდენიმე წლის წინ გაირიცხა G7-ის ყირიმის ოკუპაციის გამო. რუსეთის მიერ საერთაშორისო ნორმებისა და წესების განგრძობადი დარღვევა არის მიზეზი, რის გამოც რუსეთი კვლავ G7-ის სამიტის ფორმატს მიღმაა და ეს კვლავ ასე გაგრძელდება“, – განაცხადა ტრუდომ ორშაბათს გამართულ პრესკონფერენციაზე.
რუსეთი G8 სამიტიდან 2014 წელს გაირიცხა, ყირიმის რეგიონის ანექსირების შემდეგ.
