ოსკარის საუკეთესო საერთაშორისო ფილმის კატეგორიის მოკლე სია 9 თებერვალს გახდება ცნობილი. მოკლე სიაში კინოაკადემია 15 ფილმს დაასახელებს. რიგით 93-ე დაჯილდოებაზე საქართველომ დეა კულუმბეგაშვილის სადებიუტო ნამუშევარი – „დასაწყისი“ წარადგინა.
საქართველომ ოსკარის ნომინაცია მხოლოდ ერთხელ მიიღო – 1997 წლის დაჯილდოებაზე ფილმით „შეყვარებული კულინარის 1001 რეცეპტი“ (რეჟისორი: ნანა ჯორჯაძე). 2014 წელს კი მოკლე სიაში ერთდორულად ორი ქართული კოპროდუქცია მოხდვა – ესტონეთის სახელით წარდგენილი „მანდარინები“ და საქართველოს სახელით წარდგენილი გიორგი ოვაშვილის „სიმინდის კუნძული“; საბოლოოდ ოსკარის ნომინაცია ზაზა ურუშაძის ფილმმა მიიღო.
ტრადიციულად, საერთაშორისო პრესა ცდილობს, წინასწარ გამოიცნოს, თუ რომელი ფილმი მოხვდება მოკლე სიაში, ან მიიღებს ნომინაციას. მაგალითად, ამერიკულმა გამოცემა Indiewire-მა უკვე დაასახელა ის 15 კანდიდატი, რომლებიც, შესაძლოა, ოსკარის მოკლე სიაში მოხვდნენ. მათ შორის „დასაწყისიც“ მოხვდა:
„მაშინ, როდესაც ფილმი უკიდურეს სისადავეს აღწევს 35 მილიმეტრიანი ფირითა და გრძელი, გაუჭრელი კადრებით, რაც ზოგიერთი მაყურებლისთვის, შეიძლება, მტანჯველი იყოს, „დასაწყისი“ არის შესანიშნავად დამონტაჟებული, ხშირად შოკისმომგვრელი პერსპექტივით – ისეთი, როგორიც გააოცებდა აღმასრულებელ კომისიას“, – წერს Indiewire.
გამოცემა Gold Derby-მ კი, რომელიც სხვადასხვა დაჯილდოების პროგნოზებს პერიოდულად აქვყენებს, „დასაწყისი“ „ძლიერ პრეტენდენტთა“ ნუსხაში შეიყვანა.
გამოცემა The Film Stage-მა კი კულუმბეგაშვილის დებიუტი 2020-21 წლების 40 საუკეთესო ფილმს შორის დაასახელა.
ფილმი გამოცემა The Playlist-ის სამეულში ვერა, მაგრამ პირველ თექვსმენტეულში მოხვდა.
„ეს ფილმი სრული მოულოდნელობა აღმოჩნდა, ავთენტური კინოს წუთები, რომელიც ეკრანს აალებს“, – ასე აღწერა ფილმი იტალიელმა კინორეჟისორმა ლუკა გუადანინომ.
მას შემდეგ, რაც „დასაწყისი“ კანის კინოფესიტივალის ოფიციალურ სელექციაში მოხვდა, ფილმმა ოთხი მთავარი ჯილდო მოიპოვა სან-სებასტიანის კინოფესტივალზე, სურათი ასევე ტორონტოში კინოკრიტიკოსთა საერთაშორისო ასოციაციაციის რჩეულიც გახდა.
ცოტა ხნის წინ ცნობილი გახდა, რომ „დასაწყისის“ ონლაინპრემიერა საერთაშორისო პლატფორმა Mubi-ზე 29 იავარს შედგება.
